AYakubu3
1Ábaruneng, banet dot ayɛt yin bi sot bafi itees awo, nek iyin rēn yin, iyit bayɔng fi in tees yit bakak, ba bi ki ra yit ishɔt fi iwat ifi ishɛrɛp banet.2Nek ngma yit in yet yit bafi irat. Ke akak di se fɛ́ da a rasak ni icɛɛt awo, anet yɔng mi se kushining, a da kyem a bereng kurɔm wu ngma kusum.3In tes yit itsaap iguk nanu ye, nɔng i da ki fok yit, nɔng in di ki tiri yit iye sak narɔ fi in shim yit.4Di yin ányin akyɛ-ashi, ngma ni kurasak na, ni kuri awun fɛ́ yirik ina, ngma na anɔng anet ikɔk e tiri iko ni kabi ishɛn sak narɔ fi iwu shim ku di tseng.5I se anɔng, ilem yet ikyɛng ibaane ayɛt nkap irɔm anet awe, ngma na anɔng i bɛ̀ ito ice makiyi. Di yin kica irong, ka ya kayit burang.6Ilem yet kurong ice de, kazatse iduk e ayɛt nkap irɔm ngma, ilem de imak yet iduk e. Ibeseng anet awe kusum, ilem e de ibeseng nse ni nggɔn anet ni kurong, na ba sak ide naton kurong ari irong.7Ngma nzam-nzam nkye awum, ne nanon aton aza, ni nkyɔrɔk fi in ngu aben, ni ìzos ayɛt ashi, ba kyem ba yɛbɛk ina, anet awe kyem a yɛbɛk ina,8awɛt vit anet fɛ́ a mang kyem a yɛbɛk ilem wu. Ilem yet aduk ikyɛng fi da irɔɔn awo, ama anɔng, i bɛ̀ nadɔm fɛ́ i da kyem isok kutset.9Ni ilem fi in di tere yit aTisa ne Ada yit, ni ide me fi in ti in di tosong yit banet fɛ́ Adakunom nye nabik wu.10Kanu kazining ka fɛ́ ka turung itere ni tok. Ábaruneng, i se kpaf anɔng awo.11Ibong icɛbɛt izining, kyem i nesek ashi atek na ashi ntɔk ɛ?12Ábaruneng, kakon atafo kyem ka tes ica ifat ɛ? Ke kakon anap tes ica atafo ɛ? Ba da kyem ba sɛ ashi ntɔk ni bong ashi atek awo.13Angan ayɛt yin fɛ́ a bɛ̀ kutsitsɛng ni irēn ɛ? Won na a tonong ayɛt nggɔn ntek fɛ́ a bɛ̀, na ba di kuri ntomong nggɔn kuhwyɛ fi ku ses ni kutsitsɛng e.14Awɛt ke aduk naman ni ishim ice ye fi i se ayɛt ayɛ yin, won yin itsot agwɔm ni nyɔ yin atsak.15Kuri kutsitsɛng kuyɔng nes narɔ Adakunom awo tit kufe azatse, ku yet kufe kabik Adakunom awo, ku yet kufe aShetan.16Nek karɔ fi imak ni ishim ice di se, i se gbing-gbing na ba sɛ idoro kuhwyɛ ni ntomong anyas azɔng.17Awɛt kutsitsɛng fi ku nes narɔ Adakunom, ni imɛsɛng e, ku se jɛrɛ, ama anɔng, ku bes ni kusot kukyang, ku bɛ̀ nhwyɛ, ku bɛ̀ ice ikyang, na angmishish, ku ras ntomong ntek. Vit iko ni ikasa bakak tit atsak.18Banet fɛ́ ba bɛ̀ kusot kukyang, na ba tees bakak kusot kukyang, ba da se izang kutomong kutek ba.
The Seed Company