Mateo11
1Aín unikama mëkën rabë́ ꞌimainun rabë́ akama, bana ñuixunkin sënëontankëx ka Jesús, bëtsi ëma kamanuxun bana unamiana ñuixuni kuankëxa.2Usa ꞌain ka Juanën sipuokë ꞌixun Jesucristonën ꞌakë ñukama kuakëxa, kuakin ka aín ꞌunamikë uni rairi xuakëxa.3Xukëx kuanxun ka ñukakëxa: —¿Asérabi karamina ax utinu kainkë a ꞌain, bëtsi karanuna kainti ꞌain?4Kakëxun ka Jesusan kakëxa: —Kuantankëxun kamina ꞌën ꞌaia kuanan iskë ñukama, Juan ñuixuni kuanti ꞌain.5Ñuixunkin kamina bëxuñu unin ka isia, nikëma unikama ka nitsia, ꞌain nami chëkikë unikama ka aín nami upí inun pëxkutia, pabë unikaman ka kuatia, bamakë unikamaribi ka baiskia, ꞌimainun ka ñuñuma unikamanribi anun ië́ti bana kuatia.6Chuama tani kuë́ëni ka ax tëmëraibi ꞌëmi katamëkin ënkëma ax ꞌiti ꞌikë.7Juanën unikama kuantamainu ka Jesúsan uni Juan ñuikin kakëxa: —¿Añu ñuira kaina anu uni ꞌikëma menu chikixun isan? ¿Suñun xai shaikaia isi kaina chiakën?8¿Añu kaina chikikin isan? ¿Achúshi uni upíira okin chupa pañukë kaina isan? Mitsun kamina ꞌunanin an chupa upíira okin pañukë unikama ax ka ꞌapun xubunu ꞌia.9¿Usa ꞌain kaina añu isi chikian? ¿Profeta isi? Uisakin, añuira isi kaina chikiakën profetasamaira a isi.10Juan ñuikin kuënëo bana ka ësai kia: “ꞌËn kana ꞌën uni xutin ax rëkuëxun bana ñuixuana, anumi kuanti bai mënionun”.11Ën kana asérabi mi kain, uinbi ka Juan an uni nashimikë, asamaira chaa ꞌiama ꞌikën, ꞌaibi ka uix kara chukumara ꞌikë, ax ka Diosan nëtë naíkamëonu chaa ꞌiti ꞌikën.12An uni nashimikë Juan uá ꞌain ka bëribi, naíkamëonu ꞌiti ax ami uni nishkë ꞌaibi bëríbi kushi ꞌikën. Uni an amibi kushikin ꞌain bana ꞌakë axëshi ka anu ꞌiti ꞌikën.13Kamabi profeta kia ꞌimainun bana a ñuikë an ka usai naíkamëonu ꞌiti Juan utamainu ñuikë ꞌiakëxa.14Mitsun kaina ꞌënë bana kuatin, Juan ënëx ka profeta Elías ax uti ñuikë abi ꞌiakëxa. 15Uix kara pabiu ikë, an ka kuati ꞌikën.16—¿Uisa kara kixun karanuna ënë unikama rëbunki kati ꞌain? Ka tuá xukama anu uni bukukënu tsótax kuai sharati kuënkënkin rairi ësakin ꞌakësa ꞌikën.17“Nun paka banokë ꞌaibi kamina mitsux kuë́ëni chirinkëma ꞌain; nukama anun masá sinanti kantakëbëbi kamina mikama masá sinani inkëma ꞌain”.18Usa ꞌain ka Juan an pikëma, xëakëma a ubaxa a kupin kamina ki an ka ñunshin ꞌatimañu ꞌikën.19Unin Bëchikë ka ubakëxa an ka piana xëaia, unikaman ka kia: ꞌIkëbi ka unikama pikëntapu ꞌimainun xëairakë ꞌimainun bëtsi uni ꞌuchañu an kuríki Romanu buanti bikë abë ka nitsia kixun kaia. ꞌAibi ka Diosan kushi ꞌakë ñukama iskë ꞌia.20Usakin katankëxun ka, Jesusan anuxua unin ꞌakëma bëtsi ñu ꞌakë a ëmakamanu ꞌikë unikama kakëxa, uisa kupin kaina Diosmi sinánakëma ꞌain Jesusan kakëxa:21—¡Anu ka Corazín ëmanu ꞌikë unikama! ¡Anu ka Betsaidanu ꞌikë unikama! Tiro, Sidón anuxun ꞌën kushin unin ꞌakëma ñu ꞌakë ꞌain ka anu ꞌikë unikama Diosmi sinánati, aín ꞌuchakama kupí masá nuituti chupa ninxa pañuanan chimaputan matakakikë ꞌitsianxa. 22ꞌAibi kana mitsu kain, anunmi tëmërati nëtë ꞌikëbë ka Tiro, Sidónu ꞌikë unikama ꞌikësamaira mitsun tëmërati ꞌiti ꞌikën.23Mi Capernaúm, ¿Min karamina naí manamira ꞌisa tanin? ¡ꞌImainun me kini ꞌukëmëuira nukúti ꞌain! ꞌAibi ka Sodomanuxun unin ꞌakëma bëtsi ñu ꞌaia ꞌiskë ꞌaish a ëmanu ꞌikë unikama bëribi anu ꞌitsianxa.24ꞌAibi kana mi kain anun mi tëmërati nëtë ka chaíira Sodoma ëmanu ꞌiasamaira ꞌiti ꞌikën.25A nëtën, ka Jesús ësai kiakëxa: —ꞌËn Papa Dios, mix naí ꞌimainun men ꞌIbu kupin kana mi rabin, min kamina an ñu ꞌunama unikama ꞌunamiana, an ñu ꞌunánkë unikamami umpukë a bana ꞌunamia.26ꞌËn Papa min kamina usai ꞌiti kuë́ënin.27ꞌËn Papa min kamina kamabi ñu ꞌë ꞌinan, uinbi ka aín Bëchikë ꞌunanima, aín Papan ishi ka ꞌunania, ꞌimainun ka aín Bëchikë naribi ꞌunania, ꞌimainun uikama kara aín Bëchikëna ꞌinantisa tania aín ꞌunamia.28Uikamax kara ñu mëi atsanxa ax ka ꞌënu uti ꞌikën, a kana ꞌën tantimiti ꞌain.29ꞌËn ꞌunamikë ñu kamina ꞌunanti ꞌain, ꞌimainun kamina ꞌënua ꞌunanti ꞌain, ꞌën kana upí sináñu ꞌianan ꞌën nuitu upí ꞌain, usaribi kamina mitsux ꞌiti ꞌain, usai ꞌi kamina tantiti ꞌain.30ꞌËn ꞌunamikë ñu ꞌimainun ꞌën papikë ñu ka tëmashi ubanti ꞌikën.
The Seed Company