1 Pedro2
1Usa ꞌain kamina kamabi ñu ꞌaisamakama ënti ꞌain, parananti, ꞌaisamoki sinankë, ꞌimainu bëtsimi banakë, kamabi këmëki bana ñuikëkama ënti ꞌain.2Uniakëxu bërí bakënkëna, xuma ꞌaisaira tanki barikë usaribi okin kamina bëru ñushin a, anun chaii ië́kë ꞌinuxun ꞌati ꞌain,3kamina uisaira okin kara nukën ꞌIbun nu nuibatia kixun ꞌunan.4Nukën ꞌIbu ꞌurama kamina uti ꞌain, maxá upí ꞌikëbi unin timakë a ka, Diosanbi kaiskin achúshi maxá kupíirakë ꞌimikë a ꞌikën.5Usaribi okin ka mikama Diosan maxá upíira ꞌimiaxa, anuxun Dios rabiti xubu bëru ñushi achúshi ꞌati, usaribi sacerdocio ꞌuchañuma, Jesucristo kupín bëru ñushin xarokësa Diosan iskë ꞌiti ꞌikën.6Ësai ka kuënëo banaribi kia: —ꞌËn kana Siónu achúshi maxá nanin a maxá ka bëtsi maxasamaira, kaiskë upíira ꞌai kupíira ꞌikë; ami katamëti kananuna rabintima ꞌain.7Mikama ami sinánkë, a maxá ax ka kupíira ꞌikën; ꞌaibi ka axa ami katamëkëma kama an ka maxá kuë́ëama ꞌikë, kuënëo bana kikësabi oi ꞌiti ꞌikë: —An xubu ꞌakë unian aisama ꞌikë rakan maxá ax ka bërí maxá kupíira ꞌikën.8Ënë bëtsi: —Maxámi tuaxki pakëti ka xaxumi ꞌiti ꞌikë. Atux ka a bana kuakëma kupí ami tuaxkia usai ꞌitioki nankë kupí.9Mikamax kamina achúshi aíntsi Diosan kaiskë ꞌai, achúshi sacerdocio an ꞌapu ñu mëxunkë ꞌianan, ëma ꞌuchañuma Diosan kaiskë. An ka aín bana ñuinun nukë kuëankëxa, bakishnua chikinki xaba upíira anu nu ꞌimiakëxa.10Bërama kamina Diosan unima ꞌiakën, ꞌaibi kamina bërí achúshi ëma ꞌain; ꞌaibi ka bërama nuiba ꞌixumabi Diosan mi nuibatia kixun ꞌunan.11ꞌËn nuibakë xukëantu kana mi abi kain, bëtsi unisa ꞌaín kamina ënë menu tsóta, usa ꞌain kamina unian ꞌakë ñu ꞌatima ꞌai tsotima ꞌai.12Mitsux kamina judioma uni ꞌatima kamanua upiti bukuti ꞌaín, usaimi ꞌia ka bërí ꞌatimakin mitsu ñuikë ꞌixunbi ka upiñu ꞌakëbëtan Dios rabiti ꞌikën, anúa an ꞌakë ñukama ñukáti nëtë ꞌitamainun.13Nukën ꞌIbu kupin kamina mitsun ꞌapukama bana tanti ꞌain, amia kushikë ꞌapuíira aín banaribi kamina kuati ꞌain,14ꞌaibi ka aín kushikama an ñu ꞌatima ꞌakë unikama tëmëramiana upí ñu akë unikama nuibanu xutia.15Diosan ka mitsun upí ñu ꞌati kuëënia, uni ñu ꞌunamakama ꞌimainun ñusmakama, mitsu ꞌatimaki ñuitima kupin.16Uni upí ꞌai kamina upiti bukuti ꞌain, ꞌaibi kamina ñu ꞌatima ꞌakë ꞌaishi ñu upí ꞌakësa ꞌitima ꞌain. Usai ꞌima kamina Dios ñu mëxunkë ꞌíkësa oishi bukuti ꞌain.17Kamabi kamina upiokin kati ꞌain. Kamabi xukëantu kamina nuibati ꞌain Dios, ribi kamina upiokin kati ꞌain ꞌapuíira kamina nuibati ꞌain.18Mix unin ñu më́mikë ꞌixun kamina, kuë́ënkin ax kikësabi okin ꞌati ꞌain, nuibanankë upí uni ashima, ꞌatima uni aribi kamina nuibati ꞌaín.19An ka Diosan kuë́ënkë ñu ꞌikë, nuxnu ñu upí ꞌaibi tëmëraki tënëkë ax ka aina ꞌikën.20Mitsu ka ñu ꞌaisama ꞌaia tëmëramiaxa. ¿Usa ꞌikë kara uisokin asabi ka kixun paë tënëiabi kati ꞌik? Usa ꞌaibi ka ñu upí ꞌakin paë tënëia Diosan iskëx asabi ꞌikën.21Diosan ka tëmërakibi tënënu nu kuëanxa. Usai ribi ka Cristo nu kupin tëmërakëxa, nuxnu usaribiti ꞌiti kupin.22Cristo ax ka ꞌuchama ꞌikë, ꞌianan ka uibi paráma ꞌikën.23A chicha këxubi ka uisokibi chichama ꞌikën; të́mëramikëxubi ka kupiama ꞌikën, an ka kamabi Diosan mëkënuishi ë́ankëxa, an ka mënioti ꞌikë kixun.24Cristonënbi ka aín naminu nun ꞌuchakama curuznu ubankëxa, nuxribinu nun ꞌucha kupí bamakësa ꞌai ië́tankëx upiti tsonun, ka Cristo ꞌatima okankëxa, mitsuxmi ainan ꞌaish pëxkúkë ꞌinun.25Mitsux kamina bërama oveja nëtëkësa ꞌaish niakën, ꞌaibi kamina bëri Cristonëa aín ñuina bëruankë unisa ꞌixun bëruankë ꞌain.
The Seed Company