Manitanati Tuparrü oemo turuquiti Aütorrti
1Tücañe arrti Bae Tuparrü manitanati nantarrtai ümo bama primero uyaütaiqui. Aruqui nanaiñantai ñanitacarrti ümoma uturuqui bama profetarrü.2Tapü arroñü tusaca au ba tacürurrü naneneca. Au ba naneneca manitanati Tuparrü oemo turuquiti Aütorrti. Ui yacüpucurrti Tuparrü isamutenti Cristo na cürrü y napese y nanaiña arrüba abe. Itacümanauncunutiti Aütorrti, itopiqui rranrrti aitorrimiati ümoti üriacaboti ümo nanaiña.3Arrti aütorrti Tuparrü ane nanentacarrti isiatai tacana nanentacarrti Tuparrü. Nacarrti isiatai tacana nacarrti Tuparrü. Uiti te Cristo abe nanaiña arrüba abe, y ui nurarrtiatai urria nubacarrü hasta caümainqui. Nuno chauqui tirrimiacatati nomünantü osoi ui niconcorrti, süroti tato au napese. Atümoti au nepanauncurrti Bae Tuparrü, naqui ane yarusürürrü nüriacarrti.Manrrü nüriacarrti Cristo pünanaqui bama angelerrü
4Arrti Jesucristo, naqui Aütorrti Tuparrü iyebo uiti nauqui ane manrrü nüriacarrti pünanaqui bama angelerrü, itopiqui torrio ümoti arrüna manrrü yarusürürrü cargorrü.5Itopiqui arrti Tuparrü nanti ümoti Cristo sane:Arrücü isaücü, arrüna nanenese itorrimiata asüboriquibocü.Pero ümo bama angelerrü chüsanempü nurarrti Tuparrü. Nantito Tuparrü ümoti Cristo naqui Aütorrti sane:Arrüñü Yaütoti Cristo, y arrti tonenti Isaü.Pero ümo bama angelerrü chüsanempü nurarrti Tuparrü.6Numo tüsaiyapae aicüpurutiti Tuparrü naqui tamantiatai Aütorrti icu na cürrü, nanti sane:Namanaiña bama angelerrü tari ñanaunnama ümoti Isaü.7Tapü ümo bama angelerrü nantü sane icu Nicororrü:Arrti Tuparrü bacüpuruti ümo bama angelerrü, bama baserebio ümoti, nauqui aüromatü tacana maquiütürrü y tacana pese.8Tapü ümoti Cristo naqui Aütorrti Tuparrü ane quiatarrü manitacarrü corobo. Natü sane:Arrücü Tuparrücü.Chüpuerurrüpü atacüru nüriaca.Arrüna nüriaca ümo macrirrtianuca urria nurria.9Apucünunca icuata arrüna urria, tapü nomünantü churriampü aemo.Sane nauquiche arrti Bae Tuparrü, naqui ümoche aserebiquia, itorrimiatati manrrü apucünuncubucü pünanaqui namanaiña bama acumpañeru.10Nantito sane icu Nicororrü:Arrücü Señor, auqui maübo omirriante obi cürrü y napese.11Tonehio butacürusuiqui, tapü arrücü champü nitacüru naca.Nanaiña tiene que amameso tacana rroparrü pooma.12Acomorabo obi na cürrü y napese tacana cüburrirri, y mocampiabo.Tapü arrücü chücampiabopü naca, y chüpuerurrüpü poomacü.13Arrti Bae Tuparrü nantito ümoti Cristo:Atümo auna nepanauncu niñe, cheperrtü cuamatü sobi aesacü bama tüboricatai aemo.Sobi caüma bachesoiyoma aesacü, nauqui aiñanaunumacü.Tapü ümo bama angelerrü chüsanempü nurarrti.14Suraboira baeta isane nacarrüma bama angelerrü: Tonema bama espíritu baserebioma ümoti Tuparrü. Arrti bacüpuruti ümoma, nauqui ayurama oemo, bama taesüburu eanaqui nomüantü.