Sakaríasi9
Labeichún ageiraü le burí yarafabei
1Anihán uganu le lasubudirágüdübei Wabureme, luagu labeichúba lan ageiraü le Adürákü luma uburugu Damasüku. Dandu luburugute burí Siria, kéigubeirügü sun lani Ísüraeli türibu yuuti lun Wabureme.2Lani giñe Amatü, le fadagubei luma uburugu burí ligía, Tiru luma Sidón.3Bunaguati Tiru iderebugu, óundaragua ligía golu luma pülata kei lóundarawagun múa.4Gama lumoun lagidarubei Wabureme súngubei luéi, ábame lachagaruni lirisin baranahoun, ábame láguduni uburugu sunsuinagubei.5—Danme le larihini uburugu Asükalón katei le, labuinchuba lau anufudei. Lasufuriruba giñe Gasa saragu, lerederuba lemenigin Ekürón múarugu. Lóunweba lurúeite Gasa ánheinti Asükalón ábame lerederun málouga.6Laganóuba aban rasa mígisiguati Asüdódu, ítara luba nǘnabudagüdüni hapantan Filistéana.7Nagidarubei úi gaganati hitaü le héigibei hayumulugugiñe gidanéime éigini le moun lubéi leigin hárirugugiñe. Gama lumoun ñéinbaña hádangiñe gürigia hagía erederutiña nun; hayabinba lun líbiribaña lan Hudá, ítara luba Ekürón kei Hebusuna.8Aranseñu nuba lun nageindagun haweigiñe nánigu hagibugiñe furumiñeguarügü ha ásügürütiña yáagiñe. Mamudiragun láañame leha amudiragubaliña, lugundun lau nagu guánarügü nóunigira guentó.Lurúeite Ísüraeli le lunbei liabin
9Gundaaguabá saragu, uburugu Sión! Beremuha lau ugundani, uburugu Herusalén! Ladüga anite burúeite bun, richaguabei, anite lau saragu agañeiruni, gama lumoun lau ǘnabuguni, wariñu luagu aban burigü, luagu aban liraüraü burigü.10Lagünrinchaguboun likarün burí Éfürain, gabayu Herusalénna tuma burí gimara lánina wuribu. Ladügüba lun haganóun néchanigu lidan darangilaü, lagumadihaba lídangiñe aban barana lidoun aban, lúmagiñe Éufüratesigiñe, darí lumoun lagumuhóun larigei ubóu.Lararamawagüdünya Ísüraeli
11Lariñahare Wabureme: «Herusalén, luagu lita bidaradun, Nasagarubaña bánigu lídangiñe fulasu le ñein lubéi hadaürǘwa, fulasu le ítarabei kei fusu madunariti.12Huguya adaürǘtiña ha hemenigibaña, giribu humá lidoun hiderebugu! Nariñahare hun luagu nabinirubadün lan bián wéiyaasu luéi le hasufurirubei.13Ladüga seti naali Hudá kei tebu nigimaran ani runéi Éfürain kei gimara. Nadügüba aban eféin bau, Sión, nageindaguagüdübaña birahüñü hama lirahüñü Güresia».14Larufudaguba Wabureme lungua hawagu lumutuniña; lachüühaboun ligimaran kei labirihaniga. Línwinruboun Wabungiute fidu, ábame lawanserun labadinagua luriban dan le luéigiñeti suru.15Lóunigirubaña Wabureme Suntigabafu lánigu, hadügüragubei hadübüri achamuragutiña dübü tau chilinchádi, áfaragua hamañame háganiñu; hátubei hata háganiñu kei diwéin darí habuinchun kei bésini, kei liganchun latarü.16Lídanme weyu ligía, lesefurubaña Wabureme lumutuniña keisi mudún, ábame wéirigu hamá lidan hageira keisi dübü burí gebegiti le luágubei ridi.17Mámame lubuidun ageiraü! Buídubei haweinamudun irahüñü ñein ladüga gíbeboun lan türigu tuma diwéin ñein.Bible Society of Honduras