Sakaríasi14
Aburemei, Lurúeite sun ubóu
1Aniteeli luéyuri laguseragüdüniña Wabureme sun néchanigu. Ábameti lárügüdüniwa uburugu Herusalén, afanreinha hameime láganiñu sun le hadarirun lidan.2Wéyume ligía, lóundarubaña Wabureme sun néchanigu lun hageindagun luma Herusalén. Ábame hagañeiruni burí uburugu, hasagarahabóun burí haban, háguragubaña hámarigu, ábame hanügüniña hamidan lílana fulasu adaürǘwa, hárügübaña híbiri eredera fulasurugu.3Gama lumoun lárigiñe ábame lageindagun Wabureme hama néchanigu hagía, ítara kei lageindawagun lidan luéyuri wuribu.4Wéyume ligía, ladagaragüdübei lugudi ligibuagu wübü Oliwu le luéigiñebei oubaü le ñéingiñe lubéi laboucha weyu libiti Herusalén. Ñeinbei aban óunwenbu fulasu wayati luéigiñe oubaü le ñéingiñe lubéi laboucha weyu luagun le ñeinhin lubéi lálüda, ábame lafanreinraguni wübü Oliwu lidan biama. Ábame ladiñurun lamidan wübü luagun nórute, lamidan luagun suru.5Huguyati ábame hanurahan luéigiñe fulasu wayati ligía le lunbei lerederun labadinagua wübü, lachülürüba fulasu wayati ligía darí Asalü, luéigiñe le aban oubaü. Hanurahaba kei meha hanurahan hagüchagu luéi hárabaganali le adagarubei dan meha le larúeihan urúei Usíasi Hudá. Ábame liabin Aburemei le Nubungiute hau sun lánigu úara luma.6Wéyume ligía úabei lidiliga.7Ábanbei weyu le úati libe, Wabungiuterügübei asubudirei. Lidan weyu ligía, ibidiñewabei wéyuagu lumoun áriebu, ladüga harugoungamémebei íbini áriebu.8Ábameti léibaagun duna diliti Herusalén, lidan sun irumu, lamidan lidoun barana Hilaali, lamidan lidoun barana Mediteraniu.9Weyu ligía, larúeihaba Wabureme lidan sun ubóu. Ligíarügübei Bungiu, hagúarame súngubei lun Aburemei Suntigabafu.10Liábinba fulasu lun ábanbei lan fulasu mawübüriti, lúmagiñe Geba darí Rimón luagu suru libiti Herusalén. Lídanbei fulasu íñuti Herusalén, ñéinbaña aganóutiña lúmagiñe luéigiñe lubenari Benhamín darí lumoun lubenari Kaaná, le meha ñein lubéi binadu bena; luma lúmagiñe luayelesin Ananéli darí lumoun laribichaguagüle urúei garaba.11Haganóuba gürigia Herusalén, magünrinchawagúnhalime. Haganóuba lílana ñein lau achoururuni.12Ánhañati néchanigu ha ageindagubaña luma Herusalén, labeichubaña Wabureme here; lañaladuba hágürügü móunwenga hagía, ñalame hagu lidan lagei, ñalame hañeñe hayumulugu.13Labuinchagüdübaña Wabureme lau anufudei weyu ligía. Lárügüdübei kada aban lúhabu lupaaná, hiñurubei háhabu aban luagun le aban.14Ábame giñe lageindagun Hudá Herusalén, ábame hanügün saragu irisini, pülata, golu tuma daüguaü hawéi néchanigu ha yarafabaña.15Abeichúni lememe lunbei lábürühan hawagun gürigia, lábürühaba giñe hawagun gabayu, mile, kameyu, burigü hama sun animaalugu ha hámatiña áganiñu tidan hakianpun-agei.Láhudurawagun lun Bungiu Herusalén
16Lárigiñeme le, sunme gürigia ha erederutiña wínwanñu hádangiñe ha ageindagubaña luma Herusalén. Hóudiba sagü irumu áhuduragua lun urúei le Wabureme Suntigabafu luma efeduhei tufedun dibasein.17Ha néchanigu ha mídintiña áhuduragua lun urúei le Aburemei Suntigabafu, máhuyunbei huya luagun hamúan.18Ánhaña giñe midin Ehiptuna, labeichubaña giñe Wabureme ítara kei labeichuniña furumiñeguarügü néchanigu ha mídintiña efeduhei tufedun dibasein.19Ligíaba abeichúni le lunbei lábürühan luagun Ehiptu luma hawagun sun néchanigu ha mídintiña efeduhei tufedun dibasein.20Lídanme weyu ligía, íbini hawagu gabayu bürüwañu luba: «Anuadirúati lun Wabureme». Sagüráubei buriti tisoudieruna ténpulu kéigubeirügü giñe burí kopu wéinamuti le ligibugiñebei latarü.21Sun sóudieru le Herusalénbei luma le Hudaabei anuadirúañu luba lun Wabureme Suntigabafu. Hayusurubei ha ñǘdüntiña adüga adagaragüdüni lun hábouguni úi le lunbei hadagaragüdüni lidan. Wéyume ligía, úaañame alugurahatiña hama agañeihatiña litenpulunrugu Wabureme Suntigabafu.Bible Society of Honduras