Sakaríasi11
Hagañeiruniwa urúeigu ha wuribabaña
1Líwanu, darabei bubenari, gudalei watu gemeti bani hibúari!2Bayahua lídibu gudi, lugundun heigua hibúari, günrinwagua tídibu wewe buíduburiti lügüra! Hayahuaha, tídibu wewe Basanna, lugundun wasa dabíara hilumati!3Hagúaraha ayahuaha, hóuniri mudún, lugundun úaali sagadi lun heigin mudún. Aganbúati ladürürühan liñún, lugundun günringua linadüri Hordán.Biama hóuniri mudún
4Lariñahare Aburemei le Nubungiute nun:—Góunigibaña mudún ha lúnbaña háfarawagun.5Áfaragua hamutiña ha agañeihabaliña masandiragunga hagía houngua lau duru, hariñagati ha alugurahabaña: “Seremei niña lun Wabureme, rísihadina!” Magudementiña ni íbini houn hóuniri.6Ítara luba giñe, magudemedunhaña lan gürigia ha aganóubaña lidan ageiraü le nun, nederegeraali kada aban hádangiñe lúhaburugun gürigia líledi luma lúhaburugun lurúeite, ábame hagünrinchaguni ageiraü, ani mesefubadina ni aban háhaburugugiñe. Aburemei ariñagubalin.7Ábati níchaagun nungua óunigiraña mudún ha lúnbaña hafarún. Luéigiñe hóubadina ha agañeihabaña nadügei. Aba nanügün bián badun aba níchugun liri aban, «Areini» le aban «Óundaruni».8Lidan ábanrügü hati, bugatina ǘrüwa hóuniri mudún ladüga hagumuchagüdüni nuguraasun ani iyereegutina houn.9Aba nariñagun houn mudún:
—Mámadigiaadina húniri! Anhoun ounwe aban hídangiñe, hilata! Anhoun afarúa aban, afaruatá! Hámeti erederutiña héigaguame houngua!10Ábati nanügüni nubadun le gíribei «Areini» aba náhalachaguni arufudei luagu málaali lan daradu le buga ladügübei Wabureme hama sun gürigia.11Aba málaali lan daradu lidan weyu ligía, aba gunfuranda hamani agañeihatiña mudún ha aríagubaña nun weyu ligía luagu Wabureme lan adimurehabei lau katei le nadügübei.12Ábati nariñagun houn:
—Anhaün gagundan, fayei humana, anhaün magundan, rédeila ítara.
Aba híchugun darandi murusun pülata nun.13Aba lariñagun Wabureme nun:
—Barübei seinsu le, lubuidun fáyeiti le híchugubei nun, rubei lidoun tiseinsun ténpulu.
Aba nanügüni, aba níchuguni lidoun tiseinsun ténpulu.14Lárigiñe aba náhalachaguni le aban badun le gíribei «Óundaruni», ítara liña lagünrinchagun iduheguaü hadan Hudaana hama Ísüraelina.15Lariñaga Wabureme nun:
—Guentó, rúguaba bungua kei aban hóuniri mudún le meberesenti lau ni kata.16Ladüga níchiga aban hóuniri mudún le meberesegúnti hau mudún lidan fulasu le, meberesegúnbei tau mudún to acharagadutu, máluahan lubóun to eferidirutu, magaranihan ligíame tun to sánditu, méigagüdün to débilitu, hóurügü lubaña ha dibunetimabaña mígirunga ni kata hádangiñe.17Fugiabu hóuniri mudún le móuniti, le meberesegúnti hau mudún. Tábürühaba eféin luagun larüna luma luagun lagu le lóunwenren! Lerederuba larüna deregüdañu, marihínme lagu le lóunwenren sunsuinagubei!
Bible Society of Honduras