Sálumu79
Igarigu luagu lagünrinchawaguniwa Herusalén
1Bungiu, beluhaña gibe tubungiutegu lidoun bibürürün, adügaaña iwiyei tidan buban to sánduboun, ru hamaali Herusalén lidoun günringuaü!2Ru hamaali hágubu bubueingu, ha meha gúnfulibaña buma, lun héiginiña wadubi, hama animaalu áraabuna!3Áwiyugüda hamaali hata kei duna lidan sun Herusalén, ani úatiña kaba lan ábunaña!4Héheraagüleñadiwa wabesinanigu; héheraagüle sun ha geyegubaña wau.5Aburemei, ídaba san lagumucha bigañi? Legemechuba san bigañi kei watu gemeti súnwandan?6Rariguagüdabei bigañi hawagun gibe tubungiutegu ha ibidiñehabubaña bun, magúahan hamabu!7Ladüga hagía, günringua hamuti Hakobu ígira haméi fulasu lidan günringuaü.8Mafayeiragüdabawa luagu hariban wagüchagu. Ñǘbuinla bugudemehabu wabaroun furese, ladüga buchá wawagu!9Bungiu, wesefuragüle, íderaguabawa, sefubáwa ferudunabáwame, luagu luéirigun biri!10Mariñagun hamaamuga gibe tubungiutegu wawagu: «Hagéi san Habungiute?» Ígiraba lun warihini hafayeirun luagu háfarawagun eseriwidutiña bun! Subudi haméi giñe gibe tubungiutegu!11Tenibá lun hafuledein adaürǘtiña, sefubáña lau bubafu ha siádiwaañabaña lun hounwen.12Aburemei, fáyeigüdabaña wabesinanigu sedü wéiyaasu luagu hanabagunibu;13wagíameti ha bánigu, wagía ha bilügüniña mudún, seremei wabadibu súnwandan; weremuhaba bun gumugua dan.Bible Society of Honduras