Sálumu56
Afurieiduni lánina emenigini
1Gudemená bun Nubungiute, ladüga añahein gürigia éibaahatina, súnwandan hábürühaña nuagun aba hasufuriragüdünina.2Súnwandan héibaahañadina náganiñu, gíbetiña ha ábürühabaña nuagun lau pantaü.3Buagu nemenigida, lidan nanufude.4Hemenigitina luagu Bungiu alawahanei lererun: Hemenigitina luagu Bungiu ani manufudetina. Kábagia gayara hamá gürigia adüga nau?5Súnwandan habuleseirunina lau hererun; luágurügüñein hadügün wuribani nun hasaminara.6Heredera aramudagua lidan sun fulasu asigirei nugudárigi, agurabei dan lun háfarunina hilagubei.7Hesefuruba funagia luéi hariban guánarügü? Bungiu, ǘnabugüdabaña gürigia lau bigañi.8Abahüdeinabiñalin nanurahan; budá bumuti kada aban lídangiñe náguira. Odi mabürüdün bumuti funagia tidan biliburun?9Héibaaguba náganiñu danme le namuriahan ídemuei buma. Subudi numuti buidu luagu númagiñeñein lan Bungiu.10Afiñetina luagu Bungiu ani alawahanei lererun, afiñetina luagu Nabureme ani alawahanei lererun.11Afiñetina luagu Bungiu ani manufudetina, kábagia gayara hamá gürigia adüga nau?12Füramasei le nadügübei bun, Bungiu, nagunfulirubei buma lau burí eremuhani.13Ladüga sefu báadina lídangiñe óunweni, sefu báadina luéi néiguadun, lun néibugun lidan larugounga ibagari, lidan liñúarü Bungiu.Bible Society of Honduras