Sálumu36
Hariban gürigia luma lareini Bungiu
1Adimurehati wuribani houn ha salufuribaña lidan tilulin-agei hanigi. Maritaguntiña luagu lunti lan inebewa lan Bungiu.2Haritaguatiña luagu garicha lan lun ladimurehóuniwa buidu hawagu, darí lun marihin hamani luagu mabuidun lan le hadügübei.3Wíyeti hayuma, marasualugutiña, féridi hamaali hachügü ígira hamaali ladügǘn buiti.4Aransehatiña hadügün wuribani dan le roun haña lan tidan hagabanan; wéiriti híchaagun houngua lun luriban hémeri, darí lun maha hamá hígiruni wuribani.5Ánheinti bínsiñehabu, Aburemei, chülüti dagá sielu; chülüti búaragun chülǘ lumoun burí lidingun sielu;6ítara liña biricha kei burí áraabu le wéinamubei, ítara liña burí bererun kei lilulin barana le wéiribei, buguya Aburemei, góunigi bumutiña gürigia hama animaalugu.7Lubuidun san bínsiñehabu Bungiu! Aramudaguatiña gürigia lábugiñe barüna!8Gufurumatiña le tímatimaati lau éigini gíbeti, le tídangiñebei buban; guragüda bumutiña lídangiñe aban duna semeeti.9Ladüga bídanñein lubuñe ibagari, gayaraati warihini larugounga lidan bigemeri.10Rubei bínsiñehabu luma biricha súnwandan houn ha subudihabúbaña bun, luma houn ha buídubaña isaminan.11Mígiraba lun hadügüragunina ha barüguabaña houngua, ni lun háfarunina ha salufuribaña.12Ariha humá lun hábürühan wuribatiña! Ábürühatiña, lun másaarundigiaaña lan!Bible Society of Honduras