Sálumu18
Aban uremu lánina agañeiruni
1Nabureme, buguya nérebei; hínsiñetibu nun!2Buguya óunigirubalina, naramudaguagüle, nesefuragüle, Nubungiute, dübü le gayaraabei naramudagun lanagangiñe, nidaüdina lauti gürabu, ubafu le esefurubalina, liñun-agei naramudaguagüle.3Nabureme, gadünatibu uéiriguni, dan le nagúarun bun, sefu bumutina hawéi náganiñu.4Dahigua lumutina óunweni lidan lugurudun; sanditina anufudei ligibugiñe lanarime gagünrinchaguaditi.5Hóuburagua lumutina óunweni lidan lugurudun; sandiguatina nungua tidan burí sádara lánina óunweni!6Lidan násiñaragun nungua, wátina lun Nabureme; amuriahatina ídemuei luma Nubungiute, aba laganbunina lúbiñegiñe; chülüti nagúaragun larigeirugun!7Ábati ladagarun aban hárabaganali héreti: Aba lánhingichunga wübü lúmagiñe lugudina; hingí lumuti burí ligañi Aburemei wübü.8Furiti gumuleli lígirugugiñe, furiti watu gemeti le gagünrinchaguaditi luma eñeguraü durunguati liyumulugugiñe.9Dará lumutu likorutinan sielu, aba lararirun. Ñeinñein burí huánriñu wuriti lábugiñe lugudi!10Aba lawarirun luagu aban katei garünati, aba láhamarun, aba lidin ligibuagu larüna garabali.11Aba laramudagun lidan lueirin luburiga le geyegubei lau, luma burí huánriñu wuriti le buinbei lau duna.12Aba láfuridun aban labirihaniga le ñéingiñe lubéi; aba lábürühan lúbara huya dereguati luma garubun gemeti dúerirugugiñe.13Aburemei, le Íñugutimabei, aganbagüda lumuti lumalali le wayuhuru siélugiñe: Lúbara huya dereguati luma garubun gemeti.14Chü lumuti labirihaniga kei gimara, aba léibaaguagüdüniña náganiñu lau chagaguaü.15Rédeiti lábugiñe barana furangu, arihúati burí lebu ubóu, ladüga lumalali Aburemei le asiadihabei, ladüga áfuruni héreti le ladügübei.16Tulé lumuti Bungiu lúhabu nun íñugiñe, aba lasagarunina lídangiñe lueirin barana lau lúhabu.17Sefu lumutina hawéi áganiñu gabafutiña, ha iyereehabúbaña nun, ani ha héretiña sügǘ nau.18Ábürühatiña nuagun dan meha le lídanñadina lamiselu, gama lumoun íderagua lumutina Nabureme:19Sefu lumutina luéi denchaü; sefu lumutina ladüga nínsiñe lun!20Ru laali Nabureme lafayeiruaha laruman nigaburi nun;21ladüga falá naali lémeri Nabureme; Meyeedagungidina lau Nubungiute22Subudi numuti sun lilurudun; mamaharungidina lun nagunfuliruni lugumadin.23Éibugaadina ligibugiñe lidan arumani, díseedina luéi wuribani.24Rúhali Nabureme nafayeiruaha luagu laruman nigaburi ligibugiñe.25Buguya Aburemei, gúnfulitibu hama ha gúnfulibaña, úaragua buguya hama ha úaraguabaña.26Harumatibu hama ha harumabaña, gama lumoun deretibu hama ha salufuribaña.27Sefu bumutiña ha ǘnabubei hanaagun houngua, gama lumoun ǘnabugüda bumutiña ha barüguabaña houngua.28Buguya Nabureme, rútibu larugounga nun; harugoungadagüdatibu nau lidan luburiga.29Nageindaguba luma nágani lau bídehan, násügürüba luéigiñe lubarieirun luburugute.30Suruti lémeri Bungiu, gadünati lererun Aburemei lun lemenigidun luagu; góunigi lumutiña Bungiu sun ha afiñebaña luagu!31Ka Búngiubei bóugudin luéi Wabureme? Ka amu bungiu gayaraabei lóunigiruniwa?32Bungiu íchugubei erei nun, ligía adügübei lun haruma lan nigaburi,33furesegüda lumuti néibugun kei usari, ru ligía iderebugu nun lidan liñun-agei wübü,34ligía aranserubalina lun wuribu, ligía íchugubei erei nun lun nederaagüdün tebu gimara to lautu buronse.35Góunigi bumutina ani sefubána. Ágüdaha bumutina lau búhabu le bóunwenren, awansegüda láadina bareini.36Mérengugüda bumuti némeri, sefubéi néibugun lun miriraagun lan nugudi.37Éibaaha numutiña náganiñu, ani ragǘ numutiña, aba nagiribudun lárigiñe náfaraguniña.38Amurusuha numutiña, aba másaarundigiaaña lan. Ábürühatiña lábugiñoun nugudi!39Rútibu erei nun wuriburugu; adügatibu lun habuluchagun wuribatiña nigibugiñe,40Adügatibu lun hanurahan náganiñu nuéi. Ítara liña nagünrinchaguniña ha iyereehabúbaña nun.41Amuriahatiña ídemuei, ani úati íderagutiña; agúahatiña lun Aburemei, ani móunabun lumutiña.42Mulili numutiña kei kaliki le lanügün garabali! Dügügua numutiña kei gubegubeti ǘmada!43Sefu bumutina hawéi gürigia wuribatiña, adüga bumutina lun hábuti nan néchanigu, seriwi hamana gürigia ha buga ibidiñetiña nun.44Lidan haganbunina, aba hadügüni le nubeibei; gúndaatiña gürigia terencha nau.45Hanufudeguatiña gürigia terencha, aba háfuridun adadagareina lídangiñe haramudaguagüle.46Wínwanla Nabureme Bungiu! Alawahoualá le óunigirubalina! Iñurualá Bungiu le Nesefuragüle!47Ligía Bungiu le ageindaguaalibei nuéigiñe, le íchugubaliña gürigia lábugiñoun nere.48Sefu lumutina luéi hagañi náganiñu, hawéi wuribatiña ha iñuragubaña houngua nuagun. Nabureme, sefu bumutina hawéi wügüriña hanarimetiña!49Ligía níchugunbei uéiriguni bun haganagua néchanigu, eremuha au uremu lidan biri.50Rútibu burí agañeiruni wéinamuti lun urúei le banúadirubei, súnwandan bóuseruni Dawidi lau ínsiñeni hau sun ladügawagun.Bible Society of Honduras