Sálumu144
Leteingiruni aban urúei Bungiu
1Alawahoualá Aburemei, le óunigirubalina! Ligía aranserubalina lun nageindagun wuriburugu;2ligía numadabei le gúnfulibei, ligía óunigirubalina, ligía liñun-ágeibei naramudaguagüle, ligía nesefuragülebei; ligía nidaüdinabei le lauti gürabu, lau nadouragua naugua; ligía íchugubaliña lílana fulasu lábugiñoun nugumadin.3Aburemei, Kátañanu san wügüriña, basaminarunbei hawagun? Kátañanu san gürigia, lanarimebei hínsiñe bun?4Ítara haña gürigia kei aban awaraguni; ítara liña habagari kei lásügürün lamuñounga.5Aburemei, daraguabei sielu, rariba, guruba luagu burí wübü lun lígiragüdün gumuleli;6chüboun bigimaran to labirihaniga, ani anuraagüdabaña báganiñu lau chagaguaü.7Tulebei búhabu lúmagiñe íñugiñe, sefubána luéi lueirin barana; sefubána luéi habafu gürigia terencha,8hawéi ha ariñagubaña iyeeni iñura haméi hóunwenren lun háfiñurun marasualugu.9Nabureme, neremuhaba aban iseri uremu bun; neremuhaba uremu bun tau sun tuwuyeri árüpa.10Buguya, le agañeiragüdübaliña urúeigu, buguya, le esefurubalin Dawidi, sefubána tuéi eféin gáfarahatu; sefubána luéi habafu gürigia terencha, hawéi ha ariñagubaña iyeeni iñura haméi hóunwenren lun háfiñurun marasualugu.12Wéinamutiña warahüñü kei nadü lidan fuluri-agei; ítara haña warahüñü würiña kei wagabu, le ágüdahabalin túgubu luban Bungiu.13Buin liña burí lagei ilaü, buin liña lau sun luwuyeri éigini. Gánwounguatiña wabiñanigu saragu, milu míluñanu wacharirugu.14Dageinatiña walügüniña bágasu, ani mameilihantiña lubaragiñe hadaani. Úati agúaraguni lánina idiheri lidan burí wémeri.15Fuleseiwatiña lílana fulasu ha abagaridubaña ítara! Fuleseiwatiña lílana fulasu ha Búngiubei Habungiute!Bible Society of Honduras