Sálumu139
Subudi lumuti Bungiu sun katei
1Nabureme, ariha báadina buidu ani subudi bumutina;2subudi bumuti sun namufurun; íbini dísegiñe, gefentibu luagu le nasaminarubei.3Subudi bumuti sun némeri, subudi bumuti sun le nadügübei!4Úagi yebe dimurei tuagu niñeñe, ani subudi baali, Nabureme.5Geyegua báadina luéigiñe sun oubaü; ani góunigibana lau bubafu.6Díseti lueirin lichú bau nuéi; wéiriti liñun, darí lun siñá nani gunfuranda!7Haliñounba hamuga san gayara lan nidin dise luéi bani sífiri? Haliñounba hamuga san nanuraha dise luéi barihin?8Ánhana amudeira iñun sielun, abunhein ñein; ánhana ararira lábugiñoun múa, abunhein giñe ñein;9ánhana hamuga áhamara luagun labouchagüle weyu, odi ánhana lan aganóua lidan lébeha barana le ñeinhin lubéi lálüda weyu,10íbini ñein ladundehañadina hamuga búhabu; íbini ñein lágüdahañadina hamuga búhabu le bóunwenren!11Ánhanadügü hamuga aritagua naramudagun lidan luburiga, odi aba hamuga lasaliragun larugounga le geyegubei nau luburigame,12maramudun lubadina yebe luburiga buéi; harugoungati hamuga áriebu kei larugounga wéyuagu; ligiaméme luburiga bun kei larugounga!13Buguya adügübalin sun núgubu; buguya adügübalina turageirugu núguchu.14Alawaha numutibu, ladüga wéiritu nanigi, ladüga wéiriguti katei le badügübei. Chouru numuti lira!15Maramudagunti lafaragadagun núgubu buéi sun meha nadügǘnbei aramudaguarügü, sun meha nadügǘnbei lidan lilulin-agei múa.16Ariha lumuti bagu ladügǘn núgubu; bürüwañu liña meha sun le tidan biliburun. Arufuda baali meha átiribei lan dan nabagaridun dan meha le miábingubeigidina ubouagun.17Bungiu, huliliti bisaminan nun; mébehati súngubei!18Ánhana hamuga abusenra nabahüdüni, gíbeti hamuga sügǘ lau sagoun; ani ánheindügü hamuga ásura nabahüdüni, anahamémegua hamuga buma.19Bungiu, gidabei habagari wuribatiña, dísegüdabaña gáfarahatiña nuéi,20ha adimurehabaña wuriba buagu, iñuragua hagía houngua buagun.21Nabureme, ma funagia iyereegutiña ha iyereehabúbaña bun nun, mínsiñe ha iñuragubaña houngua buagun nun?22Iyereegutiña nun tau sun nuani! Barǘ numutiña kei náganiñu!23Bungiu, arihabána, arihabóun nanigi; hóuchaguabana, subudibéi nisaminan;24arihabá anhein luáguñadina lubéi lémeri wuribani, alidihabana luéigiñe üma magumuchaditi.Bible Society of Honduras