Sálumu115
Anihein Wabungiute sielu
1Aburemei, ruba uéiriguni búniwagua, mama woun; ruba uéiriguni búniwagua luagu bínsiñehabu luma binarün!2Ka san uagu hálügüdaha gibe tubungiutegu hagéi lan Wabungiute?3Anihein Wabungiute sielu; adüga laali sun le labusenrubei.4Golu luma pülata haguariuanbei gibe tubungiutegu, katei burí hadügün wügüriña lau háhabu:5Gayumatiña, gama lumoun siñati hadimurehan; gágutiña, gama lumoun siñati harihin;6garigeitiña, gama lumoun siñati haganbun; gágirugutiña, gama lumoun siñati hímichun;7gáhabutiña, gama lumoun siñati haguurun; gaguditiña, gama lumoun siñati héibugun; máfuridunti ni murusun umalali hagülerugugiñe,8kei guáriua hagía, ítarameme haña giñe ha adügübaliña hama ha afiñebaña hawagu.9Ísüraelina, afiñe humá luagu Aburemei! Íderagua lumutiwa, góunigi lawa.10Fádirigu, afiñe humá luagu Aburemei! Íderagua lumutiwa, góunigi lawa.11Huguya le inebehabubei lun Aburemei, afiñe humá luagu! Íderagua lumutiwa, góunigilawa.12Haritaguaali Aburemei wawagun, labinirubadiwa! Labinirubaña Ísüraelina, labinirubaña fádirigu,13labinirubaña ha inebehabubalin, wéinamuhaña hama ñǘbürigiña.14Gánwoungüdalaña Aburemei hadügawagun hama hadügawagun hirahüñü!15Rulei Aburemei le adügübalin sielu luma múa labiniragüle huagun!16Lani Aburemei sielu, ánheinti houn gürigia ru lumuti múa.17Ha hilaguaañabaña, siñaali heremuhan lun Aburemei;18ánheinti wagía, weremuhaba lun guentó luma súnwandan.Alawahoualá Bungiu!
Bible Society of Honduras