Ariñawagúni31
Lererun Lemueli
1Lererun urúei Lemueli, le Masaana le tarufudahabei lúguchu lun:2Niráü, lila nurageirugu, lóunabagüle Bungiu lun nayumuragun; ka amu gayaraabei nariñagun bun?3Mawesirabéi bere hama würiña, ladüga fériditiña urúeigu hadüga.4Mabuidunti giñe, Lemueli niráü, lun hatun urúeigu hama gumadimatiña diwéin luma uniñein héreti,5ladüga gayaraati habulieiduni lilurudun Bungiu dürügua hameime giñe haricha ha ǘnabugutimabaña.6Ígiraboun diwéin luma uniñein héreti houn ha débilibaña hama ha maguraasunbaña;7gurá hamá bulíei hamaamugei hagudemen luma hasufurirun!8Iñurabéi bumala haweigiñe ha siñabei hadimurehan; sefubáña ha siñabei hesefuragun houngua!9Inurabéi bumala, rubei haricha houn; sefubáña gudemetiña hama ǘnabugutiña!10Würi buitu hénrenguti tadarirúniwa; gebegitu sügǘ lau dübü buíduburiti!11Afiñeti túmari tuagu le gumuti, ani magudemedaditi.12Rutu óunwenbu ugundani lun túmari sagü weyu.13Ñǘdüntu áluaha liyu mudún tuma gamisa fínutu lun tuadigimaridun lau ugundani.14Barütu heigin dísegiñe kamá waporu to anaahatu ilaü.15Saratu lubaragiñe larugadun, aba tíchugun éigini houn tirahüñü luma houn tumusuniña.16Aríaguatu aban fulasu, aba tagañeihani, lau le tagañeirubei aba tábunagun beibei.17Buin tiña lau iderebugu ani benefatu.18Góunigi tumuti marasun lun buídubei lan, nadagimeintu darí lumoun láriebudun.19Adaaguatu gamisa lau túhabu guánarügü.20Súnwandan tíderaguniña gudemetiña hama ha mégeihabubaña.21Madiheritu hawagu tiduheñu lidan lidaani lidiliga, ladüga sun hagía aransetiña lubá.22Tuguya guánarügü adügübarun hasidin, ani tifinun-agei gamisa tadaüragunboun.23Subudiwati túmari buidu buidu uburugu, ani hádanñein hátima inebewabaña fulasurugu.24Adaaguatu dúnigu luma béliti lun talugurahan houn ha adaagutiña marasun.25Buin tiña lau erei luma inebesei, ani madiheritu luagu weyu le harugabei.26Lau lichú aau tadimureha súnwandan, ani arufudahatu lau ínsiñeni.27Ténitu lun sun katei túbiñe, ani meigin tumuti le magañeirun tubéi.28Tirahüñü luma túmari adimurehatiña buidu tuagu, hariñaga:29«Añahein saragu würiña buítiña, gama lumoun buítimatibu hawéi súngubei».30Iyeeni magadiñein, gagumuchaguadi ligía uéndeni; anhoun würi to íchuguboun inebesei lun Bungiu, ladimurehouba buidu tuagu.31Alawaha humóun hagibugiñe sun gürigia! Hadimureha buidu tuagu luagu sun le tadügübei!Bible Society of Honduras