Ariñawagúni29
1Ha madügünbaña gasu dan le ladeinhóun houn, hagünrinchawaguba madise.2Dan le hagibedagun richaguatiña, gúndaatiña gürigia; dan le hagumadihan wuribatiña, súfuritiña gürigia.3Isaanigu ha chúbaña aau, gúndaagüda hamuti háguchi, ánhaña ha éibugutiña hama horu, chagá hamuti seinsu.4Urúeigu ha richati hagumadihan, derebugugüda hamuti hageira; ánhaña ha aguburaharügübaña liseinsuna gumadi, günringua hamuti.5Ha adimurehatiña buiti hawagu hamadagu súnwandan, hesetiruña aban sádara habá.6Hafigoun guánarügü gürigia salufuritiña hasadaranboun; ánhañati gürigia harumatiña gúndaati habagaridun.7Ha richaguabaña beresetiña lau haricha gudemetiña; ánhañati ha salufuribaña, meberesentiña ni ka au.8Ha achagaraguagüdübaña gürigia, hingí hamuti fulasu; ha chúbaña aau gagalumahaditiña.9Chútiña aau ha awuribuhatiña hama ibidiougua tau, hagañiduba, adaawaguame bula hau, ani maranserunbaña ni kata.10Iyereegutiña gürigia harumatiña houn ha gáfarahadibaña.11Ha ibidiouguabaña aau, falaguatiña houngua luma hagañi; ánhañati ha chúbaña aau, gáluma hamuti.12Agumadihatiña ha adügütiña gasu lau iyeeni, gadei hamutiña sun ha eseriwidubaña houn.13Ha gudemebaña hama ha agüreweidubaliña gudemetiña, anihein aban katei ábanti labu hawagu: Bungiu lan íchugubei arihini houn biángubei hagía.14Urúeigu ha agumadirubaliña gudemetiña lau úarani, derebugugüda hamuti harúeihan lun súnwandan.15Lau abeichúni luma ebechúni hafurendeira gürigia, ánhañati isaanigu ha wéiriyati hínsiñegu rútiña busiganu tun háguchu.16Ánhaña gibe salufuritiña, gíbebei giñe figóu; gama lumoun harihubei ha harumabaña heferidirun ha wuribabaña.17Ererehabá lun biráü ábame darangila lan babagaridun, líchuguba saragu ugundani bun.18Le ñein lumuti ua lan lagumadihan Bungiu, úati katei buiti ñein; fuleseiwatiña néchanigu ha agunfulirutiña lilurudun Bungiu!19Mererehóunti houn idamuni lau dimurei, ladüga gunfurandatiña gama lumoun madügüntiña gasu.20Sagawati katei buiti hádangiñe ibidiougua tau sügǘ lau hádangiñe ha masaminarunbaña lubá hadimurehan.21Anhein bíchiga sun labusenrun bidamun lun lúmagiñe liñüraü, lachülürüba dan lun basakürihani.22Gürigia ha gañi gáñibaña, agubuhatiña wuribu, ani adügatiña saragu katei le moun lumuti.23Ha íñugubaña anaagun ungua rarigüdawatiña, ha ǘnabugubaña ibihatiña uéiriguni.24Ha úaradutiña hama híwerutiña, mínsiñeguatiña houngua, íbini híñarawagun, magufeserunbaña.25Ítara liña anufudei houn gürigia kei aban sádara, ánhaña ha hemenigibaña luagu Bungiu, góunigiwatiña.26Saraguhaña áluahatiña hafulesein gumadimatiña, gama lumoun Búngiurügüñein richá aguseragüdün.27Mínsiñetiña gürigia salufuritiña houn gürigia harumatiña, ha salufuribaña, mínsiñetiña ha harumabaña houn.
Bible Society of Honduras