1 Lúrudu28
Idewesei le ságüti weyu
1Aba líchuguni Wabureme uganu le lun Moisesi, lun lariñaguni houn Ísüraelina:2—Merederalá hadagaragüdün fein luma idewesei gudawarügüti nun lidan burí fedu le nunti keisi idewesei le buíduti líhemen nun.3—Ariñagabá houn anihánba lan idewesei burí le lunbei hágudahani lidan niri: Sagü weyu ani lun ítara luba lan, bián harahüñü mudún ha ábanti irumu hau, ha úati mégeiti hawagu.4Ladagarawagüdüba aban binaafin aban rábounweyu.5Idewesei fulúaruauti: Gádürü líburu tídangiñe tubuidun-agei fulúaru to añoundawagutu lau aban líturu lagüle oliwu.6(Ligía bugaha adagaragüdüni le águdahoubei sun dan luagu wübü Sinaí, keisi idewesei le buíduti líhemen lun Wabureme.)7Idewesei tauti diwéin, ábanbei líturu luagu kada aban liraüraü mudún. Gasu táturawagun diwéin tuguya sanduariurugu lidan liri Wabureme.8Le libiaman liraüraü mudún rábounweyuba ladagara, líchuguba aban idewesei fulúaruauti lanwoun luma aban idewesei tauti diwéin ítara kei idewesei le lánina binaafin. Aban idewesei buiti líhemen lira, le águdahoubei lun Wabureme.Idewesei lánina luéyuri emeraaguni
9—Lidan burí luéyuri emeraaguni, gasu hadagaragüdün bián harahüñü mudún ha ábanti irumu hau, ha úati mégeiti hawagu, luma widü líburu tídangiñe tubuidun-agei fulúaru añoundawagutu lau garaba keisi idewesei fulúaruauti, lau giñe idewesei tauti diwéin.10Lídanba luéyuri emeraaguni ladügǘwa adagaragüdüni gudawarügüti le, lau idewesei tauti diwéin, lumoun adagaragüdüni gudawarügüti le lánina sagü weyu.Idewesei hatiauti
11—Furumiñeti weyu lidan kada hati, hadagaragüdüba keisi adagaragüdüni gudawarügüti lun Wabureme, bián bágasu wügüriña ha ñǘbürigiña, aban mudún wéiriyaali hama sedü harahüñü mudún ha ábanti irumu hau, ha úati mégeiti hawagu.12Luagu kada bágasu hadagaragüdüba duusu líburu tídangiñe tubuidun-agei fulúaru ñóunwaguatu lau garaba; luagu kada mudún, widü líburu fulúaru to añoundawagutu lau garaba,13luagu kada liraüraü mudún gádürü líburu fulúaru to añoundawagutu lau garaba. Aban adagaragüdüni gudawarügüti le buiti líhemen lira le agudúti lun Wabureme.14Biámaboun líturu diwéin idewesei luagu kada bágasu wügüri le ñǘraügili, aban líturu dimí luagu kada mudún wéiriyaali luma aban líturu luagu kada liraüraü mudún. Ligía adagaragüdüni gudawarügüti le lunbei hadagaragüdüni sagü hati lidan kada irumu.15Lumoun adagaragüdüni gudawarügüti le ságübei weyu, gasu hadagaragüdün aban liraüraü gábara lun Wabureme keisi adagaragüdüni luagu figóu lau idewesei tauti diwéin.Idewesei lánina Luéyuri Esefuruni
16—Weyu katorusu lidan furumiñeti hati lidan irumu, ligíaba Luéyuri Esefuruni luagu luéirigun Wabureme,17weyu keinsi, luéyuribei fedu. Teigiba fein maganatu lébini luagu sedü weyu.18Furumiñetime weyu lídangiñe sedü weyu ligía, ladügǘba aban óundaraguni sánduti. Madügünbadün ni murusun wadagimanu lidan weyu ligía.19Hadagaragüdüba bián bágasu ñǘbürigiña ha wügüriña, aban mudún wéiriyaali hama sedü harahüñü mudún ha ábanti irumu hau, ha úati mégeiti hawagu lun Wabureme keisi adagaragüdüni gudawarügüti.20Úara luma adagaragüdüni le, híchugubei giñe idewesei le tauti fulúaru to añoundawagutu lau garaba ítara: Duusu líburu fulúaru luagu kada liraüraü bágasu; widü líburu luagu kada mudún wéiriyaali21tuma gádürü líburu luagu kada liraüraü mudún.22Hadagaragüdüba giñe aban gábara keisi adagaragüdüni lun hibihini ferudun luagu hifigoun.23Hadagaragüdübei sun le, lumoun adagaragüdüni gudawarügüti le adügǘbei sagü binaafin.24Ítara luba hadügüni kada aban lídangiñe sedü weyu le lidaani fedu, keisi idewesei le buiti líhemen, le águdahouti lun luéirigun Wabureme. Ladagaruba le, úara luma idewesei tauti diwéin, lumoun adagaragüdüni gudawarügüti le lánina sagü weyu.25Luagu lisedün weyu, hadügüba giñe aban óundaraguni sánduti. Madügünbadün ni aban wadagimanu lidan weyu ligía.Idewesei luáguti furumiñeti lin nadü
26—Lidan lufedun furumiñeti lin nadü, dan le hadagaragüdün le fulúaruauti lun Wabureme luagu iseri alubahani, hadügüba giñe aban óundaraguni sánduti. Madügünbadün ni aban luwuyeri wadagimanu lidan weyu ligía.27Hadagaragüdüba bián bágasu wügüriña ha ñǘbürigiña lun Wabureme keisi adagaragüdüni gudawarügüti le buiti líhemen, aban mudún wéiriyaali hama sedü harahüñü mudún, ha ábanti irumu hau.28Idewesei fulúaru to añoundawagutu lau garaba, dúusuboun líburu luagu kada bágasu, widü líburu luagu mudún wéiriyaali,29tuma gádürü líburu luagu kada liraüraü mudún.30Hadagaragüdüba giñe aban gábara keisi adagaragüdüni lun hibihini ferudun luagu hifigoun.31Adagaragüdüni gudawarügüti le luma idewesei tauti diwéin luma fulúaruauti, hadagaragüdübei lanwoun adagaragüdüni gudawarügüti le lánina sagü weyu. Gasu úabei lan mégeiti hawagu animaalugu hagía.Bible Society of Honduras