1 Lúrudu22
Lóunahan Balakü agúara lun Balaamü
1Aba hasigiruni Ísüraelina haweiyasun aba herederagun lidan fulasu mawübüriti le gíribei Moabü, luéigiñe oubaü le ñéingiñe lubéi laboucha weyu libiti duna Hordán, ligibugiñe Herikó.2Ariha lumuti Balakü le liráü Siporu le hadügübei Ísüraelina houn Amoruna.3Aba giñe hanufudedun lílana Moabü lau harihini hiibe Ísüraelina.4Ábati hariñagun lílana Moabü houn ábutigu ha Madianbaña:—Hagumuchubei sun gürigia ha wamúan kei hagumuchuni bágasu sagadi áraabu.
Lidoun dan ligía, Balakü lurúeitebei Moabü,5aba lóunahan luagu Balaamü le liráü Beoru dan le Petoruñein lubéi lurugabu duna Éufüratesi lageira Amabü. Aba lariñagun Balakü houn lóunagülegu lun hariñagun lun Balaamü: «Añahein bürübünu gürigia ñǘbuintiña Ehiptugiñe, añahein ya lidan sun ageiraü, guentó, nigibugiñe haganawa.6Ñǘbuinba furese íñaragua báamugaña nun, lugundun héretiña wawéi. Fagua ítara luba gayara lan nasagaruniña fulasurugugiñe. Subudi numuti luagu súnwandan lan lagunfulirun babinihan luma bíñaragun».7Aba houdin ábutigu lílana Moabü hama lílana Madián lau seinsu háhaburugu lun hafayeiruni lebegi íñarawaguni, dan hachülürün le ñein lubéi Balaamü, aba híchuguni luganute Balakü lun.8Lariñaga Balaamü houn:
—Redei humá ya áriebu to, nóunabubadün según le lariñagun Wabureme nun.
Aba herederun ábutigu hagía luma áriebu ligía.9Gama lumoun aba lasaliragun Wabungiute lun Balaamü, aba lálügüdüni, lariñaga lun:
—Kátaña san wügüriña ha, ha búmabaña?10Lariñaga Balaamü lun:
—Lóunahan Balakü le liráü Siporu, le lurúeite Moabü lun nege hariñagun nun11luagu añahein lan bürübünu gürigia áfuridutiña Ehiptugiñe, luagu añahein lan lidan sun lageira. Busentiti Balakü lun nege nidin lun níñaraguniña gürigia hagía, fagua nege gayara lan lasagaruniña lumúanrugugiñe.12Ábati lariñagun Wabungiute lun Balaamü:
—Mídinba hama, míñaraguabaña giñe gürigia hagía, lugundun biní naaña gürigia hagía.13Larugan aba lásaarun Balaamü, aba lariñagun houn lóunagülegu Balakü:
—Giribu humá hageiroun. Máhati Wabureme lun nidin huma.14Aba hagiribudun ábutigu Moábüna le ñeinhin lubéi Balakü, aba hariñagun lun:
—Máhati Balaamü liabin wama.15Ábaya lóunahan Balakü amu ábutigu, gíbetimatiña ani íñugutimatiña sügǘ hau ha lóunahabaña furumiñe.16Aba houdin lumoun Balaamü, aba hariñagun lun:
—Lóunahaña Balakü le liráü Siporu ariñaga bun: “Mamaharabá biabin nun.17Níchugubei luéirin-agei uéiriguni bun, nadügübei sun le bamuriahan numa bun, gama lumoun adügabá fulesei nun, ñǘbuinba íñaraguaña gürigia ha nun”.18Gama lumoun lariñaga Balaamü houn:
—Ni anhein líchiga Balakü sun golu luma pülata le gabarabei tidan lani palasiu, siñabei nadüraaguni le lubeibei Wabureme le Nubungiute ni lidan katei wéiriti ni lidan ñǘraüti.19Gama lumoun rédeiya humá ya áriebu to, ariha náamugei kaba lan lariñaga Wabureme nun.20Áriebu, aba lasaliragun Wabungiute lun Balaamü, lariñaga lun:
—Anhein hayabiña lubéi wügüriña ha buagu, saraba, beiba hama, gama lumoun lérügüba nariñagun bun badüga.
Ladunragun Balaamü luma lani Wabureme ánheli
21Larugan, aba lásaarun Balaamü, aba laranserunu lilügün burigü aba lidin hama ábutigu Moábüna.22Wariñu liña lidin Balaamü tuagu lilügün burigü hau bián lumusun úara luma.Gama lumoun aba lagañidun Wabungiute luma ladüga lidin, aba leberesehan lani Wabureme ánheli lémerirugu lun ladouruni üma luéi.23Dan tarihinbei burigü luagu aniha lan lani Wabureme ánheli lamidangua üma tau aban eféin lúhaburugu, aba tegeyedun, aba tárügüdün amu üma; aba labeichunu Balaamü lun tagiribudun luagun üma.24Lárigiñe aba lararamun lani Wabureme ánheli lidan aban üma bürüraüti tabadinagua beibei-agei lau baríeiru lauti dübü luéigiñe biángubei louba.25Dan tarihinbalin burigü lani Wabureme ánheli, aba tabalachun luagu aban lídangiñe louba üma, aba lámurudun lúruna Balaamü. Ábayati lagayuahan Balaamü tuagu.26Gama lumoun aba lidin lani Wabureme ánheli habá, aba lararamun lidan aban üma bürüraütimati le ñein lubéi siñá lan legeyedun luagun ni aban oubaü.27Dan tarihinbalin burigü lani Wabureme ánheli, aba tarounrun múarugu. Ábati lagañidun Balaamü, aba labeichunu lau aban wewe.28Lidan oura ligía aba ladimuregüdünu Wabureme burigü, aba tariñagun lun Balaamü:
—Ka san nadügübei bun? Anihántia lǘrüwan babeichunina.29Lariñaga Balaamü tun:
—Badügüña bula nau. Lun hamuga anuhein lan aban gusiñu numa guentó, náfaraadibu yebe hilagubei.30Tariñaga burigü lun:
—Nuguya bilügünboun burigü to baweiruboun súnwandan, ani subudi bumuti luagu madügünñaha nágili lan le bun.
—Lariñaga Balaamü tun: Binarün.31Ábati larufudagun lani Wabureme ánheli lungua lun Balaamü rara luagu üma tau aban eféin lúhaburugu. Aba labuluchagun Balaamü darí ladagarun lerebe múarugu.32Gama lumoun aba lariñagun lani Wabureme ánheli lun:
—Ka san uagu babeichoun bilügün burigü ǘrüwa wéiyaasu? Au mígirunbei lun básügürün ladüga magundantina lau buéiyasun.33Aba tarihinina burigü, aba tegeyedun nuéi ǘrüwagubei wéiyaasu. Lun hamuga megeyetu nuéi áfara náadibu hamuga hilagubei ígira tuguya wínwanñu.34Aba lariñagun Balaamü lun lani Wabureme ánheli:
—Afigouhaadina, ladüga ibidiñeti yebe nun luagu buguya lan eredehabalin némeri. Anhein mabusenrun bubéi nidin, nagiribudagubei.35Lariñaga lani Wabureme ánheli lun:
—Gayaraati bidin hama wügüriña ha, gama lumoun lérügüba nariñagun bun, bariñaga. Leresibiruni Balakü Balaamü
Aba lidin Balaamü hama ábutigu ha lóunahabaña Balakü,36dan lasubudirunbalin Balakü luagu anite lan Balaamü, aba lidin eresibirei lidan aban luburugute Moabü, lurugabu duna Arünón lidan láfadaragun fulasu,37aba lariñagun lun:
—Gíbeeli nóunahan buagu; ka yebe san uagu miábinbubei? Haritaguatibu yebe san luagu mafayeirun nubadibu lan buidu?38Aba lóunabun Balaamü:
—Anahán, ñǘbuinhadina arihabu. Gama lumoun mabafutina lun nadimurehan luagu nani nungua; lérügübei lasubudiragüdün Wabungiute nun gayara nariñagun.39Ábati lidin Balaamü luma Balakü Usotün,40ñein lubéi láfaragüda Balakü fiu bágasu hama mudún, lun hanügüniña lun Balaamü luma houn ábutigu ha ñǘbuinbaña luma.41Larugan binaafin aba láluahani Balakü Balaamü, aba lamudeiragüdüni uburugun Bamotü, le ñéingiñe lubéi lariha geyegua tau hakianpun-agei Ísüraelina.
Bible Society of Honduras