1 Lúrudu20
Duna lídangiñe dübü
1Lidan furumiñeti hati lidan irumu, ligía hachülürün Ísüraelina lidoun fulasu mageirawati Sin, aba herederun Kadesi luagu saragu dan. Ñein tounwe María, ñein giñe tabunúa.2Keiti maniñe habéi Ísüraelina duna, aba hóundaragun lun hadimurehan wuriba luagu Moisesi luma Aarón,3aba hariñagun lun Moisesi:—Hilagubeihaadiwa hamuga meha úara hama híbiri Ísüraelina ha láfaragubaña Wabureme!4Kame san hanügaña lumutuniña Wabureme lidoun fulasu mageirawati le? Busentün funagia lun wóunwegun hau sun wabiñanigu?5Kame san hasagarawa Ehiptugiñe lun hanügüniwa lidoun lagübüri fulasu le? Siñati lábunawagun ni kata ya; úati tídibu igu ya ni tídibu beibei, ni güranáda; úagubeiti ni duna lun watun!6Aba ladisedun Moisesi luma Aarón hawéi lílana fulasu, aba houdin tubenarin kianpu lánina óundaruni, aba habuluchagun ñein darí ladagarun herebe múarugu. Ábati lasaliragun luéirigun Wabureme houn,7aba lariñagun Wabureme lun Moisesi:8—Barübei badun ábame líderagunibu bíbiri Aarón lun bóundaraguniña gürigia. Lárigiñe ábame bariñagun lun dübü hagibugiñe sun hagía lun líchugun duna houn, barihuba luagu lésehaba lan duna lídangiñe dübü lun hatun hau sun habiñanigu.9Aba lanügüni Moisesi badun le ligibugiñebei Wabureme, ítara kei lariñaguni Wabureme lun;10lárigiñe aba lóundaruniña Moisesi luma Aarón gürigia ligibugiñe dübü, aba lariñagun Moisesi houn:
—Aganba humá, maganbaditiña huguya le: Wasagaruba funagia duna lídangiñe dübü le lun hatun?11Ítara kei lariñaguni Moisesi katei le, ítara liñuruni lúhabu aba lagayuahan luagu dübü lau badun bián wéiyaasu, aba lésehan saragu duna lídangiñe. Aba hatun gürigia hau sun habiñanigu.12Gama lumoun aba lariñagun Wabureme lun Moisesi luma Aarón:
—Kei míchugun hubalin buga hemenigin nuagu, míchugun huguya uéiriguni lun niri hagibugiñe Ísüraelina, mebelubadün hama gürigia ha lidoun ageiraü le níchugubei houn.13Lísensen duna le gíribei Meribá ligía le ñein lubéi hekehara Ísüraelina lun Wabureme, aba larufuduni lubafu le sándubei houn.
Lamaharun Edomu lun lásügüragüdüniña Ísüraelina
14Aba lóunahan Moisesi wügüriña lúmagiñe Kadesigiñe lun hariñagun lun lurúeite Edomu:—Hóunahaña bíbirigu Ísüraelina ariñaga bun: “Subuditi bun buidu luagu lénrengunga le sügǘ wamaalibei.15Aba bugaha houdin wagüchagu Ehiptun aba herederun saragu dan ñein, gama lumoun rútiña Ehiptuna lidere dan woun kei meha hadüga houn wagüchagu;16ábati wamuriahan luma Wabureme lun líderaguniwa ani aganba lumuti wagúarahan, aba lóunahan aban ánheli aba lasagaruniwa Ehiptugiñe. Awahánti ya guentó uburugu Kadesi yarafa lun láfadaragun bageira.17Wamuriahaña buma lun bíchugun üma woun lun wásügürün bumúanrugugiñe. Másügürünbadiwa lídangiñe bichari le bunawaguaali, ni tídangiñe beibei-agei, matun wagíame duna lídangiñe bifusun, luéigiñebadiwa üma le ñéingiñe lubéi leibugúa, madiñurunbadiwa luéi darime hiñugua wamaali bumúan”.18Lariñaga lurúeite Edomu houn:
—Másügüra humá numúanrugugiñe, anhaün áluga hásügürün, náfuriduba hubaroun hau nisudaranigu!19Hariñaga Ísüraelina lun:
—Sügürügübadiwa ǘmadarugugiñe, ánhawadügü hamuga ata duna o wabiñanigu lan lídangiñe bifusun, wafayeirubei bun. Busenrügütiwa wásügürün eibu bumúanrugugiñe.20Aba lóunabuniña lurúeite Edomu:
—Másügürünbadün!
Aba lidin habaroun Ísüraelina hau súdara héretiña ha aransetiña,21lun mígirunhabaña lan lun hásügürün lumúanrugugiñe. Ábati hárügüdün Ísüraelina amu üma.
Lounwen Aarón
22Aba háfuridun Ísüraelina Kadesigiñe lun luagun wübü Oru.23Aba lariñagun Wabureme lun Moisesi luma Aarón ñein lurugabu láfadaragun Edomu:24—Lounwe Aarón, mebelubei lidoun fulasu le lunbei níchuguni houn Ísüraelina lugundun hadüraaguni le nubeibei lurugabu lísensen duna Meribá.25Buguya Moisesi, barübei Aarón luma Eleasárü le liráü lábulugun wübü Oru;26ábame baragachunu ladaüragun Aarón to lánina lafadirihan luéi ñein, ábame badaürünu luagu Eleasárü. Ñeinba lounwe Aarón.27Aba ladügüni Moisesi le lariñagubei Wabureme lun. Aba hamudeirun luagun wübü Oru aríagu sun Ísüraelina lun,28aba laragachunu Moisesi daüguaü to lánina afadirihani luéi Aarón ñein, aba ladaürünu luagu Eleasárü. Ñeinmeme lounwe Aarón lábulugu wübü.29Dan harihinbei Ísüraelina luagu hilá lan Aarón, aba hayahuahani luagu darandi weyu.Bible Society of Honduras