1 Lúrudu18
Hawadigimari fádirigu hama Lewitagu
1Aba lariñagun Wabureme lun Aarón:—Buguya hama birahüñü úara hama sun ha híbiri lani Lewí türibu ha bánigu, huguyaba ariha luagu burí figóu le adügǘbei kóntüra sanduariu, gama lumoun figóu le badügübei buguya hama birahüñü lidan huádigimari keisi fádirigu, huguyarügübadün ariha lau.2Gama lumoun mosu báluahan lun híderagunün ha híbiri lílana lani Lewí türibu lidan eseriwiduni tigibugiñe kianpu to lúbaana daradu.3Heseriwiduba bun seriwi hagíame tidan kianpu, gama lumoun moun lumuti hayarafadun lun burí tumegegu sanduariu ni luagun latarü; ánhaña ayarafada, hóunweguba, ani huguya sun hóunweguba giñe.4Mosu búmabaña lan lidan sun eseriwiduni tidan kianpu lánina óundaruni luma lidan sun le lunbei hadügüni. Gama lumoun moun lumuti layarafadun ni aban gürigia terencha hun;5huguya lunbei harihin lau eseriwiduni le tani sanduariu luma latarü. Ítara luba magañidunhaadina lanme houn Ísüraelina.6Nadiñurubaña bíbirigu ha Lewitagu hádangiñe Ísüraelina lun níchuguniña hun, lun heseriwidun lidan burí barasegu le tídanbei kianpu lánina óundaruni;7gama lumoun buguyarügüba hama birahüñü gayara hadügüni hawadigimari fádirigu le adügǘbei luagu latarü o tanagangiñe belu. Huguya lunbei hadügüni barasegu lira, ladüga ru naali irichaü hun lun hadügüni hawadigimari fádirigu. Furumiñeguarügü le adügüti luadigimari fádiri mámouga ligía fádiri, lasiadirúba lun lounwen.
Lebuina habagaridun fádirigu hama Lewitagu
8Lariñaga Wabureme lun Aarón:—Ru naali idewesei le íchaahoubei nun labun baríaahan. Sun idewesei sagüráuti le hadügübei Ísüraelina nun, ru numuti bun luma houn birahüñü keisi hufanran; ítara luba súnwandan.9Lídangiñe sun adagaragüdüni le lunti lagudúniwa, bánibei sun idewesei fulúaruauti luma burí adagaragüdüni luagu figóu, le hadagaragüdübei Ísüraelina nun; sun burí idewesei sagüráuti le, bánibei hama birahüñü.10Furumiñeguarügü wügüri hídangiñe gayaraabei leigin lídangiñe idewesei ligía, gama lumoun gasu léigini lidan aban fulasu le anuadirúati, lugundun anuadirúati idewesei ligía.11—Idewesei burí giñe le ayudeihóuarügüti le híchugun Ísüraelina nun, ru numuti bun luma houn birahüñü würiña o wügüriña ha búmagiña múnada. Aban lúrudu le lunti sun dan lira. Furumiñeguarügü hádangiñe biduheñu le harumati según échuni, gayaraabei leigin lídangiñe.12Ru numuti giñe furumiñeti tin nadü le hanügübei Ísüraelina nun sagü irumu: Lubuidun-agei garaba, tubuidun-agei diwéin luma lubuidun-agei türigu.13Ítarameme giñe, furumiñeti halubahan le hadagaragüdübei nun, bánibei. Furumiñeguarügü hádangiñe biduheñu le harumati según échuni, gayaraabei léigini.14Sun idewesei le hanuadirún Ísüraelina nun, bánibei.15—Sun hágiramagu Ísüraelina o furumiñetiña lan harahüñü habiñanigu, ha híchugun nun, bánibaña. Gama lumoun gasu bamuriahan aban fáyeiti hawagu hágiramagu gürigia hama furumiñetiña harahüñü animaalugu ha wíyetiña.16Gasu lafayeirúniwa hawagu aban hati lárigiñe hágurahoun o hemeilihóun, séingübei murusun pülata según seinsu le ayusurúbei sanduariurugu, le únsubei güramu lihürü.17Gama lumoun mígirun bubaña lun hafayeirun hawagu furumiñetiña harahüñü bágasu, mudún o gábara. Núntiña animaalugu hara, lunti báfarahaniña; babahichagueime hata luagun latarü, le hagüle bágudagueime keisi idewesei le buiti líhemen nun.18Gayaraabei berederun labu lǘgürügü luma laniguagu animaalu ligía, aban idewesei núnrügüti lira, gayaraabei giñe berederun labu liyada le luéigiñebei lóunwenren.19Sun ídemuei le hafanreinrun Ísüraelina nun, ru numuti bun luma houn birahüñü ha búmagiña múnada. Aban lúrudu le lunti súnwandan le. Aban daradu le masansiraguaditi, le lunti sun dan, le nadügübei buma luma hama badügawagun.20Aba lariñagun Wabureme lun Aarón:
—Mamúanbadibu memegen bugíame Ísüraeli, kei híbiri Ísüraelina.
Auba bumegen, auba giñe balagante lumúanrugu Ísüraeli.21Diisi lídangiñe san le gásubei híchuguni Ísüraelina lídangiñe sun le ebelurubei houn, ru numuti houn Lewitagu keisi hafayeiruaha luagu heseriwidun tidan kianpu lánina óundaruni.22Ha híbiri Ísüraelina moun lumuti hayarafadun tun kianpu lánina óundaruni, lugundun anhein hadüga ítara hafigouhaba, ani lanügüba óunweni houn.23Lewitagurügübaña eseriwida tidan kianpu lánina óundaruni, hagíaba giñe afayeiha luagu hadurun. Ábanbei lúrudu magumuchaditi le, le lunbei hígiruni agübürigu houn isaanigu, mafulasunbaña Lewitagu lumúanrugu Ísüraeli.24Diisi lídangiñe san le híchugubei Ísüraelina nun lídangiñe le ebelurubei houn, ligía níchugubei houn Lewitagu lun hamegenbei lan. Ligía nariñagunbei houn luagu mafulasunbaña lan lumúanrugu Ísüraeli.25Aba líchuguni Wabureme uganu le lun Moisesi lun lariñaguni houn Lewitagu:26—Lun danme lan heresibiruni diisi lídangiñe san lídangiñe sun le níchugubei houn Ísüraelina, le heresibirubei Lewitagu keisi hemegen, mosu giñe hasagaruni diisi lídangiñe san lídangiñe lun híchuguni nun.27Ligíaba ídemuei le lunbei híchuguni nun, kéisigubeirügü ídemuei le híchugubei Ísüraelina nun tídangiñe hatürigun luma tídangiñe haniñe diwéin.28Ítara, lídangiñemeti diisi lídangiñe san le híchugubei Ísüraelina houn Lewitagu, hasagarubei le lunbei hafanreinhani luma Wabureme ábame híchuguni lun fádiri Aarón.29Lídangiñe sun le ichugúbei houn, gasu hadiñurun aban fánreinti keisi ídemuei nun; ani le fánreinti le hederegerun nun, gasu leeba lan buídutimabei.30—Ariñagabá giñe houn: “Lárigiñeme hadiñuruni fánreinti le buídutimabei nun, le líbiri gayaraahalime hariñagun luagu hani lan,31ani gayaraabei héigini huguya hama hiduheñu lidan furumiñeguarügü fulasu. Ligía hafayeiruahabei luagu heseriwidun tidan kianpu lánina óundaruni.32Lárigiñeme hadiñuruni fánreinti le buídutimabei nun, gayaraahalime héigini le líbiri ani mama figóu; ítara luba mawiyedagüdün humani hadewese Ísüraelina le sagüráubei, ani ítara luba móunwegun humá”.
Bible Society of Honduras