Neemíasi6
Eledeguni lubá Neemíasi
1Dan le hasubudirunbalin Sanbalátü, Towíasi, Gésemü le Arawiana hama híbiri wáganiñu luagu aranseyaali lan baríeiru ani mígirun hamá ni murusun hunrenti luagu (lau sun mégeigili lan nafidiruni bena lidan lubara)2aba lóunahan Sanbalátü luma Gésemü ariñaga nun lun nóundaragun hama lidan fulasu wayati le gíribei Onó. Gama lumoun le haritagubei, lun yebe hadügün wuribati nun.3Ábati nóunahan ariñaga houn luagu siñá lan nidin ladüga beresegu nan, ani lararamaguba lan wadagimanu anhein nígira lun nidin houn.4Gádürüñein wéiyaasu hagúarun nuagu, gama lumoun ábanmeme nóunabagüle houn.5Luagu liseingün wéiyaasu, aba lóunahan Sanbalátü aban lumusun tabu aban gárada nun, amuriahaméme numa lun nidin,6lariñaga tidan gárada tuguya:«Agülülühóuati, ariñagaléi giñe Gésemü, luagu baransehaña lan hama huríu, lun hiñuragun hungua, ligía lan lébubei hiñuraguni baríeiru. Ani según le agülülühóubei, buguyaba nege harúeite,7ani rúhadibu lan nege profetagu lun hariñaahan Herusalén, luagu buguya lan lurúeitebei Hudá. So gayaraati lachülürün katei le larigeirugun urúei Árütaherühesi, ñǘbuinba lubeiti ayanuha wamaamuga».8Ábati nóunahan ariñaga lun luagu marasualugu lan le agülülühóubei, luagu laritagun lan ítarabei.9Ladüga hóuchuña yebe hanufudedaguagüdüniwa, lun wararamuni wáhabu luéi wadagimanu; guentó Bungiu Baba héregüdabei núhabu.10Lárigiñe aba nidin lúbiñe Semaíasi le liráü Delaíasi libari Meetawéli le adouragubei laugua lúbiñe, lidan nachülürün aba lariñagun nun:
—Óundaragua wamá ténpulurugu, turageirugu sanduariu, wadouragueime bena, ladüga saminaaña hayabin áfarabu áriebu to.11Aba nariñagun lun:
—Wügüriña kei au, manurahantiña, mebelu hagía ténpulurugun lun hesefuruni habagari. Au mebelubadina.12Ariha numutiti, luagu mama lan lúmagiñeti Bungiu le lariñagubei nun. Lariñagunbei ítara, ladüga hagañeihani Sanbalátü luma Towíasi luagu seinsu;13fayei hamuti lun ládarun anufudei nidoun, lun nafigouhan lun gayaraabei lan híchugun luriban iri nuagu.14Nubungiute, haritaguabei le ladügübei Sanbalátü luma Towíasi! Mabulieidabóun giñe Noadíasi to profeta, ni ha híbiri profetagu ha álugubaña lun hádarun anufudei nidoun!15Weyu wein-seingü lidan lihatiri Elulu lásura wadagimanu, lidan lubeiti dimí-san-bián weyu ladügǘwa wadagimanu.16Kei haganbuni sun wáganiñu, hama sun gürigia ha geyegubaña wau, aba hanufudedagun, aba lǘnabudun hanaagun houngua, ladüga hasubudiruni luagu Bungiu lan íderagubaliwa luagu wadagimanu le.17Lidoun dan ligía, hanarimeti meha habürühan gürigia wéirigutiña ha Hudaana lun Towíasi, ítara giñe labürühan Towíasi houn,18ladüga saraguhaña gürigia lúmagiñeñanu Towíasi, ladüga libarimu lan Sekaníasi, le liráü Ara, luma ladüga maríei lan Hoanán le liráü tuma liráü Mesulámü, le liráü Berekíasi.19Ábatiha hadimurehan buidu luagu niñúarü, abahüdagua haméi burí lun le nariñagubei. Ábatiha lóunahan Towíasi gárada nun, lun lanufudedaguagüdünina.
Bible Society of Honduras