Fádirigu4
Adagaragüdüni luagu figóu
1Aba lariñagun Wabureme lun Moisesi:2—Ariñagabéi houn Ísüraelina kaba lan adügǘwa lun gürigia le adüraaguti aban lídangiñe lugumadin Wabungiute mabusenrunga ligía, o ladügün lan somu katei le moun lumuti, anihán le lunbei ladügǘn:3—Anhein furumiñeti lubéi fádiri afigouhabei, ábürügüdei duru hawagun lílana fulasu, gasu ladagaragüdün aban bágasu ñǘraügili le úati mégeiti luagu lun Bungiu luagu lifigoun.4Ábame lanügüni ligibugiñoun Bungiu tubenari kianpu lánina óundaruni, ñeinba líchigei lúhabu lábulugu animaalu ligía, lárigiñe ábame líbuguni ligiina ligibugiñe Wabureme.5Lárigiñeti ábame lanügün murusun lídangiñe lita bágasu ligía, ábame lanügüni tidoun kianpu lánina óundaruni;6ñeinba ladüdüragüdei lifinga lidan hitaü, ábame labahichaguni sedü wéiyaasu ligibugiñe Wabureme tuagun tubelun sanduariu.7Hurugua ligíame giñe murusun hitaü luagu liganchun latarü le ñein lubéi lágudahoua kupali hémeti, le ligibugiñebei Wabureme tidan kianpu lánina óundaruni, ábame láwiyuruni líbiri hitaü luagun lugudi latarü le lánina adagaragüdüni gudawarügüti le tubenaribei kianpu lánina óundaruni.8Lárigiñeme ábame lagidaruni sun agülei le luágubei lisasa bágasu le adagarawagüdübei luagu figóu,9biángubei lani riñón, agülei le tuágubei, le giñe lanaganwagubei bágasu ligía, luma le gagülebei luagu lubana, le lunbei lagidarúniwa úara tuma riñón,10ítara kei lagidarúniwa luéi bágasu le adagarawagüdüti keisi idewesei lánina arandaruni. Lárigiñeme ábame láguduni fádiri ligibuagu latarü le lánina adagaragüdüni gudawarügüti.11Ánheinti lura bágasu ligía luma sun lǘgürügü, lábulugu, liyada, lisasa luma lídiga,12lasagarubei fádiri lidoun aban fulasu harumati bóugudin tuéi kianpu-agei, le ñeinhin lubéi lichugúa baligi, ábame láguduni ñein ligibuagu baligi.13—Ánhaña adüga sun Ísüraelina somu katei wuribati mabusenrunga hagía, ani mefenti ni aban hádangiñe luagu hadüraaguñein lan lugumadin Bungiu lau katei le hadügübei, ani gadurun hamá luéigiñe,14danme lasubudirúniwa figóu le hadügübei, lunti hadagaragüdün sun hagía lidan aban, aban bágasu ñǘraügili luagu hafigoun. Hanügeime tigibugiñoun kianpu lánina óundaruni,15ábame híchuguni ábutigu ha adundehabaña fulasurugu háhabu lábulugu bágasu ligía ligibugiñe Bungiu, ábame híbuguni ligiina ñein guánarügü.16Lárigiñeme ábame lanügün furumiñeti fádiri murusun lídangiñe lita bágasu ligía tidoun kianpu lánina óundaruni,17ábame ladüdüragüdüni liraüraü lifinga lau hitaü ligía, ábame labahichaguni sedü wéiyaasu tigibugiñe belu lidan fulasu sánduti.18Huruguawa ligíame murusun lídangiñe hitaü ligía luagu liganchun latarü le ligibugiñebei Wabureme tidan kianpu lánina óundaruni. Sun hitaü le erederubei, lunti láwiyuruni lugudina latarü le tubenaribei kianpu lánina óundaruni.19Lagidarubei giñe sun lagüle bágasu ligía luéi, ábame láguduni luagu latarü,20ladügǘba lun bágasu kéisigubeirügü ladügǘn lun bágasu le adagarawagüdübei luagu figóu; ítara luba libihini fádiri ferudun luagu hafigoun, ábame ferudunawa lan hafigoun.21Lárigiñe ábame lasagaruni bágasu ligía bóugudin tibiti kianpu-agei, ábame láguduni, ítara kei ladügün lau furumiñeti bágasu, lugundun adagaragüdüni lira le adügǘbei luagu hafigoun lílana fulasu.22—Anhein afigouha aban ábuti lau ladüraaguni lugumadin Lubungiute, gadurunbei íbini anhein mabusenrunga lubéi ladügei figóu ligía.23Danme gefén lan luagu figóu le ladügübei, lunti lanügün aban gábara ñǘraügili le úati mégeiti luagu keisi idewesei.24Ábame líchuguni lúhabu lábulugu liraüraü gábara ligía, ábame líbuguni ligiina ligibugiñe Wabureme, lidan fulasu le ñein lubéi hafarúa animaalugu ha lúnbaña hagudúniwa, lugundun adagaragüdüni lan luagu figóu lira.25Lárigiñe ábame lanügün fádiri murusun lídangiñe lita animaalu le afarúbei lau lifinga, ábame láhurudaguni luagu liganchun latarü le lánina adagaragüdüni gudawarügüti, lárigiñe ábame láwiyuruni le líbiri hitaü lugudina latarü.26Ábame láguduni lagüle animaalu ligía luagu latarü ítara kei ladügǘniwa lau hagüle animaalu ha afarútiña keisi adagaragüdüni lánina arandaruni. Ítara luba libihini fádiri ferudun luagu lifigoun ábuti ligía, ábame ferudunawa lan figóu ligía.27—Anhein afigouha aban gürigia le gudemeti mabusenrunga ligía, gadurunbei luagu ladüraaguni lugumadin Wabureme,28danme gefén lan luagu figóu le ladügübei, lunti ladagaragüdün aban gábara to úati mégeiti tuagu keisi idewesei luagu figóu le ladügübei.29Ábame líchuguni lúhabu tábulugu gábara tuguya, ábame líbuguni tigiina lidan fulasu le lánina adagaragüdüni gudawarügüti.30Ábameti lanügün fádiri murusun lídangiñe hitaü lau lifinga, ábame láhurudaguni luagu liganchun latarü le lánina adagaragüdüni gudawarügüti, ábame láwiyuruni líbiri hitaü lugudina latarü.31Gasu giñe lagidaruni sun lagüle animaalu ligía, ítara kei lagidarúniwa lagüle animaalu le adagarawagüdüti lun arandaruni lun lagudúniwa luagu latarü keisi íhemeni buiti lun Wabureme. Ábameti libihini fádiri ferudun luagu lifigoun gürigia ligía, ábame ferudunawa lan figóu ligía.32—Anhein anüga gürigia ligía aban mudún keisi adagaragüdüni luagu figóu, lunti aban lan mudún würi lanüga to úati mégeiti tuagu.33Ábame líchuguni lúhabu tábulugu, ábame líbuguni tigiina keisi adagaragüdüni luagu figóu lidan fulasu le ñein lubéi hafarúa animaalugu ha lúnbaña hagudúniwa.34Ábameti lanügün fádiri murusun hitaü lau lifinga lídangiñe tita animaalu to afarúboun luagu figóu ábame láhurudaguni luagu liganchun latarü le lánina adagaragüdüni gudawarügüti, ábame láwiyuruni le líbiri hitaü lugudina latarü.35Lárigiñeme ábame lagidaruni sun tagüle kei lagidarúniwa lagüle mudún ñǘraügili le edewehóubei keisi adagaragüdüni lánina arandaruni, ábame láguduni agülei luagu latarü úara luma burí idewesei le agudúbei lun Wabureme. Ábameti libihini fádiri ferudun luagu lifigoun gürigia ligía, ábame ferudunawa lan figóu ligía.Bible Society of Honduras