Hosué9
Heyeeduniña Gabaónna Ísüraelina
1Sun meha urúeigu ha aganóubaña luéigiñe oubaü le ñeinhin lubéi lálüda weyu libiti Hordán dandu ha áraabubaña keisi ha luágubaña fulasu mawübüriti habu giñe sun ha lóubawagubaña Mediteraniu chülǘ Líwanu aba hasubudiruni agañeiruni le ladügübei Hosué. Urúeigu meha hagía harúeitegu Étüna, Amoruna, Kananna, Féresüna, Eweuna hama Hebusuna.2Ábati hebelurun lidoun úarani, aba hóundaragun lun hageindagun luma Hosué luma hama Ísüraelina.3Gama lumoun kei hasubudiruni Eweuna ha aganóubaña Gabaón le ladügübei Hosué lun uburugu Herikó luma Ai,4ábati háluahan heyeeduni. Aba híchaagun sayu to wéiyaaru, gueru le tagei diwéin wéiyaaru, héiriguaali ani áfadahouaali hawagun halügüniña burigü;5dáüguatiña giñe daüguaü tuma geidi binaduharu to áfadahouaaru, aba giñe hanügün fein mábeitu to hariñuruharu luagu héibugun.6Dan le hachülürünbei kianpu-ágeirugun Gilügáli, aba hariñagun lun Hosué luma houn Ísüraelina:—Lídangiñe fulasu díseti wayabin. Adüga humá aban daradu wama.7Hariñaga Ísüraelina houn:
—Háfuga ya yarafa woun haganawa, ida lubati wadügün aban daradu huma?8Hariñagati lun Hosué:
—Werederuba lun weseriwidun hun.
Aba lálügüdüniña:
—Kataün? Halíagiñe hiabin?9Aba hóunabun:
—Lídangiñe fulasu díseti wayabin ladüga waganbahan luagu Aburemei le Hubungiute. Aganbaadiwa luagu sun le ladügübei Ehiptu,10luma luagu le ladügübei houn biángubei urúeigu Amoruna loubafurugu duna Hordán, urúeigu hagía: Sihón lurúeite Esübón luma Ogu lurúeite Basán, le meha aganóubei Asütarótu.11Ligía hariñagunbei wábutigu hama wapaisanun woun: “Barǘ humá éigini, heiba le ñeinhin habéi: Hariñagame houn luagu wíchaaguba lan woungua lun weseriwidun houn ani busén wamá wadügün aban daradu hama”.12Dan le wáfuridunbei lun wayabin áluahaün, sǘgiru meha fein to, guentó mábeiha, hariñuru tugía.13Tiabin tagei diwéin to, iserigili meha dan le wéserunbarun diwéin lidoun, guentó héirigua. Ligiaméme giñe asuseredubei tun wadaüragun luma tun wageidin, ladüga lidise wéibugun.14Aba houchun Ísüraelina lídangiñe heigin Gabaónna, gama lumoun málügüdün hamuti Wabureme.15Ábati ladügün Hosué aban daradu lánina darangilaü hama, íchigeina lererun lun feruduna lani habagari; aba háfiñurun ha híbiri ábutigu Ísüraelina lun giñe ítara luba lan hadüga.16Ǘrüwa weyu lárigiñe, aba hasubudiruni Ísüraelina luagu habesinan lan Gabaónna, luagu yarafa lan houn haganawa.17Ábati háfuridun áluahaña Gabaónna, luagu lǘrüwan weyu, ligía hachülürün haburuguterugun le Gabaón, Kefirá, Beerotu luma Kiriatü-hearimü.18Gama lumoun máfaragun hamutiña Ísüraelina ladüga buga fiñuhaña lan ábutigu luagu liri Wabureme le Lubungiute Ísüraeli luagu feruduna habéi lan habagari.
Ligíati lébubei hagülülühan Ísüraelina hawagu hábutigu.19Gama lumoun hariñaga hábutigu houn:
—Fiñuhadiwa houn luagu liri Wabureme le Lubungiute Ísüraeli luagu máfaragun wabaña lan. Ligíati siñá lubéi wadügün ni kata hau guentó.20Gasu wígiruniña lun habagaridun, lugundun anhein wadüraagua fiñú, lagañiduba Bungiu wama.21Ítara liña lubeiti, aba hariñagun ábutigu Ísüraelina lun higirún lun habagaridun, gama lumoun lun lan hichugún lun háhinun luma lun hadaburagun duna houn sun Ísüraelina. Ítara liña madüraagun hamani ábutigu hererun guánarügü.22Aba lagúarun Hosué houn Gabaónna, aba lálügüdüniña:
—Ka uagu heyeedawa, hariñaga woun luagu dísegiñe lan hiabin, ani ya guánarügü haganawa?23Ladüga katei le, herederuba lábugiñe íñarawaguni ani músubadün súnwandan. Gasu háhinun watu, dabugua humeime duna le lunbei layusurun tidan luban Nubungiute.24Aba hóunabuni Hosué:
—Wadügünbalin ítara ladüga lueirin wanufude luéi báfaraguniwa, lugundun Aganbatiwa luagu ariñaga lan buga Aburemei le Hubungiute lun Moisesi, lun líchuguni fulasu le hun, luma lun lagünrinchaguniña sun ha aganóubaña ya.25Gama lumoun búhaburuguñadiwa; adügabéi baritagun wau.26Mígirunti lubeiti Hosué lun háfaraguniña Ísüraelina Gabaónna,27gama lumoun aba líchuguniña lun háhinun luma lun hadaburagun duna houn Ísüraelina luma lun lani Wabureme latarü, le ñein lumuti labusenra Wabureme. Chülǘ lumoun dan le, ligiamémegili hafisiute Gabaónna.
Bible Society of Honduras