Hosué7
Lifigoun Akán
1Gama lumoun ñeinñein aban hádangiñe lani Hudá türibu gíriti Akán, liráü Karümí, libari Sabüdí lílawa Sera, aba lanügün saragu katei lídangiñe le deregewaalibei lun lagünrinchawagun, lauti lira sun Ísüraelina gaduruntiña ligibugiñe Wabureme, ladüga hanügüni katei le uágubei ariñagaali lan lun lagünrinchawagun. Ligía lagañidunbei Wabureme hama.Lafayeiruaha figóu
2Óunahaali bugati Hosué bián wügüriña Herikógiñe, lun houdin chülǘ Ai le luéigiñebei oubaü le ñéingiñe lubéi laboucha weyu libiti Beteli yarafa lun Betü-awén lun haríaahani ida liña lan fulasu. Aba houdin ariheina haméi ida liña lan Ai,3dan le hagiribudun aba hariñagun lun Hosué:—Mama mosu woudin sun wagía lun wageindagun hama lílana Ai, buídurügütiña biama o ǘrüwa-milu wügüriña lun hárügüdüni uburugu. Móunahabaña sun gürigia, lugundun míbetiña ha óunigirubalin uburugu.4Ábati hamudeirun ǘrüwarügü-milu wügüriña ageindagua hama lílana Ai. Gama lumoun aba hagañeiruniña lílana Ai ani aba hanuraagüdüniña;5áfaratiña hawara darandi-sisi Ísüraelina ha híbirigu, aba héibaahaniña lúmagiñe lubenarigiñe uburugu darí fulasu le ñéingiñe lubéi lasagahóua dübü; lídanti hararirun aba háfaraguniña. Ligía lébubei heferidiruni Ísüraelina haguraasun, aba manigihaña lan.6Aba laheiridagunu Hosué hama ábutigu Ísüraelina hadaüragun, aba híchugun baligi hábulugu arufudei hagarigu, aba habuluchagun tigibugiñe lubagüsin Wabureme dagá herebe múarugu, darí lagumeserun aguñeda.7Lariñagaha Hosué:
—Nabureme! Kame buga san bánhiñuraguagüdei duna Hordán houn gürigia ha? Lun san bederegeruniwa houn Amoruna lun hagünrinchaguniwa? Rédeigubeihadiwa hamuga meha loubafurugu Hordán!8Nabureme! Kaba san nariñaga, guentó lau anurahaaña lan Ísüraelina hawéi háganiñu?9Hasubudirubei Kananna hama sun ha aganóubaña fulasurugu katei le asuseredubei, ábame hábürühan wawagun súngubei hagía, ítara meredebei ni aritawaguni wárigiñe. Kábameti ariñawagúa luagu lueirin biri?10Lóunabeiti Wabureme:
—Saraba, ka badügübei ñein múarugu?11Afigouhaaña Ísüraelina ani halagua hamá daradu le meha nadügübei hama. Barühaña lídangiñe burí katei le lúntibei yebe lagünrinchawagun, aba híweruhani subudiñu houn luagu hadügüña lan wuribati, aba haramuduni lidan hálagu.12Ligía siñabei lubéi hararamun Ísüraelina hagibugiñe háganiñu. Gasu hanurahan hawéi, hadüna Ísüraelina guentó, lun hagünrinchawagun. Ánheinti magünrinchagun humá furese le uágubei nariñaga lun lagünrinchawagun, merederundigiaadiname huma.13Saraba, óundaraguabaña gürigia. Ariñagabá houn lun harumadaguagüdün houngua lun harufudagun houngua nigibugiñe haruga, lugundun au, le Aburemeibei ani Habungiute Ísüraelina nariñahare: “Huguya Ísüraelina, barǘ humaali le lunbei lagünrinchawagun sunsuinagubei, ani anhein magünrinchagun humá ani fui humeime huáriua, siñabei hararamun hagibugiñe háganiñu”.14Harufudaguame hungua haruga, türibu luagu türibu, leme türibu le níridun ábame larufuduni kada aban hádangiñe hani külán, hame külán ha níridun, ábame harufudun tílana aban muna hame tílana muna ha níridun ábame harufudun aban hádangiñe hawügüriñanigu.15Lémeti gámati katei le yebe buga lúntibei lagünrinchawagun, ábame lagudún hau sun liduheñu ha tílana luban luma sun hamegen, luéigiñe ladügün aban katei le madünamati hadan Ísüraelina, luma luéigiñe magunfulirun lan luma lidaradun Wabureme.
Lounwen Akán
16Larugan, aba saragia lan Hosué, áluaheina laña gürigia según hani türibu. Aba líriduni Wabureme lani Hudá türibu;17hádangiñe lani Hudá türibu, aba hiridún lani Sera külán; hádangiñe wügüriña hadan lani Sera külán, aba liridún Sabüdí;18hádangiñe lánigu Sabüdí, aba liridún Akán le liráü Karümí, libari Sabüdí, lílawa Sera hádangiñe lani Hudá türibu.19Ábati lariñagun Hosué lun Akán:—Niráü, ruba uéiriguni lun Lubungiute Ísüraeli, lau bariñaguni katei le badügübei. Maramudabei nuéi!20Aba lóunabuni Akán:
—Inarüni, afigouhaadina ligibugiñe Lubungiute Ísüraeli. Anihán katei le nadügübei:21Lidan burí katei le Herikóbei, aba narihin aban manda Babilóniana, luma bián-san murusun seinsu le pülata luma aban murusun golu lóugiñe lamidan líburu lihürü. Aba lawamaadun nun, aba nanügüni, aba nábununi tábugiñe nikianpun, aba níchuguni seinsu ábugiñaün.22Aba lóunahan Hosué fiu wügüriña tidoun likianpun Akán, aba hadariruni sun le laramudubei ñein, lau pülata ábugiñaün.23Aba hanügüni, aba houdin lau lun Hosué luma houn Ísüraelina, aba harufuduni ligibugiñe Wabureme.24Lárigiñe aba hanügüni Akán lidoun fulasu wayati le gíribei Lamiselu lau sun pülata, manda, golu, lirahüñü, lilügüniña bágasu, burigü hama mudún, likianpun luma sun lílagu.25Aba lariñagun Hosué lun:
—Ka uagu banügei lamiselu le wawagun? Guentó, lábürügüdaali Wabureme lamiselu le banügübei wadoun buagun.
Kei lariñagun ítara, aba hachamuragun Ísüraelina dübü luagun Akán hau sun lánigu, lárigiñe aba háguduniña.26Lárigiñe aba híchugun bugan dübü ligibuagu, aniheinmémegua ítara. Ligía lébubei Fulasu Wayati lani Lamiselu lan líribei fulasu ligía chülǘ lumoun dan le. Ítara liña lagalumadun ligañi Wabureme houn Ísüraelina.
Bible Society of Honduras