Hosué4
Duusu dübü le abudúbei lídangiñe duna Hordán
1Lárigiñe lásurun hánhiñuraguni sun hagía Hordán, aba lariñagun Wabureme lun Hosué:2—Anuadirabá duusu wügüriña hádangiñe gürigia ha, aban lídangiñe kada türibu,3bariñagame houn lun hasagarun duusu dübü lamidangiñe duna le ñein lubéi rara hamá fádirigu, hanügeime híchigeime lidan fulasu le ñeinba lubéi hemeraagua áriebu le.4Ábati lagúarun Hosué houn duusu wügüriña ha lanúadahabaña,5lariñaga houn:—Belú humá dagá lamidoun Hordán, tigibugiñe lubagüsin Wabureme le Hubungiute, ábame líchugun kada aban hídangiñe aban dübü légewagun, aban dübü luagu kada lani Ísüraeli türibu, lun dúusubei lan dübü ligía.6Leseriwiduba hun lun danme lan le hálügüdünün hisaanigu líteme, ka lan mini lan dübü burí le,7ábame hóunabuniña: “Dan le tánhiñuragunbalin lubagüsina lidaradun Wabureme duna Hordán, aba lafanreinragun duna lidan biama tigibugiñe bágüsi. Dübü burí le, leseriwiduña lun haritaguagüleme Ísüraelina súnwandan luagu katei le meha asuseredubei ya”.8Aba hadügüni le uágubei lariñaga Hosué houn. Aba hanügün duusu dübü lídangiñe Hordán, aban luagu kada aban lani Ísüraeli türibu, aba hanügüni le ñeinhin tubéi kianpu-agei, aba híchuguni ñein, ítara kei buga lariñaguni Wabureme lun Hosué.9Dágüdati giñe Hosué dúusuya dübü lidan fulasu le ñein lubéi hararama fádirigu ha táubaña lubagüsina daradu. Aniheingua dübü ligía ñein dagá lumoun dan le. 10Aba herederun fádirigu ha táubaña lubagüsina daradu lamidan Hordán, sun añaha lan Ísüraelina adügei sun katei le uágubei lariñaga Wabureme houn liyumulugugiñe Hosué. Adüga hamuti sun katei kei bugaha lariñaguni Moisesi lun Hosué. Aba hásügürün gürigia furesegueina,11dan le chülühaña súngubei loubafurugun, aba hánhiñuragun fádirigu tau lubagüsin Wabureme, aba houdin habá habá sun gürigia.12Hiñugua hamuti giñe wuriburuguna ha hádangiñebaña lani Rubén türibu, lani Gadü hama lamidan lani Manasési türibu. Hiñuguatiña tau hárumate, habá habaañanu ha híbiri Ísüraelina, kei meha lariñaguni Moisesi houn.13Yarafañanu houn bián-wein-milu wügüriña tau hárumate aranseñu lun wuribu ásügürütiña ligibugiñe Wabureme, aba houdin lidoun fulasu burí le mawübüriti Herikó.14Lidan weyu ligía, aba ladügün Wabureme lun taweiridun hanigi sun Ísüraelina lau Hosué, inebe ligía houn, kei meha ladügün lun Moisesi lidan sun libagari.15Ábati lariñagun Wabureme lun Hosué:16—Ariñagabá houn fádirigu ha táubaña lubagüsina daradu, lun háfuridun lídangiñe Hordán.17Aba lariñagun Hosué houn lun háfuridun,18kei háfuridun fádirigu lídangiñe Hordán, aba híchuguni hagudi luagu fulasu mábeiti, ábaya lagumeserun duna éibaagua kéiñaha lubéi.19Weyu diisi lidan furumiñeti hati, ligía háfuridun Ísüraelina lídangiñe Hordán, aba hemeraagun Gilügáli, luéigiñe oubaü le ñéingiñe lubéi laboucha weyu libiti Herikó.20Ñein ladagaragüdei Hosué duusu dübü le hanügübei Hordangiñe,21aba lariñagun houn Ísüraelina:
—Líteme, danme le hálügüdünün hisaanigu ka lan mini lan dübü burí le,22habahüdagueime houn ida liña lan hánhiñuraguni Ísüraelina duna Hordán mábeiñu,23luma luagu ida liña lan lamabeidagüdüni Wabureme le Hubungiute duna Hordán dan le hánhiñuragun, ítara kei meha lamabeidagüdüni barana funati dan le wánhiñuragun.24Ítara luba hasubudiruni sun gürigia ubouagu lueirin lubafu Wabureme, ani huguya, híchuguba giñe inebesei lun Wabureme le Hubungiute súnwandan.
Bible Society of Honduras