Hobu14
1Gürigia le tagaraüdün würi, mabagariti saragu dan, ani buin liña lau idiheri.2Ítara liña kei aban fuluri adaaraguti, lárigiñe aba lounwen, ñéingiñe lásaüra; kei lásügürün aban lamuñounga, lárigiñe aba lagumuchagun.3Ani ru baaliti barihin luagun gürigia le, busén buguya banügüni lidoun guséi?4Úati ni aban gayaraati lasagarun arumani lídangiñe iwiyei.5Anhein buguya lubéi ariñagubalin átiribei lan dan labagaridun gürigia, ru buguya aban dan le lásiñarun ásügüra.6Gidabei barihin luéigiñe, ígirabei lungua; ígirabei lun lawinwanduni libagari keisi nadagimeinti luagu fáyeiti!7Dan le lachugún aban tídibu wewe, gayaraagiliya láhüchagun.8Íbini wéiyaali lan tílagüle ani lañaladuña lan tugudina múarugu,9dan lasandiruni lidili duna, hüchaguayati; ábaya labouchun lilimun kei nadü iseri.10Ánhañati gürigia, lárigiñe hounwen, haliñounyabagia houdin?11Gayaraati lagumuchagun lidunari barana, gayaraati giñe lamabeidun burí duna éibaaguati;12gama lumoun sun anihagua lanme sielu, másaarunbaña gürigia lídangiñe hamúaha magagudunbaña giñe lídangiñe hadabagu.13Gúndaatina hamuga lun baramudunina lidan umúahaü darí lásügürün bigañi, ariñagabéi hamuga ídaba lan baritagua nuagun!14Anhein ounwe gürigia, labagaridayaba san? Nagurabahañein hamuga sun dan le ladurarun neseriwidun, darí nawalidagun lídangiñe nilamiserun.15Bagúaruña hamuga nun, aba hamugati nóunabunibu, barihiña hamuga nuagun lau ínsiñeni lugundun buguya adügübalina.16Anhein aríaaha bubalin kada aban lídangiñe némeri meberesentibu hamuga lau nifigoun;17babulieiduñein hamuga burí nidurun, aba hamuga barumadagüdünina lídangiñe.18Íbini burí wübü chülüti dan lun lagululudagun, sánsigua ligía lufulasun dübü.19Ítara kei lagumuchaguagüdüni duna dübü, aduruuhalei huya kaliki múarugugiñe, ítara liña bagünrinchaguni hemenigin gürigia!20Gañei bumuti lidan bawuribuhan luma, bugá bumuti lumúanrugugiñe, aba lidin lau luriban laríawagun.21Ánhaña ibiha lisaanigu uéiriguni, mefenti luagu; ánhaña ábürüha lidoun lamiselu, mefenti giñe luagu;22ligarigurügüñein lúgubu guánarügü, luma lasufurirun lasandira.
Bible Society of Honduras