Heremíasi46
Leferidiruni Ehiptu wuribu Karükémisi
1Aba ladimurehan Aburemei lun Heremíasi habügürü néchanigu.2Anihán uganu le lariñagubei libügürü Ehiptu, hawagutima lisudaranigu Nekáu, le lurúeite Ehiptu le Karükémisibei lubadu duna le Éufüratesi, ligía urúei le láfarahabei Nabukodonosoru le lurúeite Babilónia lidan ligadürün lirumudiri larúeihan Hoakimü le liráü Hosíasi, le lurúeite Hudá:3«Aranse huméi idaüdinaü! Ábürüha humá hawagun!4Sádili humaña gabayu! Warí humá, agalufehatiña! Daü huméi hubunidin le lánina wuribu, úaragua humá! Yará huméi tígiri higimaran! Daü humóun hadaüragun lánina wuribu!5«Gama lumoun ka san le narihibei? Habakürüña hárigoun buin lau anufudei. Baragua wuriburuguna, heferidiruñein wuribu! Aba háfuridun wuriburugugiñe éibaagueina madigiragunga hárigoun, hanufudeugati lidan sun fulasu! Au, le Aburemei ariñagubalin.6Manurahadügü hamá ha óufutimabaña, manurunbaña giñe ha ganigitimabaña ladüga luéigiñe nórute libiti duna Éufüratesi hachugeraguba lun héiguadun.7Katei san le, le iñurubei kei liñurun duna Nilu, kei aban duna le aguribihati le lere?8Ehiptu le, le iñurubei kei liñurun duna Nilu, kei aban duna le aguribihati le lere. Lariñahare Ehiptu: “Niñura, lun nabuluchuni ubóu, nagünrinchaguaali burí uburugu hau sun lílana”.9«Awanse hamá súdaragu ha gabayuagutiña! Tubaruaguountá karü! Awanse hamá wuriburuguna: lisudaranigu Etiopía luma Liwia tau hadaüdina; lisudaranigu Lidia, ha gachüühadibaña gimara».10Luéyuri Aburemei Suntigabafu le, weyu le lunbei láguyugüdüni wuribati houn láganiñu luagu le hadügübei lun. Táchuahaba eféin darime lun takimuledun, darime giñe lun tabacharuadun lau hitaü. Ladüga ladügüba Aburemei aban áfarahani lidan ageiraü le luéigiñebei nórute, lóubawagu duna Éufüratesi».11«Lílana Ehiptu, heiba Galaadü áluaha árani! Gama lumoun gayaraabei hayusuruni sun árani le hiyaraati, úabei hu lan hun, lugundun máraninaadün!12Subudi hamaali néchanigu luagu ǘnabugüdawaadün lan, ani aganbúati hagúarahan lidan sun fulasu; buguguatiña wuriburuguna hawougua aba habalabahoun múarugun úara».Lábürühan Nabukodonosoru luagun Ehiptu
13Aba ladimurehan Aburemei lun profeta Heremíasi dan le lídinbei Nabukodonosoru, le lurúeite Babilónia lun lageindagun luma Ehiptu.14«Aganbagüda humá uburugu Ehiptu, Migüdólu, Ménfisi luma Táfünesi ítara: “Aranseñu humá! Anuhán eféin lun tagünrinchaguni bageira bau!”15Ka uagu lanuraha Apisü, le bubagasun le sagüráubei? Ka uagu merederun lubéi rara? Ladüga náhuchuruni, au, le Aburemei.16Chugeguatiña bisudaranigu hawougua, aba hariñagun hóuniwagua: “Keimoun yáagiñe, giribu hamá wageiroun; lidoun ageiraü le ñein lubéi wagaraüdǘwa! Anuraha wamá luéi lanarime wuribu!”17«Chagua huméi urúei Ehiptuna lau nikinému le: “Dabarasi gamuriti lárigiñe dan”.18Au, le Urúeibei ani Aburemei le Suntigabafu níribei. Fiñutina luagu nibagari kei liñun wübü Taworu labadinagua áraabu ani kei liñun dabíara Karümélu luéi barana, ítara luba lanarime lubafu ágani le lunbei liabin.19Aranse humá lubá hasagarún hageiragiñe, lílana Ehiptu, lerederuba Ménfisi málouga, úouga aganóutiña ñein.20Tenege aban bágasu ñǘraügiru to magadiñetu Ehiptu, gama lumoun anute aban gunga luéigiñe nórute ásüroun.21Ítara haña bisudaranigu kei bágasu wügüriña ha dibunetiña, gama lumoun íbini hagía hanurahaba giñe, mawandunbaña, lugundun aniteeli luéyuri lamiselu, lóurate habeichawaguniwa.22Lanurahaba Ehiptu íñaaheina kei aban hewe danme hayarafadun súdaragu ageindagua tuma tau harawa, kamá hamuga háchuahaña tídibu wewe.23Háchuahabei hadabiaran le hilumabei! Au, le Aburemei ariñagubalin. Gíbetiña sügǘ hau chagagaru, siñati habahüdǘn.24Lǘnabudagüdüwaba Ehiptu, lábürühaba háhaburugun lílana nórute».25Lariñahare Aburemei Suntigabafu, le Lubungiute Ísüraeli:—Labeichubei Amón, lubungiute Tébasi, Ehiptu hau sun lubungiutegu hama lurúeitegu, urúei Ehiptuna hama ha hemenigibaña luagu.26Nábürügüdübaña háhaburugun háganiñu, lúhaburugun Nabukodonosoru le lurúeite Babilónia hama lumutuniña. Gama lumoun átirime dan lárigiñe, ñéinyabaña aganóutiña Ehiptu. Au, le Aburemei, ariñagubalin.
Lesefurubaña Wabureme lumutuniña
27“Manufudeda humá, lánigu Hakobu, nubúein, manufudedabá Ísüraeli. Ladüga buguya hau sun birahüñü, nesefurubadün lídangiñe ageiraü díseti le, le ñeinhin lubéi hanügǘwa hageiragiñe. Babagaridayaba darangilu, úouga anufudedaguagüdütibu.28Nariñahare au, le Aburemei: Manufudedabá Hakobu, nubúein, lugundun anahein buma. Nagünrinchagubaña sun néchanigu ha ídounbaña nachagarabu. Gama lumoun buguya, magünrinchagun nubadibu; béirügü nubadibu keisi badüna; mígirun nubadibu mabeichúnga”.Bible Society of Honduras