Heremíasi39
Lábürühan Herusalén
1Lidan lidiisin hati lidan linefun lirumudiri larúeihan urúei Sedekíasi Hudá, aba lidin urúei Nabukodonosoru hau sun lisudaranigu ageindagua luma Herusalén, aba legeyedaguni.2Weyu nefu lidan ligadürün hati lidan liunsun lirumudiri lagumadihan Sedekíasi, ligía hebelurun súdaragu ha áganiñu uburugun,3aba hebelurun sun lisudaranigu lurúeite Babilónia ha íñugutimabaña aba herederun luéigiñe bena le lamidanguabei uburugu. Nerügáli-sareserü, Samügárü-nebu Sarüsekímü, lánigu urúei ha íñugutiña luma ábaya Nerügáli-sareserü, aba giñe hádangiñe lánigu urúei le íñuguti.4Dan larihinbalin urúei Sedekíasi hama lisudaranigu le suserebei, aba hanurahan uburugugiñe. Aba háfuridun áriebu luéigiñe lémeri tufulurin-agei palasiu, lídangiñe bena le labadinaguabei bián baríeiru, aba hárügüdüni lémeri fulasu le mawübüriti le lani Hordán.5Gama lumoun aba héibaahaniña súdaragu Kalüdéana aba hárügüdüni Sedekíasi lidan fulasu mawübüriti le lani Herikó. Aba hanügüni ligibugiñoun urúei Nabukodonosoru uburugun Ribülá lumúanrugu Amatü. Aba lasiadiruni Nabukodonosoru ñein. Aba ladürühagüdüni hachügü lirahüñü Sedekíasi liñúarü háguchi luma giñe hachügü sun lúrudugu Hudá.7Aba lasagaragüdüni lagu Sedekíasi, aba hagüraguni lau güringüri, aba hanügüni Babilónioun.8Aba hágudunu Kalüdéana lani urúei palasiu, tuma burí muna to uburuguboun, aba háguruni lubarieirun Herusalén.9Lárigiñe, aba lanügüniña Nebusaradán, le gumadan tani tufurisuna luban urúei, dandu lílana uburugu ha erederubaña, kei ha ásügürübaña hamoun Kalüdéana Babilónioun, sun lílana fulasu.10Fiúrügüñanu hádangiñe ha gudemetimabaña lígira lumúanrugu Hudá, ha úabei ni kata hama, weyu ligía, aba líchugun beibei-agei luma ichari houn lun hábunaguni.Lígiragüdüniwa Heremíasi
11Aba lariñagun Nabukodonosoru le lurúeite Babilónia lun Nebusaradán, le gumadan tani furisun libügürü Heremíasi:12—Góunigibei, móuserabei wuriba, rúrügübei sun le lamuriahan buma lun.13Ábati lóunahan Nebusaradán, úara luma Nebusasübán luma Nerügáli-sareserü bián lani urúei úfisigu íñugutiña hama sun lani lurúeite Babilónia úfisigu14asagarei Heremíasi tibürürünrugúgiñe furisun, aba híchuguni lábugiñe lóunigihan Gedalíasi, le liráü Aikamü, libari Safán, lun lanügüni lúbiñoun. Aba lubeiti lerederun Heremíasi aganawa hadan lílana fulasu.Füramasei lun Ewedi-mélekü
15Dan buga anihagua lan Heremíasi, adaürǘwa tibürürünrugu furisun, aba ladimurehan Aburemei luma, lariñaga lun:16—Beiba, bariñagame lun Ewedi-mélekü, le Etiopíana: “Lariñahare Aburemei Suntigabafu, le Lubungiute Ísüraeli: Nagunfulirubei le nariñagubei libügürü uburugu le, lun liabin wuribani houn, mama lun liabin buidu, ñéinbadibu danme lasuseredun katei le.17Gama lumoun nesefurubadibu lun mábürühan ban háhaburugun gürigia ha, ha uéibaña banufudeda.18Nesefurubadibu luéi háfarunibu hilagubei. Besefuruba lau ibagari, ladüga hemenigitibu nuagu. Au, le Aburemei ariñagubalin”.Bible Society of Honduras