Heremíasi33
Füramasei lánina emenigini
1Sun anihagua lan Heremíasi adaürǘwa lidan tibürürün furisun, ábaya ladimurehan Aburemei luma, lariñaga lun:2—Nariñahare bun, au, le Aburemei le adügübalin ubóu, aba níchuguni lidan lubara:3Waba nuagu, ábame nóunabunibu, ábame narufudun katei wéinamuburiti ani aramudaguati bun, le ibidiñeti bun.4Au, le Aburemei, le Lubungiute Ísüraeli, anihein aban uganu numa tibügürü burí muna to Herusalénboun tuma burí haban urúeigu to lunboun tagurún. Le hadügübei lau háfuridun ageindagua hama Kalüdéana tau eféin, leseriwidarügüba lun labuinchun hageira hau hilaaña. Au, lau lanarime nigañi, nadügüba lun hóunwegun, lugundun gidá naali narihin luéi uburugu le, ladüga saragu wuribani le adüga hamaalibei.6Gama lumoun nagaranihaba houn, ábame nadügün lun habagaridun lidan darangilaü luma achoururuni.7Nasansirubei lubunurun Hudá luma Ísüraeli, ábame nararamagüdüniya lun ítara lan burí kei meha furumiñe.8Narumadagüdübaña lídangiñe sun figóu le hadügübei kóntüra au; feruduna sun wuribani le hadügübei, le aubei hiñuragua houngua nuagun.9Ábanbei lébuna ugundani Herusalén nun, lébunabei uéiriguni luma inebesei hagibugiñe sun néchanigu ha ubouagubaña. Danme haganbun ladimurehoun luagu sun lubuiduniga luma awanseruni le lunbei nanügüni houn lílana Herusalén, hadadagaruba lau anufudei.10Lariñahare Aburemei:—Huguya, ariñagatün luagu málaali lan fulasu le, luagu úaaña lan gürigia ni animaalugu ñein; luagu málaali lan burí lémeri Herusalén luma burí luburugute Hudá; luagu maganóun hamá ni gürigia, ni animaalugu ñein. Laganbúayaba lubeiti11uremu lánina fedu luma ugundani, luma heremuhan adarigu, laganbúba lariñawagún: “Ru humá eteingiruni lun Bungiu Suntigabafu, lugundun buiti Wabureme, lugundun magumuchaditi línsiñehabu”. Ábame hanügün idewesei lánina eteingiruni ténpulurugun. Nasansirubei habunurun lílana ageiraü le, lun ítaraya hamá kei meha furumiñe. Au, le Aburemei ariñagubalin.12Lariñahare Aburemei Suntigabafu:
—Lidan ageiraü le, le málabei guentó, le ñein lubéi ua hamá gürigia ni animaalugu lidan sun luburugute, láhüchayaba sagadi lun hanügüniña hóuniri mudún habiñanigu éigagüda ñein.13Harihúayaba hóuniri mudún abahüda mudún dandu lidan burí uburugu le lídanbei fulasu le gawübüribei, kei lidan le úaraguabei, luma lidan Négebü luma lidan lumúan Benhamín, luma lidan burí líbiri luburugute Hudá. Au, le Aburemei, ariñagubalin.14Lariñahare Wabureme:
—Lachülürüba weyu lun nagunfuliruni füramasei le lánina abiniruni le nadügübei houn Ísüraelina hama lánigu Hudá.15Danme lachülürün dan ligía luma weyu ligía, nadügüba lun gadügawagun lan Dawidi aban le tímatimaati, le lunbei ladügün irichaü luma úaraguni fulasurugu.16Lídanme dan ligía, chóuruñu luba habagaridun Hudaana, hama Herusalénna. Hariñagameti: “Aburemei warichabei”.17Au le Aburemei, nariñahare: Súnwandan ñeinbei lan aban ladügawagun Dawidi arúeiha Ísüraeli,18súnwandan giñe ñéinbaña lan fádirigu ladügawagun Lewí lun hadagaragüdün nun sagü weyu.19Aba ladimurehan Aburemei lun Heremíasi, Lariñaga lun:20—Nariñahare, au le Aburemei: Siñati magunfulirun lan daradu le nadügübei luma wéyuagu labu luma áriebu, lun lerederun láfuachun kada aban lidan lidaani.21Ítarameme siñá lan magunfulirun lan daradu le buga nadügübei luma Dawidi, ani lun úabei lan aban ladügawagun lun lañuurun luagu lálana larúeihan, o magunfulirun lan nidaradun hama nufadirinigu ha ladügawagun Lewí.22Ani nadügüba lun hagibedagun ladügawagun Dawidi hama fádirigu ha ladügawagun Lewí kei waruguma ha siélubaña, luma kei sagoun le lárubei beya le siñabei labahüdǘn.23Aba ladimurehan Aburemei lun Heremíasi, lariñaga lun:24—Maganbun bágili san le hadimurehabei gürigia, luagu nege fui naaña lan bián iduheñu ha guánarügü nanúadirubaña, Ísüraeli luma Hudá? Ligía lébubei híchugun mebereseni hawagun numutuniña, manügün hamaña keisi néchani.25Nariñahare au, le Aburemei: Au le adügaalibei aban daradu luma wéyuagu labu luma áriebu, runei lúrudu le lunbei lagumadihan sielu luma ubouagu,26mágurun nubaña ladügawagun Dawidi, mígirunneime níchugun hádanguagiñe ha lúntiña hagumadiruniña ladügawagun Abüraámü, Isaakü luma Hakobu. Lugundun gudemehabubadina houn, ani nasansirubei habunurun.
Bible Society of Honduras