Heremíasi24
Faniñe tau burí igu
1Lárigiñebei lanügüni Nabukodonosoru le lurúeite Babilónia Hekoníasi le liráü Hoakimü lidoun amu ageiraü úara hama lábutigu Hudá, sarafangei hama nadagimeintiña gürabu, aba larufudun Aburemei bián faniñe tau igu nun tigibugiñe ténpulu.2Lidan aban faniñe, ñeinñoun burí igu to buitu to furumiñetu áfunadutu, ánhounti to lídanboun le aban faniñe wuribaburitu, wéiriti turiban darí lun siñá lan teigín.3Ábati lariñagun Aburemei nun:—Ka barihubei Heremíasi?
Nariñaga lun:
—Igu burí. To buíduburiboun wéiriti tubuidun; gama lumoun, to wuribaburiboun wéiriti turiban darí lun siñá lan teigín.4Ábati lariñagun Aburemei nun:5—Nariñahare au, le Aburemei, le Lubungiute Ísüraeli: Kei igu to burí buíduboun ítara luba narihiniña lílana Hudá, ha nasagaragüdübaña yáagiñe hageiroun Kalüdéana. Narihubaña lau fuleseihabu,6lábugiñebaña nóunigirun, nagiribudagüdübaña lidoun fulasu le. Nawanseragüdübaña ya, magünrinchagun náañame; nábunagubaña, máhulaagun náañame.7Níchuguba gunfurandaü hadoun lun hasubudiruni luagu au lan Haburemebei, hagíaba nánigu, aume Habungiute, ladüga hagiribuduba nun tau sun hanigi.8—Ánheinti Sedekíasi le lurúeite Hudá, ábutigu hama híbiri lílana Herusalén ha erederubaña lidan fulasu ligía o ha erederubaña aganawa Ehiptu, nóuserubaña kei igu to siñabei teigín ladüga lueirin turiban.9Nadügüba aban katei hau le lunbei líchugun anufudei hadan sun lílana ubóu, ábanbei hénpulu lánina ǘnabuguni, luma íñarawaguni lidan sun fulasu le ñéinhinba lubéi nachagaraña.10Nóunahaba wuribu hawagun, ilamaü luma sandi, darime lun merede lan ni aban hádangiñe fulasurugu lidan fulasu le níchugubei houn luma houn hagüchagu.
Bible Society of Honduras