Heremíasi21
Ladimurehóuniwa abeichúni lun Heremíasi
1Aba lóunahani urúei Sedekíasi Pasuru, le liráü Malükíasi luma fádiri Sofoníasi le liráü Maseíasi ariñaga lun Heremíasi:—Adügabá fulesei nun, álügüdahaba luma Aburemei wawagu, lugundun lageindaguña Nabukodonosoru le lurúeite Babilónia wama. Lúndügü ladügün Aburemei aban lídangiñe lani burí milaguru lun lígiruniwa Nabukodonosoru woungua.
Ábati ladimurehan Aburemei lun Heremíasi,3aba lariñagun Heremíasi houn lóunagülegu Sedekíasi:
—Ariñaga humá lun Sedekíasi4luagu lariñahare lan Aburemei, le Lubungiute Ísüraeli: «Nagiribudagüdaaña hisudaranigu ha bóugudibaña luéi baríeiru ageindagua luma lurúeite Babilónia hama Kalüdéana, ábame nóundaruniña lamidangua uburugu le.5Au guánarügüba ageindagua kóntüra huguya lau saragu ubafu luma óunwenbu lanarime igañi.6Náfaragubaña sun lílana uburugu le; hóunweguba wügüriña hama animaalugu lau aban lanarime sandi.7Lárigiñe ábame nederegeruni Sedekíasi le lurúeite Hudá lúhaburugun Nabukodonosoru luma háhaburugun híbiri láganiñu hau sun ha arúeihabaña luma, lisudaranigu hama gürigia ha erederutiña wínwanñu uburugu lárigiñe sandi, wuribu, luma ilamaü, nadügüba lun háfaraguniña tau eféin magudemehabuga. Au, le Aburemei, ariñagubalin.8—Ariñagabá giñe houn gürigia luagu nariñahare lan au, le Aburemei: Anihán lémeri ibagari luma lémeri óunweni higibugiñe lun hanúadiruni le habusenrun lídangiñe biángubei.9Le erederuti ya uburugu, lóunweba wuriburugu, o lau ilamaü o lau sandi. Ánheinti le áfuriduti lun lederegeragun lungua houn Kalüdéana ha ageindagubaña hama lílana uburugu guentó, móunwenbei; lesefurubei libagari.10Ladüga aransedina lun nanügün wuribani leweñegua buiti luagun uburugu le. Nederegerubei lun lurúeite Babilónia, ábame láguduni. Au le Aburemei ariñagubalin.
Ñunsu kóntüra lurúeite Hudá
11—Ariñagabá houn tílana luban urúei Dawidi nariñahare lan:Aganba huméi luganute Bungiu. Adüga huméi le richabei sagü weyu; sefu humaña gudemetiña hawéi ha íchugubaña lidere dan houn, durunguadügüliñein nigañi luagu luriban hóuserun kei aban watu gemeti úougame kaba lan gayara léñeguchuni.
Ladimurehoun labeichúniwa Herusalén
13«Nageindaguba kóntüra uburugu Herusalén le ariñagubei séfuñu waña, úabei aguuruti wawagu ya.14Nabeichubadün keisi ladüna hóuserun. Nébedubei dabíara le hageirabei, ábame lágudun sun geyegua lau. Au, le Aburemei, ariñagubalin».Bible Society of Honduras