Heremíasi14
Lueirin lumabeinga
1Ladüga lueirin lumabeiniga, aba ladimurehan Aburemei lun Heremíasi, lariñaga lun:2«Layahuña Hudá lau íruni, híruti sun burí luburugute, roun haña burí gürigia múarugu. Wáguati Herusalén le lánina igarigu.3Óunaha hamutiña rísitiña hamusuniña áluaha duna; ñǘdüntiña musu fúsurugu, gama lumoun madaritiña duna, aba hagiribudun lau hágeidina málouga; aba hadouragun lau hachügü le habusigari.4Daruguatiña ábunagutiña nadü lau hábulugu ladüga máhuyun lan huya, ani mábeiti múa.5Íbini usari áraabu, ígira hamutiña harahüñü ha sun liña hemeilihóun, ladüga úati sagadi lun heigin.6Ráramatiña burigü áraabuna luagu burí wübü mábeiti ata garabali kei ounli áraabuna, aba laburigadun harihin ladüga lúan sagadi lun heigin».Lagúaruni profeta Wabureme luagu fulasu
7Nabureme, lau sun arufuda lániwa wafigoun keisi gaduruntiña, luagu luéirigun biri, arihabá wawagun! Charaadiwa bun saragu, afigouhaadiwa bigibugiñe.8Lemenigin Ísüraeli, wasalbaragüle lidan lénrengunga, ka uagu bóusera kei aban terencha fulasurugu, kei aban gaweiyasunti le rédeirügüti ásügüra aban áriebu?9Ka uagu beredera kei aban gürigia bulíeiguaali, kei aban wuriburuguna le siñati lídehan? Gama lumoun Nabureme, abunhein wama, subudi hamuti súngubei luagu bánigu lan wagía. Mígirabawa!10Lariñahare Aburemei libügürü Ísüraeli:—Hésebetiña gürigia ha yagüroun yaroun. Ligía magundan nubéi hau. Guentó, naritagua luagu hafigoun, nafayeiragüdaaña luagu.11Lariñaga Aburemei nun:
—Mayumuraguabá nun luagu buiti houn gürigia ha.12Íbini hayunarun saragu, maganbun nubéi hayumuragun; íbini hanügün saragu adagaragüdüni le gudawarügüti luma idewesei le fulúaruauti nun, magundaarunbadina lau. Nagumuchaguagüdaaña lau wuribu, ilamaü luma sandi.13Aba nóunabuni:
—Gama lumoun, Nabureme; añahán profetagu ariñaga houn gürigia luagu úabei lan wuribu ni ilamaü, ani bíchuguba lan darangilaü magumuchaditi houn lidan fulasu le.14Ábati lariñagun Aburemei nun:
—Anhein ligía lubéi hariñagubei profetagu lidan niri, heyeehaña. Móunahan numutiña, mariñagun au ni kata houn, madimurehangubeitina houn. Uénedü yeeti sun lira, katei le burí hadüga houngua, hasaminan houngua, ligía le hariñagunbei profetagu houn.15Nariñahare au, le Aburemei, hawagu profetagu ha ariñagubaña luagu lidan lan niri hadimureha móunahanganaña, ani ariñaga hagía luagu úabei lan wuribu ni ilamaü lidan fulasu le: Hóunweguba profetagu hagía ladüga wuribu luma ilamaü.16Gürigia ha únbaña hadimureha, hóunweguba giñe ladüga wuribu luma ilamaü hau sun hámarigu hama hasaanigu. Hachagarúba hilaaña lidan burí lémeri Herusalén, úabei kaba lan ábunaña. Ítara luba nafayeiragüdüniña luagu hariban.17Ariñagabéi katei le houn gürigia:
«Lésehaba águiraü nágurugugiñe wéyuagu áriebu, luagu lueirin lásügürün nageira, ladüga lueirin wounu le luágubei.18Nidin áraabu, añaha ha óunwegubaña wuriburugu; nebelura uburugun, añaha gürigia óunwegua halama. Íbini profetagu hama fádirigu, ñǘdünguatiña lidoun fulasu le ibidiñeti houn».
Layanuhan profeta lun Wabureme
19«Wabureme, fui baali san Hudá le tímatimaati? Buchá san buagu lubá uburugu Sión? Ka uagu bíchiga sandi mareidaguaditi wawagu? Agurabatiwa yebe darangilaü, gama lumoun miábinti ni kata buiti woun, agurabatiwa átuadi liábinrüga anufudei.20Ariha wamuti wariban luma hadurun wagüchagu; afigouhaadiwa bigibugiñe, Aburemei.21Luagu luéirigun biri, mágurabawa; móuserabei uburugu le ñein lubéi lálana barúeihan lau mebereseni.22Anihein funagia aban hádangiñe guáriuagu le gayaraati láhuyagüdün huya? Sielu guánarügü funagia áhuyagüdübei huya? Uá, Wabureme, Wabungiute! Buguya óunahabalin huya; buguya adügübalin sun katei le, ligía wemenigidúnbei buagu».Bible Society of Honduras