Isaíasi62
1Ladüga nínsiñehabu bun, Sión, mámanichunbadina; ladüga nínsiñehabu bun, Herusalén, memeraagunbadina darime lámiridun bagañeirun kei larugadun luma besefurun kei aban tochi durunguati.2Harihubei néchanigu besefurun, harihubei sun urúeigu buéirigun. Ábameti líchugun Bungiu aban iri iseri buagu.3Ábanbadibu lubuidunmeraü liridin urúei lúhaburugu Aburemei.4Mariñawagúnhalime bun «Igirúaaru» mariñawagúnme lun bumúan «Günrinwaguaali», «To hínsiñetimaboun nun» ligíaba biri, «Nani weiriou», ligíaba liri bageira. Ladüga buguya hínsiñetimabei lun Aburemei, ani ítara luba Aburemei kei aban úmari lun bageira.5Lugundun ítara kei lamarieidun aban wügüri tuma ladari, ítara luba giñe lanügünibu Bungiu lúmarime, lararamagüdayabadibu ábame gundan lan buma, kei lugundan wügüri tuma lúmari.6Herusalén, rúhadina óunigirutiña luagu burí bubarieirun, ha nibei wéyuagu ni áriebu meredeti hariñagun: «Ha agúahabalin Aburemei, meredera hamá maniñu,7mígira huméi lun lemeraagun darime lararamagüdüni Herusalén lárigoun, ani eremuha hagíame sun gürigia lun».8Fiñuhali Aburemei lau liñuruni larüna gabafuti le lóunwenren: «Mígirundigiaadina lun héigini báganiñu bitürigun, ni lun hátuni terencha buniñe diwéin to badügüboun lau buadigimari;9huguya guánarügüba alubaha, ábame héigini le halubahabei, ábame heremuhan nun; halubahaboun beibei ábame hátunu diwéin lidan tibürürün nitenpulun to sánduboun».10Furí humá, furí humá lídangiñe bena, aranse huméi üma habá numutuniña, úaraguagüda huméi émeri, gidagua huméi dübü luéigiñe, iñura huméi seini lun hagúarun houn néchanigu.11Adimureha lumuti Aburemei katei le chülǘ lumoun lígirugu ubóu: «Ariñaga humá lun uburugu Sión luagu chülühali lan lesefuragüle. Ñǘbuintiña lumutuniña ha lesefurubaña luma».12Lariñawagúba houn Ísüraelina «Gürigia Sándutiña». «Ha lesefurubaña Aburemei». Lariñawagúame lun Herusalén, «Uburugu Ayumahóuati», «Uburugu Migirúnti».
Bible Society of Honduras