Isaíasi59
Lidurun luma labeichún Ísüraeli
1Malouguadungili lubafu Bungiu lun mesefuhanhaali lan, mamaganbadidun ligía lun lásiñaruba lan laganbun.2Gama lumoun fánreinguagüda laadün huriban luma Bungiu, adügaali hifigoun lun ladouragun Bungiu lau ligibu, luma lun lamaharun laganbunün.3Dáseiñu liña húhabu lau hitaü, dáseiñu hifinga lau áfarahani; adimurehati hiyuma iyeeni, ariñaga hiñeñe wuribani.4Úati ariñaguti katei richati hidan, ua ligía aguseragüdüti lau arumani. Afiñetimatün luagu iyeeni luma burí dimurei málati; dageinañadün wuribani, háguraha áfarahani.5Emeilihatün tigañén hewe, adaagua huguya hágüra gúnrenren; le éigitiña gañé hagía, hilati, ánhaña aburechawagúa, aba háfuridun hewe péisinitiña hádangiñe.6Madügǘntu daüguaü lau hágüra gúnrenren ligia; siñati ladaüragun ni aban lau le háhüchagubei. Sun le hadügübei lánina áfarahani, lun ladügün háhabu wuribani luadigimarida.7Lun héibaagun adüga wuribani leseriwida hagudi houn, lun hóufudahan áwiyura hitaü le hata maduruntiña. Luagu áfarahani hasaminara, günringuaürügüñein hígira hárigiñe.8Ibidiñeti lémeri darangilaü houn, úati ísuruni lidan hóuserun. Segeti üma burí le hafalarubei; ha éibugubaña lidan üma ligía, madaritiña darangilaü.9Ligía díseeli lubéi esefuruni wawéi, mayarafadunti esefuruni woun; agurabatiwa yebe larugounga, aba liabin luburiga, agurabatiwa yebe lanpu, gama lumoun lídanñadiwa meha luburiga.10Adandiaharügü wéibuga kei marihintiña lubadu touba muna, kamá hamuga mágutiwa. Chugeguatiwa wéyuagu kamá hamuga áriebuhaali; lau sun gátuadi wamá, kamá hamuga hilaadiwa.11Agülülühatiwa sun wagía kamá osu, áünhatiwa kei unhun; agurabatiwa irichaü gama lumoun miábinti; aguraba wamuti esefuruni gama lumoun díseti wawéi.12Anabagua wamaadibu saragu, arufuda lumuti wafigoun guánarügü wadurun, aríagu waña lun wadurun, ani subudi wamuti wariban.13Mabuchahatiwa meha ani magunfulin wagía luma Aburemei, máhatiwa buga wafalaruni Wabungiute, adimurehaadiwa luagu anarimeni luma agarabaaguni aransehaadiwa lun weyeeraguniña híbiri.14Rúhadiwa mebereseni luagu irichaü, díseti úaraguni wawéi, chugeguati inarüni luagu párüke, siñati larufudagun arumani lungua.15Gumugua inarüni, éibaahouatiña ha adisedutiña luéi wuribani.Gáñihali Bungiu lau larihin luagu ua lan richaguaü.16Wéiritu lanigi lau larihin luagu ua lan ni aban íderaguti lumutuniña; ábati lanügün esefuruni lau lubafu guánarügü, aba lagañeirun, ladüga ligía lan Bungiu le richaguabei.17Daruguati laugua lau agañeiruni kei tau aban daüguaü lánina wuribu, daü lumuti esefuruni kei aban bunidi lánina wuribu, dáüguati lau láguyugüdüniwa wuribani kei tau aban dúnigu, hóuburaguati lungua lau igañi kei tau aban manda.18Lafayeirubei Bungiu le ladünabei kada aban lun; labeichagubaña láganiñu. Líchugubei le hadünabei, ha iyereehabúbaña lun houn, líchugubei giñe houn ha aganóubaña luagu burí ubouhu.19Sunme gürigia lúmagiñe oubaü le ñéingiñe lubéi laboucha weyu lumoun le ñeinhin lubéi lálüda, linebeduba Aburemei houn danme harihini luéirigun. Lugundun liábinba kei aban duna afuluduhati le liñuraguagüdün aban garabali héreti.20Liábinba keisi lesefuragüle Sión hama sun ladügawagun Hakobu ha asakürihatiña lídangiñe hafigoun. Bungiu ariñagubalin.21Lariñahare Bungiu: «Adügatina aban daradu huma, ani füramasetina hun luagu madisedunbei lan nubafu ni arufudahani le ru naalibei hun huéi ni hawéi hadügawagun lun sun dan».
Bible Society of Honduras