Isaíasi57
1Hilaguatiña gürigia buítiña, ani úati ebereseruti hau; gumuguatiña gürigia buítiña, ani úati ni aban gunfurandati luagu dan lan le hóunwegun sefu hamá luéi wuribani,2aba hebelurun lidoun darangilaü. Falaaña meha aban üma suruti, guentó añahein emeraagua lidan hamúaha.
Lasiadiruni Aburemei láhudurawagun houn guáriuagu
3Yarafa humá, tirahüñü gabiñarahatu, lirahüñü aban gagabarahati tau aban horu.4Ka au hadaagua bula? Ka un héheluha, ani chawagua huméi hiyuma? Lirahüñü figóu huguya, gürigia marasualugutiña;5adaaguatün sun luwuyeri iwiyei lábugiñe tídibu wewe hilumati, adagaragüda humaña hisaanigu laru duna labadinagua labouchagun dübü.6«Ísüraeli, himei bumuti badügün kultu lun burí dübü guyeti le dúnarugubei, anihein aban ubaraü baranserun bubarua ñein. Rúhadibu idewesei le diwéin luma ilaü lun. Ani busentibu lun gúndaabadina lan lárigiñe sun le?7Ru bumutu bigabanan luagu aban wübü íñuti, warihadibu giñe adagaragüda ñein.8Ru bumutiña bubungiutegu ha wíyebaña lanagangiñe bubenari. Bulíeiguatibu nuéi, ragaguatibu aba barounrun tidan tidabuberen bigabanan; adügatibu daradu hama wügüriña ha úmabaña babusenra barounrun, abunha aríaguei guáriua.9«Éibaaguatibu lumoun bungiu Mélekü barüina garaba luma saragu ibiñein; óunahatibu láutiña uganu dise, rarigüda bumutiña chülǘ lidoun umúahaü.10Buchati buagu adaagua wéiyaasu, gama lumoun masubudirun bumuti luagu mala lan sun lira. Géigintibu búmagua, ligía mabuchadun lubéi buagu.11«Kátaña búngiugu ha, ha meha uéibaña banufudeda ani ru buguya inebesei houn, magunfulirun bubéi numa, aba babulieidunina le gumuti. Dan meha le michu ban inebesei nun ábaha nerederun maniñu.12Gama lumoun nasubudiragüdaali bigaburi le buídubei lidan baritagun.13Danme bagúarahan amuriaha íderawaguni, míderagun habadibu bubungiutegu mesefu hamabume. Lanügübaña garabali sun hagía; lagumuchaguagüdübaña aban láfurun garabali. Ánheinti le hemenigiti nuagu, laganóuba fulasurugu luagu nuwübüri le sándubei».Labeichún luma lareidaguagüdüniwa Ísüraeli
14Ábameti laganbún lariñawagún: «Aranse humá aban üma úaraguati, gidá huméi katei le burí beresebei ñein sügǘ hamaamuga numutuniña».15Ladüga lariñahare le Íñugutimabei, le wínwanbei lun sun dan le sándubei liri: «Lidan aban fulasu íñuti ani sagüráuti naganóua, gama lumoun anahein giñe luma le ǘnabugubei ani nidiheri ligía, ani rútina gurasu luma dǘgüdaguaü lun.16Meredebadina íchiga hadurun numutuniña súnwandan, merede aume gáñiñu sun dan; ladüga anhein nadüga ítara, heferidirubei gürigia ha nadügübaña haguraasun nuagu.17Ladüga lifigoun Ísüraeli nerederunbei gáñiñu aban dan, aba nabeichuni, aba nadisedun luéi; gama lumoun aba larufuduni lumabuchahan aba hasigirun lidan hémeri.18Ariha naali ligaburi, gama lumoun nagaranihaba lun ábame níchugun emeraaguni lun luma darangilaü le gumuti. Níchuguba dǘgüdaguaü houn ha hírubaña,19nariñagame houn súngubei: “Darangilaü houn ha dísebaña, darangilaü houn ha yarafabaña! Nareidaguagüdübaña numutuniña!”20Ánhaña ha salufuribaña, ítara haña kei barana dan le lérouga, siñati lagalumadun, barüti baribarabu luma iwiyei lidan lugudi.21Úati lubuidun dan houn ha wuribabaña». Bungiu ariñagubalin.Bible Society of Honduras