Isaíasi54
Línsiñehabu Bungiu le magumuchadibei
1Bagúaraha lau ugundani, würi maraüheitu to marahüñütu, buguya le mágurahanñahagidibubei, lugundun lariñahare Bungiu: «Gíbetimabaña tirahüñü würi to meberesenwaboun au sügǘ tau to gámariboun».2Wéirigüdaboun bikianpun, tuleguaboun giánbisi to ábugiñeboun baganóua, chawaguabei gúrudu, dáguabei wewe buidu,3lugundun bachawaraguba luagun bóunwenren luma luagun bubaünan; hagañeiruba badügawagun saragu néchanigu ábame haganóun lidan fulasu burí le málabei guentó.4Manufudedabá, manügünbadibu busiganu; manabúnbadibu, úame kaba lan au babusigarida. Babulieidubei lubusigaridüna biñüraü ani maritagundigiaadibume luagu lubusigaridüna berederun mámariga.5Ladüga lanügübadibu le adügübalibu lun lúmarime. Aburemei Suntigabafu líribei; Bungiu le sándubei le Lubungiute Ísüraeli ligía besefuragülebei, le Lubungiute sun ubóu.6Ítara biña meha kei aban úmari nibureingiru to igirúaaru lau idiheri, gama lumoun wáyaali Bubungiute bun aba lariñagun bun:7«Ígira numutibu luagu murusun dan, gama lumoun nóundaraya buma lau óunwenbu nareini.8Aramudaguatina buéi luagu murusun dan, lidan le nagañidun, gama lumoun gudemehabutina bun lau ínsiñeni le magumuchaditi». Aburemei le besefuragüle ariñagubalin.9«Ítara kei náfiñurun lun Noé dan le ladagarunbei guran, luagu mabuluchagüdündigia naali lan ubóu, ítara liña giñe náfiñurun guentó luagu magañidundigiaadina lan buma mayawadagun aume buagun.10Íbini lasansiruni burí áraabu lubara, heigua ligía burime wübü, masansiragunbei bínsiñe nun, méiguadun ligíame nidaradun le lánina darangilaü». Bungiu le gudemehabubei bun ariñagubalin.Iseri Herusalén
11«Fugiabu uburugu bei laali luriban dan, úouga ni aban íchuguti dǘgüdaguaü bun! Nararamagüdayabadibu lau dübü buíduburiti, adüganéime buagaburi lau safiru;12nadügübei buayelesin lau rubí, bubenari lau berilu, sunme bubarieirun lau dübü buíduburiti.13Narufudahaba houn sun birahüñü, buídubei dan houn sun hagía.14Léredagüdübadibu irichaü bagidarúba lábugiñegiñe lidere dan luma anufudei mañawarihan láadibume anufudei.15Anhein ageindawagúa buma, mámabei nídangiñeti, gama lumoun bagañeirubei le ageindaguti buma.16«Au adügübalin nadagimeinti gürabu le áfuhabalin leñegura watu, adüga ligía ámuñegueinarügü tuwuyeri áruma; au giñe adügübalin wügüri le gagünrinchaguadibei lun lagünrinchagun.17Gama lumoun úagili ni aban adügütu áruma to lunboun tagünrinchagunibu. Bámanichagüdübei sun le íchuguti bidurun. Anihán katei le níchugubei houn ha eseriwidubaña nun: Agañeiruni». Bungiu ariñagubalin.Bible Society of Honduras