Isaíasi52
Uganu luagu lesefurun Herusalén
1Agaguduabá Sión, agaguduabá, ragüba erei; Herusalén, uburugu sánduti, daüboun tubuidun-agei badaüragun, lugundun mebeludigiaaña gibe tubungiute, gürigia wíyetiña bidoun.2Herusalén, furubei kaliki buáriua, ñuruba luagu lálana arúeihani. Sión, nibureintu adaürǘtu, gidabei yugu luéigiñe bigiina.3Lariñahare Aburemei: «Mibihintina ni aban gáwanaü dan le hanaawagunbei kei idamuni; míchubadina giñe ni aban gáwanaü lun nesefurunün.4Furumiñe meha, ñǘdüntiña numutuniña Ehiptun, aba haganóun ñein kei terencha; lárigiñe aba líchugun Asiria lidere dan houn mébunouga.5Guentó, barüwa numutuniña Babilónioun mébunouga, ha amudiragubaliña, agúarahatiña lau pantaü, merede ligía hanabagunina.6Gama lumoun lachülürüba weyu danme hasubudiruni numutiña luagu au lan le Aburemei, adimurehabei houn».7Ma lubuidun larihín lachülürün le anügübei uganu buiti; le anügübei uganu lánina darangilaü, le adimurehabei luagu esefuruni ariñaga ligía lun Sión: Urúei Bubungiute!8Aganbabéi hamalali óunigirutiña, agúarahatiña úara, agúarahani le lánina agañeiruni, ladüga ariha hamuti lagiribudagüdüni Aburemei Sión.9Wagua humá le lánina agañeiruni, lárigirugu Herusalén, lugundun gudemehabuhaali Aburemei houn lumutuniña, sefu laali Herusalén!10Arufuda laali Aburemei lubafu hagibugiñe sun néchanigu. Lasubudirúba lidan sun ubóu luagu sefu láadiwa lan Wabungiute.11Furí humá, furí humá Babilóniagiñe, maguura humá ni kata le wíyeti, furí humá Babilóniagiñe! Redei humá harumañu huguya le anaahabalin burí katei le layusurubei Bungiu!12Gama lumoun máfuridunbadün lau lufuresen, máfuridunbadün anuraheina, lugundun lóunigirubadün Aburemei le Lubungiute Ísüraeli luéigiñe sun oubaü.Lasufurirun lubúein Aburemei
13Buídubei lidin lun nubúein, liñurúaba ábame lichugún lidan ubaraü íñuti.14Ítara kei buga taweiridun hanigi saragu lau dan harihinbalin lámuñedagun larihín, menege hamaali lan buga gürigia;15ítara luba giñe saragubaña lan néchanigu aweiridutu hanigi, danme harihini urúeigu, siñabei hariñagun ni aban dimurei, lugundun harihubei le mabahüdawagunñahagilibei houn, gunfuranda hameime le maganbunñaha hamagilibei.Bible Society of Honduras