Isaíasi44
Ligunfulin Aburemei, Bungiu le ábanrügüti
1«Aganbabána guentó Ísüraeli, lumutuniña Hakobu, nánigu, gürigia ha nanúadirubaña.2Au Aburemeibei, le adügübalibu lúmagiñe lubaragiñe bágurahoun, ani íderaguanabu. Manufudedabá Hakobu, ni buguya Hesurún, nubúein, le nanúadirubei,3lugundun nadüga lun léibaagun duna lidan fulasu mageirawati, lirahüñü duna lidan fulasu mábeiti. Níchuguba iseri ibagari houn badügawagun, nóunahabei nabinirun hawagun.4Haweinamuduba kei híduru le túaguati kei álamu laru duna.5Lariñaguba aban luougua: “Lani Bungiu au”, lariñagame amu, ladügawagun Hakobu au, ñeinbei abürüdüti luagu lúhabu: “Lumegen Bungiu” ábame líchuguni liri Ísüraeli lánwounme liri».6Lariñahare Bungiu, le lurúeite le lesefuha Ísüraeli, Bungiu le Suntigabafu: «Au furumiñetibei, au agumuhóuni, úati amu Bungiu bóugudi nuéi.7Káteigia ítarabei kei au? Layanuha, ariñagaléi nun. Ka ariñagubalin lúmagiñe binarü le lunbei liabin, ariñagaléi le lunbei lasuseredun?8Gama lumoun, gaguraasun humá, manufudeda humá! Ítara liña nariñaguni lúmagiñe binarü, ani huguya nánibei gefentiña. Anihein funagia amu bungiu nuéi? Úati amu aramudaguagülei; úati ni aban nasubudirun».Luáguti láhudurawaguniwa houn guáriuagu
9Ni kata sun ha adaagubaña búngiugu. Móunitiña giñe búngiugu ha únbaña híchiga inebesei lun ni kata. Ha adügübaña kultu houn, marihintiña ani ibidiouguati hau, ligía wuribabei lubéi lidin houn.10Le adügüti aban guáriua lun láhuduragun tun, anügoun kei lubungiute, leferidiruñein lidaani.11Wuribabei lidin houn sun ha áhuduragubaña tun. Wügüriña adaagubaña guáriuagu. Lun hamuga hayabin sun hagía lun haguserun, heferidiruña hamuga aba hamuga habuinchun lau anufudei.12Anihán katei le ladügübei nadagimeinti gürabu: Aba lárügüdüni lichichilin, lásurun lásüdagüdüni gürabu lidan leñegura watu, aba líchaagun marüdiyu luagu lun lasalirun kei labusenruni. Aba luadigimarini lau lere larüna, gama lumoun anhein alamacha, aba lagumuchun lere, anhein amagürabuda, aba labuchadun luagu.13Anihán le ladügübei le adaagubei guáriua: Aba lamisurahan lau lamisuraagüle aba láfiuruni le lunbei ladügüni lau lápisi luma konpasi, aba luadigimarini tau chíchili; ítara liña ladügün aban guáriua lenege gürigia, lárigiñe aba líchuguni tidoun aban ténpulu.14Añahein, aba hábunagun hibúari, aba laweinamudagüdüni huya; lárigiñe aba gayaraahali lan háchuahani. Odi anhein gudi lubéi labusenrubei odi róbüle lan, aba lóunigiruni wewe burí ligía dabíararugu darí laweinamudun, garana ligía.15Lárigiñe lachugún, aba hóuseruni gürigia líbiri lun hébeduni hálememe; líbiri lun habacharagun; líbiri lun hásürahan fein; líbiri lun hadügün liyawa aban bungiu, aba habuluchagun íchiga inebesei lun.16Añahein giñe, aba hádaruni lamidan wewe ligía wáturugun, aba hásürahan úi, aba héigini, aba hakimuledun. Bachaguatiña giñe lau, aba hariñagun: «Lubuidun lerederun larügürügü watu ma; wagumesera abacharagua!»17Lauti lígiragun wewe, aba hadügün liyawa aban bungiu, aba habuluchagun ligibugiñe lun híchugun inebesei lun, aba hayumuragun lun, hariñaga: «Sefubáwa, ladüga buguya wabungiutebei!»18Ibidiouguati hau gürigia hagía, úati gunfuranda hamá; wéiriti darugu lan hagu darí lun siñá lan harihin, darugu liña lau hasaminan darí lun siñá lan gunfuranda hamá.19Masaminaruntiña, mégeitiña gunfurandaü lun gayara lan hariñagun: «Be wamuti lamidan wewe, aba wásürahan fein lau leñegura, ásüraha wagía úi aba wéigini; lau líbiri wewe ligía wadügei lagübüri katei le. Murusun wewe unbei níchiga inebesei!»20Lidan linarün katei, ítara liña kei leigín baligi. Wígiraguagüdüña woungua lun weyeedún lau burí katei málati. Siñabei hesefurun gürigia hagía. Úabei gunfuranda hamá luagu iyeeni lan le háhaburugubei.Bungiu Lesefuragülebei Ísüraeli
21«Ísüraeli, lumutuniña Hakobu, haritagua humá luagu nubúeingu lan sun huguya; au adügübalün, Ísüraelina, mabulieida humana.22Gumuguagüda naali hidurun luma hifigoun, kei lagumuchagun dúeri. Giribu humá nun, ladüga au esefurubalün».23Sielu, wáguaba lau ugundani luagu le ladügübei Bungiu! Gudungu burí le ubouagubei, hagúaraha lau ugundani! Áraabu burí luma dabíara lau burí sun lídibu wewe, hagúaraha lau ugundani, ladüga arufuda laali Bungiu luéirigun, lau lesefuruniña Ísüraelina, ha lumutuniña Hakobu!24Lariñahare Bungiu le esefurubalibu, le adügübalibu lúmagiñe lubaragiñe bágurahoun: «Au Aburemeibei le adügübalin sun katei, au átulerubalin sielu, derebugugüdanei múa, míderagunga lana ni aban.25Mígiruntina lun lagunfulirun le hariñagubei profetagu yéetiña; adügatina lun heferidiruni garíaahatiña hachügü. Adügatina lun hasigenehan chu tau hámagua luma lun liabin hasubudin libidiouniganme aau.26Gama lumoun adügatina lun lagunfulirun hererun nubúeingu luma lun buidu lan lasalirun haransehan ha nóunahabaña. Nariñahare luagu haganóuayaba lan gürigia Herusalén, luagu lararamayaba lan burí luburugute Hudá. Nadügüba lun hásaarun lídangiñe hagünrinchawagun.27Gayaraati níchugun lúrudu lun lamabeidun barana luma lun lerederun duna éibaaguati mábeiñu.28Ariñagatina lun Siru: “Buguya nánibei hóuniri mudún, badügübei sun le nabusenrun”; ariñaga au lun Herusalén: “Bararamagüdüwayaba”, ariñaga au tun ténpulu: “Lichugúba buagaburi” ».Bible Society of Honduras