Isaíasi38
Lasandirun luma lareidagun Esekíasi
1Lidoun dan ligía, aba lábürühan Esekíasi lau aban óunwenbu sandi, aba lidin Isaíasi le liráü Amosu arihei, aba lariñagun lun:—Lariñahare Bungiu: «Ariñagabéi lagumuhóun le lunbei bariñaguni houn biduheñu, ladüga bounwe, mareidagunhadibu».2Aba lagararaagun Esekíasi lau ligibu luagun touba muna, aba lafurieidun lun Bungiu, lariñaga:3—Ayumuraguatina bun, Aburemei, lun baritagun luagu ligaburi neseriwidun bun lau úaraguni luma arumani adügei le aubei bagundaara. Aba layahuahan lau igarigu.4Aba lariñagun Wabureme lun Isaíasi5lun lidin ariñaga lun Esekíasi:
—Lariñaga Wabureme le Lubungiute badügawagun Dawidi: “Aganba naali bayumuragun ani ariha naali báguira. Níchiga keinsi irumu lanwoun bibagari.6Buguya lau sun Herusalén, nesefurubadün luéi lurúeite Asiria. Nóunigirubei uburugu le”.21Aba lañoundaguagüdün Isaíasi igu aba tafadarún luagu lisandi urúei, aba lareidagun.22Ábati lálügüdüni Esekíasi Isaíasi, lariñaga lun:
—Kábagia seini nibiha luagu gayaraabei lan nidin litenpulunrúgun Bungiu? 7Lariñaga Isaíasi lun:
—Anihán seini le lunbei líchuguni Bungiu bun lun larufuduni bun luagu lagunfulirubei lan le lariñagubei:8Nadügüba lun lagiribudun lamuñan weyu le awanselibei diisi esütépu lidan luachin Aasi.
Aba lasuseredun Ítara.9Dan le lareidagunbei urúei Esekíasi lídangiñe lisandi, aba ladügüni Sálumu le:10Nariñaga yebe núnguarügü: Nounwe lidan lubuidun-agei nibagari, rúaali dimurei nun lun nidin lidoun larúeihan óunweni lun sun dan.11Nariñaga núnguarügü: Marihindigia naali Bungiu ya ubouagu, marihindigiaadina ni aban hádangiñe ha aganóubaña ubouagu.12Günrinwagua nirumun, gidawa nuéi, kei hakianpun hóuniri mudún. Ítara liña buga nibagari kei ligamisan aban adaaguti gamisa to ibugúboun. Súfurigüda bumutina áriebu wéyuagu.13Agúarahatina lau gáriti sun áriebu, kamá hamuga anihán aban liñún áhalahei nabu. Súfurigüda bumutina áriebu wéyuagu.14Amumehatina hámaru kei dugurue, áünhatina kei unhun. Buchati luagu nagu aríagua sielun. Bungiu, hénrengungati nun, óunababa nuéigiñe!15Gama lumoun kábagia niyara ariñaga lun, anhein ligía lubéi adügübalin? Madabuhali nagu ladüga tirun nuani.16Habagariduba ha lóunigirubaña Bungiu, ani nabagariduba hama sun hagía. Rúhadibu átuadi nun, águyugüda baali nibagari nun.17Guentó, leweñegua íruni, darangilatina. Areida baali nibagari luéi huyu lánina günringuaü, lugundun feruduna baali sun nifigoun.18Siñati heremuhan ha lídanbaña umúahaü bun, siñati híchugun hilaaña uéiriguni bun, ha ararirubaña lidoun hamúaha siñati hagurabuni bigunfulin.19Hárügüñanu wínwanbaña gayara heremuhan bun, kei nadügüni uguñe. Adimurehatiña agübürigu houn hasaanigu luagu bigunfulin.20Anihein Bungiu ya lun lesefurunina. Daün wamóun wani árüpa, weremuha sagü weyu litenpulunrugu Bungiu.
Bible Society of Honduras