Isaíasi36
Günringuaü le ladügübei Senakeríbü
1Lidan irumu katorusu lidan larúeihan Esekíasi, aba lábürühan Senakeríbü, le lurúeite Asiria luagun sun luburugute Hudá le baríeiruabei, aba lárügüdüni.2Aba lóunahan aban úfisi Lákisigiñe hau súdaragu lun houdin arihei urúei Esekíasi uburugu Herusalén, aba hararamun lurugabu lichanilin fusu le íñugiñebei, luagu üma le luágunbei áraabu le Achibaguagülei.3Aba láfuridun Eliakímü le liráü Ilükíasi, le agumadihabei tidan palasiu habaroun; Sebüná le abürühabei; luma Hoá le liráü Asafü, lani urúei abürühati.4Aba lariñagun úfisi Asiriana houn:—Ariñaga huméi uganu le lun Esekíasi lúmagiñe urúei wéiriguti le lurúeite Asiria: “Ka uagu luéirinbei bachoururagun bungua?5Odi haritaguatibu luagu gebegitima lan dimurei buíduburiti kei lichú aau luma erei lun wuribu? Ka uagu bemenigida lun biñuragun bungua nuagun?6Ariha numuti luagu hemenigi ban luagu lídehan Ehiptu. Ítara liña Ehiptu kei aban maburu fereeli, ánhabu abalacha luagu, límirubei búhabu. Ítara liña lóuserun urúei Ehiptuna hama sun ha hemenigibaña luagu.7Ani ánhabu ariñaga nun: Luagu Wabureme le Wabungiute wemenigida, Ma funagia gidá lumuti Esekíasi fulasu burí le lánina óundaruni luma burí lani Bungiu ligía latarü, aba lariñagun houn lílana Hudá luma Herusalén lun luágurügü lan aban kultu hadüga óundaruni lun?8Adügabá aban daradu luma nabureme le lurúeite Asiria: Níchuguba bián milu gabayu bun, ánhabu adarira kaba lan agalufehaña.9Buguya, mabafutibu lun béibaaguagüdüni ni le ǘnabutimabei hadan úfisigu Asiriana, ani agurabatibu badarirun gabayu hama agalufehatiña Ehiptu?10Bóugudin luéi lira, haritaguatibu luagu niábiña lan agünrinchaguei ageiraü le, ibidiñoun lun Wabureme Wabungiute guánarügü óunahabalina lun niabin agünrinchaguei!”11Aba hóunabuni Eliakímü, Sebüná luma Hoá, hariñaga lun:
—Adügabá fulesei woun, badimureha woun lidan araméu, ladüga gunfuranda wamuti. Madimurehabá woun lidan ebüréu, ladüga haganbahaña sun gürigia ha luágubaña baríeiru.12Lariñaga úfisi Asiriana houn:
—Mama lun babureme, ni hun lóunahana lurúeite Asiria ariñagei le. Houn gürigia ha luágubaña baríeiru, ladüga dandu hagía kei huguya, héigibei hídiga guánarügü gurá humeime hiñe guánarügü.13Ábati lararamun úfisi, aba lagúaragun ariñaga lidan ebüréu:
—Aganba huméi le lariñagubei urúei wéiriguti, le lurúeite Asiria:14“Mígiraguagüda humá hungua lun leyeedunün Esekíasi, siñaguabei lungua lun lesefurunün”.15Anhein áluaha lagañeirunün lun hemenigidun luagu Bungiu, lariñaga hun: “Lesefurubadiwa Bungiu; mígirunbei lun lábürühan uburugu le labun lubafu lurúeite Asiria”,16madüga humá gasu lau. Lóunahañadina lurúeite Asiria ariñaga hun, lun hígiraguagüdün hungua, gayara láamuga leigin kada aban hídangiñe lídangiñe le lalubahabei licharirugu, gurá ligíame duna lídangiñe luelun guánarügü.17Lárigiñeme, ábame lanügünün lidoun aban ageiraü lenege hageira, ageiraü le ñein lumuti türigu luma beibei lun tadügün fein luma diwéin.18Anhein ariñaga Esekíasi hun luagu lesefurubadün lan Bungiu, mígiraguagüda humá hungua lun leyeedunün. Sefu lumutiña funagia aban hádangiñe búngiugu ha habungiutegu lílana amu fulasu lumutuniña luéi lubafu lurúeite Asiria?19Hagañagia lubungiutegu Amatü luma Arüpádü? Hagaña lubungiutegu Sefarüwaímü? Sefu hamuti funagia Samaria luéi lubafu Asiria?20Ka hádangiñe sun búngiugu ha, esefurubaliña lumutuniña luéi lubafu lurúeite Asiria? Ka uagu haritagua luagu gayara lubéi lan Bungiu Herusalén esefura?21Aba herederun maniñu, móunabuntiña ni aban dimurei, ladüga ariñagaali buga urúei houn lun móunabun hamá.22Ábati hírudagun Eliakímü, Sebüná luma Hoá, aba haheiridagunu hanaagun hawougua, aba houdin arihei Esekíasi lun habahüdaguni le lariñagubei úfisi Asiriana lun.
Bible Society of Honduras