Isaíasi23
Dimurei libügürü Tiru luma Sidón
1Ladimurehoun luagu Tiru: Tayahuña burí ugunei to lani Tárüsisi, ladüga günrinwagua wafu. Gudawa wafu le meha ñeinhin lubéi lachülürǘwa Chípüregiñe2Rédeiha lílana Tiru hama adaagutiña marasun ha Sidonna maniñu. Hiñugua hamuti burí meha hóunagülegu barana,3luma burí óunwenbu duna, sagá hamuti meha hagañeirun lídangiñe alubahóuti lidan Nilu, aba halugurahani houn néchanigu.4Buinba lau busiganu, Sidón, lau sun Tiru, iderebugu le lárubei barana ladüga ariñagaali barana: «Masandiñahagidina ligari agaraüdüni, mágurahanñaha au. Marahüñüñahagidina lun nagüriahaniña ni lun narufudahan houn».5Danme lachülürün uganu houn Ehiptuna, hírudaguba luagu le asuseredubei lun Tiru.6Hariñagame: «Heiba uburugun Tárüsisi, hayahuaha lílana burí kosu».7Anihán san uburugu le binadubei, le ñéinñaha lubéi fedu? Le adügañahabei wéiyaasu lun lidoun burí fulasu díseti?8Aban meha uburugu wéiriguti Tiru ítarahaña meha ha adaagubaña marasun ñein kei harahüñü urúeigu inebewatiña meha ha alugurahabaña ñein lidan sun ubóu. Ka adügübalin le lun Tiru?9Wabureme Suntigabafu adügübalin lun lǘnabudaguagüdüni pantaü, luma lun lígiruniña sun ha gabafubaña ubouagu múarugu.10Lílana Tárüsisi, bunagua huméi múa, lugundun úaali fulasu le ñéinñaha lubéi tadaawagúa ugunei, gumugua.11Tulé lumuti Wabureme lúhabu luagun barana, aba ladadagaragüdüniña néchanigu, óunaha ligía agünrinchaguei lubarieirun Kanán.12Aba lariñagun lun Sidón: «Hebé bíchaagun bungua lun ugundani, nibureingiru fuíwaguaaru. Íbini bidin uburugun Chípüre, ni ñein madaribadibu emeraaguni».13Ariha huméi fulasu le, fulasu meha ichugúti tun ugunei. Bunaguatiña Babilóniana wáyelesi ñein, günringua hamóun lani Sidón palasiu, aba hígiruni lidan günringuaü. Hagía adügübalin lira, mama Asiriana.14Hayahuaha, ugunei Tárüsisina, ladüga günrinwagua uburugu Tiru.15Lídanme dan ligía, labulieidúaba Tiru luagu ǘrüwa-wein-diisi irumu, dan le ladurarun libagari aban urúei. Lárigiñeme ǘrüwa-wein-diisi irumu ligía, ábame leremuhóun uremu ligira le tuáguti horu lun Tiru:16«Horu bulíeiwaaru, ragüboun bani árüpa, éibugabei uburugu, báfara úyanu buiti, beremuha saragu uremu, ariha báamuga ánhaña aritagua buagun».17Lárigiñeme ǘrüwa-wein-diisi irumu, lárügüdayabei Wabureme Tiru. Taluguraguayaba tungua, ábayame tahoruhan luma sun fulasu le ubouagubei.18Gama lumoun tederegerubei le tagañeirubei lun Wabureme; mareidúnwabei, rúarügübei houn ha eseriwidubaña lun Wabureme lun hagañeihan saragu éigini tuma daüguaü fínutu.Bible Society of Honduras