Oseasi13
Lagünrinchawagun Ísüraeli
1Dan buga le hadimurehan lánigu Éfürain, arufuda hamuti híbiri lani Ísüraeli türibu henebenehabu; gama lumoun aba lounwen Éfürain ladüga láhuduragun lun Baali.2Ani añahamémegua afigouha! Adaaguatiña guáriuagu lau hani pülata, búngiugu ha hadüga wügüriña kei le auti habusenraña. Lárigiñe aba hariñagun: «Hadagaragüda houn!» Aba hachuuhaniña gürigia guáriua hagía ha hayawa bágasu wügüriña.3Ligía ítara haba lubéi kei hemereedu le lánina binaafin kei serenu le lánina larugadun, le agumuchagubei binaafingiua, kei ifei le lanügübei garabali; kei gumuleli le áfuridubei lídangiñe funedera.4Lariñahare Aburemei: «Au, le Aburemei Bubungiutebei lúmagiñe meha Ehiptugidibu: Manügabá amu keisi Bungiu nuéidigia, lugundun áurügüñein besefuragüle.5Góunigi numutibu buga lidan lisü fulasu mageirawati.6«Gama lumoun dan le lagibedunbei heigin darí lun lígiragun, aba habuinchun lau pantaü aba habulieidunina.7Ítara nuba lubeiti houn kei aban liñún, kei aban leoparüdu le agaradahati habá luagu üma.8Náfuriduba habaroun kei aban ounli áraabuna to eferidirubaliña tirahüñü, ábame nagünrinchagunu hanigi. Néigibaña kei aban liñún ñein guánarügü; nagünrinchagubaña kei aban animaalu gáñiti.9Nagünrinchagubadibu Ísüraeli, úabei erederutina luéi nadügüni.10Hageigia burúeite guentó, lun lesefurunibu lidan sun buburugute? Hagañagia ha buga úmabaña bamuriaha urúei hama ábutigu?11Gáñiñu buma, aba níchugun burúeite, gáñiñu buma, aba nagidaruniña buéi».12«Bürüwaali luriban Éfürain luma lifigoun.13Chülühali lóurate lágurahoun Ísüraeli, gama lumoun wéiriti libidiounigan lau, darí lun siñagua lan lungua lun lesetiragun lungua lidan lubudubu lun lágurahoun.14Nesefurañame san ítara luéi lubafu umúahaü? Nesefurañame san luéi óunweni? Óunweni, hagéi bubafu lun bagünrinchagun? Umuahaü, hagéi burí buriban? Magudemedunhaña gürigia ha nun!»15Íbini láhüchagun Ísüraeli kei híduru, láfuruba garabali, garabali héreti le áfurubei luéigiñe fulasu mageirawati, ábame lamabeidagüdüni lísensen lidunari. Labayurubei lágani lirisin luéi.16Hanügübei lílana Samaria habeichún ladüga hiñuragun houngua luagun Habungiute. Háfarawaguba tau eféin, haburechawaguba hasaanigu múarugu, hagünrinchawaguba würiña dageinatiña.Bible Society of Honduras