Agumesehani48
Labiniruniña Hakobu Éfürain luma Manasési
1Murusun dan luéigiñe, aba hariñagun lun Hosé luagu sándiha lan lúguchi. Ábati lidin Hosé arihei, barüinalaña bián lirahüñü, Manasési luma Éfürain.2Dan hawisarunbalin Hakobu luagu chülühali lan Hosé arihei, aba ladügün erei, aba lañuurun tuagu ligabanan.3Aba lariñagun lun Hosé:—Arufudaguati Bungiu Suntigabafu lungua nun yágüta uburugu Lusu lóubawagu Kanán, aba labinirunina4lau dimurei le: «Nadügüba lun gibe hamá birahüñü, lun hadügün badügawagun aban néchani. Níchugubei giñe múa le houn badügawagun. Hánibei lun sun dan».5—Birahüñüti ha Éfürain luma Manasési ha águrahoubaña ya Ehiptu lubaragiñe niabin bumoun, yúutiña nun. Nani hagía kéigubeirügü nani lan Rubén luma Simeón.6Ha lúnbaña birahüñü hama hárigiñe, hagíaba bani, ladügame giñe hamulenu hamá Éfürain luma Manasési, gafanranbaña lidan alagan.7Dan meha nagiribudunbei Padán-aramügiñe, aba tounwen Rakeli to búguchu nuéi lóubawagu Kanán, lubaragiñe wachülürün Éfürata, aba nábununu ñein luagu lémeri Éfürata le gíribei Belén guentó.8Sódini aba larihin Hakobu hawagun lirahüñü Hosé, aba lálügüdahan:
—Angia ha, kátañagia?9Aba lóunabun Hosé lariñaga lun:
—Nirahüñü ha líchugubaña Bungiu nun ya Ehiptu.
Lariñagati lúguchi lun:
—Yarafagüdatimabaña nun, biní náamugaña.10Wéiyayaali bugati Hakobu, ani lóuguaali larihin. Ábati layarafadagüdüniña Hosé irahüñü hagía lun lúguchi aba lachuuruniña, aba lóuburuniña.11Lárigiñe aba lariñagun lun Hosé:
—Magurabunhaadina yebe narihinibu. Gama lumoun, arihagüda laaña giñe Bungiu birahüñü nun.12Aba lagidaruniña Hosé irahüñü luéigiñe ligachürügü lúguchi, aba labuluchagun darí ladagarun lerebe múarugu.13Lárigiñe aba lanügüniña biángubei, Éfürain lau lóunwenren, Manasési lau lubaünan aba layarafadagüdüniña lun lúguchi. Ítara liña lerederun Éfürain luéigiñe lubaünan Hakobu, Manasési luéigiñe lóunwenren.14Dan látuleruni Hakobu lúhabu, aba lásügüraguagüdüni, aba líchuguni lóunwenren lábulugu Éfürain, le amuleñein, líchigei lubaünan lábulugu Manasési le íbugañaü.15Ábati labiniruni Hosé, ítara:
«Bungiu le buga unbei gaganbadi hamá Abüraámü luma Isaakü ha nagübürigu, Bungiu le óunigirubalina lúmagiñe weyu le nágurahounbei,16ánheli le esefurubalina lídangiñe sun wuribati, binilaña irahüñü ha. Haritawagualá niri hádangiñe luma hiri nagübürigu Abüraámü luma Isaakü. Gibe hamá harahüñü, gíbegua hamá ubouagu».17Gama lumoun magundanti Hosé lau líchuguni lúguchi lúhabu le lóunwenren luagu lábulugu Éfürain, aba lubeiti lagidaruni lúhabu lúguchi lábulugugiñe Éfürain lun líchuguni lábulugu Manasési,18ariñageina ligía lun:
—Uá núguchi, mítaranla! Anihán íbugañaünbei. Rubei bóunwenren lábulugu.19Máhati lúguchi, lariñaga lun:
—Subudi numuti, niráü, subudi numuti. Ligía, liábinba giñe lun aban lan néchani wéiriguti. Gama lumoun wéirigutimabei lamulen luéi, ani hayabinba saragu néchanigu hádangiñe ladügawagun.20Ábati labiniruniña Hakobu lidan weyu ligía lau dimurei burí le:
—Hayusurubei Ísüraelina hiri lun abiniruni, hariñagame: «Adügalá Bungiu bau kei ladügün lau Éfürain luma Manasési».
Ítara liña líchuguni Hakobu Éfürain lubaragiñe Manasési.21Lárigiñe aba lariñagun lun Hosé:
—Au, nounwe, gama lumoun ñeinbei Bungiu huma, lagiribudagüdübadün hageiroun hagüchagu.22Rúhadina gíbeti bun sügǘ lau houn bíbugañanu: Ru numuti Sikemü bun, le nanügübei hawéi Amoruna lidan nawuribuhan hama.
Bible Society of Honduras