Agumesehani46
Hakobu uburugu Ehiptu
1Aba lidin Hakobu lau sun lúmati. Dan lachülürün Bérüsewa, aba ladagaragüdün ñein, lun Lubungiute Isaakü le lúguchi.2Áriebu ligía, aba ladimurehan Bungiu luma Hakobu lidan aban uénedü, aba lagúarun lun lau liri le Hakobu. Lariñaga lun:—Anahán ya.3Lariñagati Bungiu:
—Bungiu au, le Lubungiute búguchi. Manufudedabá bidin Ehiptu, ladüga nadügüba aban néchani wéiriti hau badügawagun ñein.4Nídiba buma Ehiptu, ani au guánarüba asagaraña badügawagun ñéingiñe. Danme giñe bounwen, ñeinbei Hosé bóubawagu.5Lárigiñe aba lidin Hakobu Bérüsewagiñe. Aba híchuguni lirahüñü Hakobu háguchi, harahüñü hama hámarigu tidoun burí kareta to lóunahaboun urúei lun tanügüniña.6Aba lidin Hakobu hau sun lánigu Ehiptun, aba hanügüniña halügüniña bágasu, mudún lúmaha sun le hamegenbei Kanán.7Ñǘdüntiña sun lirahüñü hama libañan luma.8Anihán hiri Ísüraelina ha ñǘdünbaña Ehiptun, Hakobu hau ladügawagun: Rubén le liráü Hakobu le íbugañaü.9Lirahüñü Rubén: Hanoku, Falú, Esürón luma Karümí.10Lirahüñü Simeón: Hemueli, Hamín, Oadü, Hakín, Sóarü luma Saulu, le tiráü aban würi Kananna.11Lirahüñü Lewí: Gerüsón, Keatü, luma Merarí.12Lirahüñü Hudá: Erü, Onán, Sela, Fáresi tuma Sara. Gama lumoun Erü luma Onán hilatiña bugaha lóubawagu Kanán. Lirahüñüti buga Fáresi: Esürón luma Amuli.13Lirahüñü Isakárü: Tolá, Puá, Hobu luma Simürón.14Lirahüñü Sabulón: Séredü, Elón luma Haleeli.15Añahán lirahüñübaña Hakobu tau Lía dan meha Padán-aramüñanu lubéi, bóugudin tuéi Dina to haráü. Darandi-ǘrüwañanu gürigia ladügawagun, wügüriña hama würiña.16Lirahüñü Gadü: Sefón, Agí, Esübón, Suní, Erí, Arodí luma Arelí.17Lirahüñü Aserü: Imüná, Isüwá, Isüwí, Beriá tuma hatu to gíriboun Sera. Lirahüñüti Beriá: Éberü luma Malükiéli.18Añahán lirahüñübaña Hakobu tau Silüpá to meha idamuni to ledewehaboun Lawán tun Lía to liráü, disisiñanu ladügawagun hadan súngubei.19Tirahüñü Rakeli to úmaboun lamarieida Hakobu: Hosé luma Benhamín.20Lirahüñü Hosé tau Asenátü: Manasési luma Éfürain ha águrahoubaña Ehiptu. Asenátü liráü meha Potifera le lufadirin On.21Lirahüñü Benhamín: Bela, Békerü, Asübéli, Gerá, Naamán, Ei, Rosu, Mupimü, Upimü luma Árüdi.22Hagía ladügawagunbaña Hakobu tau Rakeli, katorusuñanu gürigia.23Liráü Dan: Usimü.24Lirahüñü Nefütalí: Haseeli, Guni, Heserü luma Silemü.25Añahán lirahüñübaña Hakobu tau Bilá, to meha idamuni to ledewehaboun Lawán tun liráü Rakeli, sédüñanu gürigia hadügawagun.26Ǘrüwa-wein-sísiñanu gürigia ha achülürübaña luma Hakobu Ehiptun ha liduheñu, ani mabahüdünga hámarigu lirahüñü Hakobu.27Biámañanu lirahüñü Hosé águrahoutiña Ehiptu. Ǘrüwa-wein-díisiñanu lubeiti gürigia ha liduheñu Hakobu achülürütiña Ehiptun.28Aba lóunahani Hakobu Hudá furumiñe lumoun Hosé, lun liabin lubaroun lóubawagu Gosén. Dan hachülürün Gosén,29aba líchugun Hosé dimurei lun taranserun aban karü lun lidin eresibirei lúguchi. Dan lachülürün lumoun lúguchi, aba lóuburuni, aba lerederun ayahuaha lüti dan luagu lege.30Ábati lariñagun Hakobu lun Hosé:
—Lárigiñe ariha náadibu lan lau nagu, darinábu wínwanñu, gayaraahali nounwen!31Lariñaga Hosé houn líbirigu luma houn liduheñu lúguchi:
—Néibuga arihei urúei, ru náamugei uganu lun. Nariñagame lun luagu ñǘbuinhaña lan níbirigu hama liduheñu núguchi ha meha aganóubaña lóubawagu Kanán lun herederun numa;32luagu giñe barǘ hamaniña halügüniña mudún, halügüniña bágasu, luma sun hámati ladüga hóunigiruniwa mudún luma hagüriahóun bágasu hafisiutebei.33Dánmeti lagúarun urúei hun, lun lálügüdünün ka lan huádigimaribei,34hariñagame lun luagu hagüriahóun lan mudún huádigimaribei súnwandan kei meha hagüchagu. Ítara luba gayara lan herederun aganawa Gosén, ladüga máhatiña Ehiptuna lun haganóun haganagua hóuniri mudún.
Bible Society of Honduras