Agumesehani4
Kaín luma Aweli
1Aba lóundarun wügüri tumoun lúmari Ewa, aba tadageinadun, aba tagaraüdüni Kaín, aba tariñagun:—Garaühadina aban eyeri, líchugun Bungiu nun.
Aba tíchugun Kaín luagu.2Lárigiñe aba tagaraüdüni Aweli le lamulen Kaín. Aba líchaagun Aweli lungua lun hagüriahóun mudún, Kaín lun lábunaguni múa.3Ábati lásügürün dan. Luagu aban weyu aba lanügüni Kaín lidewese lun Bungiu lídangiñe lalubahan.4Aba giñe lanügün Aweli lun Bungiu, aban hádangiñe furumiñetiña hama habuidun-agei harahüñü lilügüniña mudún aba larihin Bungiu lau saragu ugundani luagun Aweli labu lidewese,5gama lumoun mítaranti larihin luagun Kaín lau lidewese. Ítara liña lubeiti aba lan lagañidun Kaín saragu, aba larufudun luriban igibu.6Ábati lariñagun Bungiu lun:
—Ka uagu bagañida, ani arufuda buguya luriban igibu?7Lun hamuga badügüni le buídubei, gayaraabei yebe biñuruni bigibu; gama lumoun kei madügün bani, lagurabahaña figóu lun lagumadirunibu. Lau sun lira gayaraati buguya lan agumadirei.8Luagu aban weyu, aba lagunbirahani Kaín Aweli le lamulen lun houdin asariñaha. Lidan áraabuhaña biángubei, aba lachubarun Kaín luagun lamulen, aba láfaruni hilagubei.9Ábati lálügüdüni Bungiu Kaín:
—Hagéi san Aweli le bamulen?
Aba lóunabun Kaín:
—Ibidiñeti nun. Au funagia lunbei nóunigiruni namulen?10Lariñaga Bungiu lun:
—Ka uagu badügei le? Lita bamulen le báwiyurubei múarugun lagúarahaña nun lun naguseragüdünibu.11Ligía íñarawaguañu buba lubéi, bugawa buguyame lídangiñe múa le átubalin lita bamulen le báfarubei hilagubei.12Íbini buadigimariduni múa, michu laali lin bun. Beredera éibugei ubóu memeraagunga lun sun dan.13Ábati lóunabuni Kaín Wabureme:
—Siñabei nawandun aban abeichúni wéiriti ítara.14Bugá baadina lídangiñe múa le uguñe weyu, gásuti nerederun éibugei ubóu dise buéi memeraagunga, ítarati, furumiñeguarügüme adunraguti numa láfarubadina hilagubei.15Gama lumoun aba lóunabuni Bungiu:
—Furumiñeguarügü le áfarutibu hilagubei labeichúba sedü wéiyaasu. Ábati líchugun Bungiu lumakün Kaín lun máfarun lani le adunraguti luma.16Aba lidin Kaín lídangiñe fulasu le ñein lubéi buga ladimureha luma Bungiu, aba lerederun aganóua lidan fulasu le gíribei Nodu, le luéigiñebei oubaü le ñéingiñe lubéi laboucha weyu libiti Edén.
Ladügawagun Kaín
17Aba lóundarun Kaín tumoun lúmari, aba tadageinadun, aba tagaraüdüni Enoku. Aba ladügün Kaín aban uburugu, aba líchuguni liri liráü le Enoku luagu uburugu ligía.18Enoku ligía meha lúguchibei Iradü, Iradü ligía meha lúguchibei Meuhaéli, Meuhaéli ligía meha lúguchibei Metusaéli, Metusaéli ligía meha lúguchibei Lamekü.19Biámaguañanu buga lúmarigu Lamekü. Adá tiri aban, Silá tiri to aban.20Aba tagaraüdüni, Adá Habali, le ídangiñebei hayabin ha agüriahabaña bágasu aganóua hagía tidan burí kianpu.21Anihein bugaha aban lamulen Habali gíriti Hubali, ñéingiñe lubéi hayabin sun ha áfarubaña árüpa íñaaha hagía fidu.22Ánhounti Silá, aba tagaraüdüni Tubali-Kaín, le nadagimeinbei gürabu adaaguati burí katei lauti buronse luma lauti gürabu. Ñeinñoun aban litu gíritu Naamá.23Luagu aban weyu, aba lariñagun Lamekü houn lúmarigu, Adá tuma Silá:«Númarigu, aganba huméi buidu le nariñagubei hun: Áfaraadina aban wügüri hilagubei ladüga líbaagunina; áfaraadina aban nibureinti ladüga labuleseirunina,24anhein lubeiti lageindawaguba lubéi luéigiñe Kaín sedü wéiyaasu, hageindaguba nuéigiñe ǘrüwa-wein-disedü wéiyaasu».
Lǘrüwan liráü Adán tuma Ewa
25Ábaya lóundarun Adán tumoun lúmari, aba tagaraüdün aban irahü aba tíchugun liri Setü, tariñaga:—Ruha Bungiu aban irahü nun leweñegua Aweli le láfarubei Kaín hilagubei.26Aba giñe garáü lan Setü aban irahü, aba líchugun liri Enosu. Lúmagiñe dan ligía aba lagumeserun liri Bungiu aguahóua lidan afurieiduni.
Bible Society of Honduras