Agumesehani33
Harandarun Hakobu luma Esaú
1Dan le larihinbei Hakobu anitén lan Esaú hau gádürü-san wügüriña, aba lafanreinraguniña irahüñü tun Lía tuma Rakeli hama bián lubúaligu,2aba líchuguniña idamuni furumiñe hau harahüñü, lárigiñe Lía hau tirahüñü, agumuhóuni Rakeli luma Hosé.3Aba lidin Hakobu habá, aba labuluchagun darí ladagarun lerebe múarugu sedü wéiyaasu ligibugiñe líbugaña darí lachülürün yarafa lun.4Aba léibaagun Esaú lubaroun; aba lóuburuni, aba lachuuruni. Aba hayahun hagía biángubei.5Aba larihiniña Esaú würiña hama irahüñü, aba lálügüdahan:—Angia ha, kátañagia?
Lariñaga Hakobu lun:
—Isaanigu ha líchugubaña Bungiu lun bubuein.6Ábati hayabin idamuni hau harahüñü, aba habuluchagun darí ladagarun herebe múarugu;7lárigiñe aba tiabin Lía hau tirahüñü aba giñe hadügüni ligiaméme, agumuhóuni liabin Hosé tuma Rakeli aba giñe hadügüni ligiaméme.8Sódini aba lariñagun Esaú:
—Ka baritagubei badügün hau sun animaalu ha úmabaña nadunragua?
Aba lóunabun Hakobu:
—Lun nagañeiruni bugundan hau.9Lariñaga Esaú lun:
—Uá, namulen, añahein giñe saragu numa. Rédeiba lau le bani.10Aba lagiribuhan Hakobu luma, lariñaga lun:
—Uá, anhein gañei naali lubéi bugundan, resibibéi idewesei le, ladüga narihinibu nigibugiñe, ítara liña nun kamá hamuga Bungiu guánarügü narihubei, ladüga buiti beresibirunina.11Amuriahatina buma lun beresibiruni idewesei le níchugubei bun, rísigüda láadina Bungiu, úati nemegeirun.
Gíbeti lagiribuhan Hakobu, darí lun lanügüni Esaú idewesei ligía.12Lariñagati:
—Keimoun yáagiñe néibuga bubá bubá.13Lariñaga Hakobu lun:
—Níbugaña, subudi bumuti luagu débili hamá irahüñü luagu giñe gasu lan nasaminarun hawagu mudún hama bágasu hau harahüñü, anhein abuchada hawagu, gayaraabei hóunwegun sun mudún ha lidan aban weyu.14Buítimati lun bidin nubá; nídinme hámaru hámaru úara hama animaalugu ha nubá nubaabaña, úara giñe hama irahüñü darime wóundarun buma Seirü.15Lariñaga Esaú lun:
—Anha, nígira hádangiñe wügüriña ha ñǘbuinbaña numa bun.
Aba lóunabuni Hakobu:
—Uá, madiheribá.16Aba lagiribudun Esaú lidoun fulasu le Seirü weyuméme ligía.17Ánheinti Hakobu, aba lidin Sukotun, aba ladügün aban muna ñein lubarua tuma aban houn libiñanigu. Ligía láchubalin fulasu ligía Sukotu.18Dan le liábinbei Hakobu Padán-aramügiñe, chülüti lau magadiñein lóubawagun Kanán aba lemeraagun ligibugiñe uburugu le Sikemü.19Aba lagañeihan aban fulasu hámagiñe lirahüñü Amoru, le lúguchi Sikemü luagu san murusun pülata, aba líchugunu likianpun ñein.20Lárigiñe, aba ladügün aban latarü aba láchuni Eli-Eloé-Ísüraeli.
Bible Society of Honduras