Agumesehani21
Lágurahoun Isaakü
1Kei füramaselani Bungiu tun Sara aba lagunfuliruni le lariñagubei tun,2ítara liña tadageinadun, aba tagaraüdün aban wügüri irahü lau Abüraámü dan le wéiyaali. Aba lágurahoun irahü ligía lidan dan le buga lariñagubei Bungiu.3Isaakü ligía iri le líchugubei Abüraámü luagu irahü le tagaraüdübei Sara lau,4aba híchugun seini tuagu lóustarun dan le wídühali weyu lau, kei lariñaguni Bungiu lun.5San irumu lau Abüraámü dan le garaüwa lubéi Isaakü.6Aba tariñagun Sara túnguarügü:—Éheraagüda láadina Bungiu, sunme ha asubudiruti luagu garaühadina lan, héherahaba numa.7Kaba yebe ariñaga lun Abüraámü luagu nagaraüdüba lan lau! Gama lumoun rúhadina aban irahü lun, lau sun wéiyaali lan.
Tabugún Agarü lau Ísümaeli
8Aba laweiridun Isaakü, aba lachularun. Aba ladügün Abüraámü aban óunwenbu fedu le weyu le lachularunbei Isaakü.9Gama lumoun aba tarihin Sara luagu leredera lan burí Ísümaeli le tagaraüdübei Agarü to Ehiptuna lau Abüraámü adaagua bula lau Isaakü.10Aba tidin ariñaga lun Abüraámü:—Teiba idamuni to yáagiñe lau tiráü! Mabiamadagunbei niráü Isaakü luagu lalagante luma tiráü idamuni to.11Gárititi katei le lun Abüraámü saragu ladüga liráü lan giñe Ísümaeli.12Gama lumoun lariñaga Bungiu lun:
—Madiheribá luagu Ísümaeli luma tuagu bidamun. Adügabéi sun le tamuriahan Sara buma, ladüga lídangiñeba Isaakü hayabin badügawagun.13Nadügüba giñe lun liyabin aban néchani wéiriti lídangiñe Ísümaeli, ladüga biráü ligía.14Larugan, binaafingiua aba lanügün Abüraámü fein, gueru lau duna; aba líchuguni tanagawagu Agarü, aba líchuguni Ísümaeli tun aba lóunahanu. Aba tidin, aba téibugun lidan fulasu mageirawati le gíribei Bérüsewa, ibidiñounga tun haliñounboun lan.15Dan le lagumuchunbei duna le lídanbei gueru, aba tígiruni irahü lábugiñe aban híduru,16aba tidin añuura dise ñéingiñe luéi tarihini lounwen. Dan le tañuurunbei, aba lagumeserun irahü ayahua.17Gama lumoun aba laganbuni Bungiu layahun irahü le, aba lagúarun aban lani Bungiu ánheli tun Agarü siélugiñe, lariñaga tun:
—Ka suserebei bun Agarü? Manufudedabá, ladüga aganba laali Bungiu layahun irahü le, le ñein lubéi.18Beiba! Budabei, ragübei lúhabu, nadügüba lun liabin aban néchani wéiriti lídangiñe.19Aba larihagüdün Bungiu aban fusu lau duna tun Agarü. Aba tidin, aba tabuinchagüdüni gueru lau duna, aba tíchugun lun Ísümaeli lun latun.20Aba líderaguni Bungiu aba laweiridun, aba laganóun lidan fulasu mageirawati, aba liabin lun ábanbei lan buiti gachüühaditi gimara.21Aba laganóun lidan fulasu mageirawati le gíribei Parán, lárigiñe aba tamarieidagüdüni lúguchu tuma aban würi Ehiptuna.
Ladügün Abüraámü aban daradu luma Abimélekü
22Kei burí lídounmeme dan ligía, aba lidin Abimélekü adimureha luma Abüraámü. Ñǘdünti Fikolu le hábuti lisudaran luma. Lariñaga Abimélekü lun Abüraámü:—Ariha wamuti luagu íderagua lánibu Bungiu lidan sun le badüga.23Fiñuba lubeiti nun lídanmeme fulasu le, luagu madügünbadibu lan ni kata wuribati nun, ni houn nirahüñü, ni houn nadügawagun. Fiñuba nun luagu bóuserubadina lan laumeme areini le aubei nóuserabu, ani ítarameme luba lan giñe badüga hama lílana fulasu le ñein lubéi baganawa guentó.24Lariñaga Abüraámü lun:
—Fiñú numuti bun.25Gama lumoun aba lererun Abüraámü lun Abimélekü luéigiñe aban fusu le hagidarubei lumusun Abimélekü luéi.26Aba lóunabun Abimélekü:
—Darí guentó ibidiñeti yebe ni kata libügürü katei le nun, ladüga mariñagunbani nun. Ibidiñeti giñe nun ka lan adügübalin.27Ábati lanügün Abüraámü mudún hama bágasu, aba líchuguniña lun Abimélekü. Aba hadügün biángubei hagía aban daradu weyuméme ligía.28Gama lumoun aba ladireirun Abüraámü sedü mudún hádangiñe lilügüniña,29aba lubeiti lariñagun Abimélekü lun:
—Kame san badireiraña sedü mudún ha?30Aba lóunabuni Abüraámü:
—Ánhaña beresibira sedü mudún ha, bánharuña luagu nadüga lan fusu le.31Ligía Bérüsewa lubéi líribei fulasu ligía, ladüga ñein hadüga biángubei hagía aban fiñún.32Lárigiñe hadügüni daradu ñein Bérüsewa, aba lagiribudun Abimélekü luma Fikolu hageiroun Filistéana.33Aba lábunun Abüraámü aban tídibu wewe tamarísiku ñein Bérüsewa, aba lafurieidun lidan liri Bungiu ñein.34Aba laganóun Abüraámü hageira Filistéana saragu dan.
Bible Society of Honduras