Ésüdürasi7
Lachülürün Ésüdürasi Herusaléun
1Átiri dan lárigiñe, lidan lidaani larúeihan Árütaherühesi le lurúeite Pérüsia, ñeinñein aban wügüri gíriti Ésüdürasi, ladügawagun Seraíasi, Asaríasi, Ilükíasi,2Salumu, Sadoku, Aitubu,3Amaríasi, Asaríasi, Meraiotu,4Seraíasi, Usí, Bukí,5Awisúa, Finesi, Eleasárü luma Aarón, le furumiñeti fádiri.6Ésüdürasi le, aban bugaha máisturu lidan lúrudu le buga líchugubei Aburemei le Lubungiute Ísüraeli lídangiñe Moisesi, ani íderagua lumuti Bungiu, aba lubeiti líchuguni Árütaherühesi sun le lamuriahabei luma lun. Ítara liña lagiribudun Ésüdürasi Babilóniagiñe7lun Herusaléun hau fiu Ísüraelina, ñéinñanu fádirigu hadan, Lewitagu, eremuhatiña, óunigirutiña bena hama eseriwidutiña ténpulurugu, lidan lisedün lirumudiri larúeihan Árütaherühesi.8Aba lagumeseruni Ésüdürasi agiribuduni Babilóniagiñe lau lareini Bungiu weyu furumiñe lidan furumiñeti hati lidan lisedün lirumudiri larúeihan Árütaherühesi, aba lachülürün Herusaléun weyu furumiñe lidan liseingün hati lídanmeme irumu ligía.10Deregeguati Ésüdürasi lungua le gumuti lun laturiahani luma lun ladügüni le lubeibei lilurudun Bungiu, luma lun larufudahani lúrudu luma gumadi houn Ísüraelina.11Anihán tererunbei gárada to lederegeruboun urúei Árütaherühesi lun Ésüdürasi, le fádiri luma máisturu subudihabúti lun sun lugumadin luma lilurudun Bungiu lun Ísüraeli:12«Busugua lumuti urúei Árütaherühesi Ésüdürasi, fádiri ani máisturu le subudihabúti lun lilurudun Bungiu le siélubei.13Ariñagaadina lun sun lan Ísüraelina le lábugiñeti narúeihan, anhein busén lubéi lidin buma Herusaléun, gayaraati lidin, íbini anhein lewita lubéi o fádiri lan.14Lugundun lóunahañadibu urúei hau sun sedü lani eweridihatiña aturiahei ida liña lan katei Hudá luma Herusalén, según lilurudun Bungiu to búhaburuguboun.15Barübei golu luma pülata le líchugubei urúei hama lani eweridihatiña lau hagundan lun Lubungiute Ísüraeli ha aganóubaña Herusalén búmagua,16labu sun pülata luma golu le biyaraati ibiha lidan sun lumúan Babilónia, luma idewesei le híchugun gürigia hama fádirigu tun litenpulun Bungiu uburugu Herusalén.17Lau seinsu ligía, ábame bagañeihan bágasu, gábara hama mudún úara luma hidewese le fulúaruauti, tuma diwéin lun ladagarawagüdün ligibuagu tani litenpulun Hubungiute latarü, uburugu Herusalén.18Adügabéi hau bupanaagu le habusenrun lau golu luma pülata le ígiraguti según lugundan Bungiu.19Ánheinti ílagu le ederegerúbei bun lun kultu tidan litenpulun Bubungiute, deregebéi buguya guánarügü lun Lubungiute Herusalén.20Furumiñeguarügü amu katei le lunti bíchuguni tun litenpulun Bubungiute, gayaraabei bibihini tidan lúbaana lirisin arúeihani.21Ani au, le urúei Árütaherühesi, nariñaguña houn sun ha ahandilihabalin seinsu ha loubafurugubaña duna Éufüratesi, lun híchuguni sun le lamuriahan Ésüdürasi le fádiri, máisturu subudihabúti lun lilurudun Bungiu le siélubei hama lun,22gayaraati lamuriahan sedü-milu-bián-san-ǘrüwa-wein líburu pülata, wein-bián-milu líturu türigu, bián-milu-bián-san líturu diwéin, bián-milu-bián-san líturu garaba luma sun salu le lamuriahan.23Sun le lamuriahan Bungiu le siélubei lunti lichugún lun furese miabin láamuga ligañi hawagun lirahüñü urúei luma luagun arúeihani.24Lunti giñe hasubudiruni luagu moun lumuti lan laguburahóun liseinsuna gumadi o irichaü lúmagiñe furumiñeguarügü hádangiñe fádirigu, Lewitagu, eremuhatiña, óunigirutiña bena, eseriwidutiña ténpulurugu o furumiñeguarügü lan gürigia le eseriwiduti litenpulunrugu Bungiu.25Buguyati Ésüdürasi, según subudi le ru laalibei Bungiu bun, ruba aguseragüdütiña hama gumadimatiña lun híchugun irichaü houn gürigia ha loubafurugubaña duna Éufüratesi, sun ha subudihabúbaña lun lilurudun Bubungiute; ha ibidiñehabubaña lun, arufudahabei houn.26Sun le magunfulirunti lau lilurudun Bungiu luma burí lilurudun urúei, lunti lafarún hilagubei o lasagarun lageiragiñe lun lidoun amu ageiraü o lafayeihan lan o ladaürün».Lafurieidun Ésüdürasi
27Ábati lafurieidun Ésüdürasi, lariñaga:—Biniwalá Bungiu, Habungiute wagüchagu, luagu ládahani urúei lun líchugun uéiriguni tun litenpulun Bungiu Herusalén,28luma luagu larufuduni lareini nun ligibugiñe urúei hama lánigu eweridihatiña hama wügüriña ha wéirigutimabaña palasiurugu, ru ligía gurasu nun, ladüga lau lídehan gayara lubéi buga nóundaraguniña Ísüraelina ha wéirigutimabaña lun hagiribuduba lan numa.
Bible Society of Honduras