Esekiéli43
Lagiribudun luéirigun Aburemei tidoun ténpulu
1Aba lanügünina wügüri ligía luagun bena le luágunbei oubaü le ñéingiñe lubéi laboucha weyu.2Aba narihin anite lan luéirigun Lubungiute Ísüraeli luéigiñe labouchagüle weyu. Aganbúati aban areinchuni héreti kamá liréin duna dan le laragachun, aba larugoungadun ubóu.3Ítara liña uénedü ligía kei le narihubei dan le liábinbei Aburemei agünrinchaguei Herusalén, kei giñe le narihubei lubadu duna le Kebarü. Aba nabuluchagun darí ladagarun nerebe múarugu,4aba lebelurun luéirigun Aburemei ténpulurugun lídangiñe bena le luéigiñebei oubaü le ñéingiñe lubéi laboucha weyu.5Ábati liñurunina lubafu Aburemei, aba lanügünina luagun bürürü le múnadagiñebei, aba narihin luagu buinha lan ténpulu lau luéirigun Aburemei.6Ábati lararamun wügüri ligía nurugabu, aba naganbun ladimurehan Aburemei nun ténpulurugugiñe7lariñaga nun:—Liráü wügüri, anihán lubarabei lálana narúeihan, fulasu le ñein lubéi níchigei nugudi; yaaba naganawa haganagua Ísüraelina gumugua dan. Ni hagía ni harúeitegu madaseirun hamaali niri le sándubei lau hamaricharagun. Madügünhañame guáriuagu houn harúeitegu lárigiñe hóunwegun,8mábunagun hagíame palasiu lau tubenari yarafa lun tubenari nitenpulun. Hagía rútiña minebesei lun niri le sándubei lau hadügün burí katei le magundantina lau; ligía lébubei nagañidun houn aba náfaraguniña.9Dísegüda haméi hawiye hama burí haguariuan harúeitegu nuéi guentó, ábame naganóun haganagua gumugua dan.10—Liráü wügüri, abahüdaguabéi le barihubei ténpulurugu houn Ísüraelina, barǘ hamaamuga busiganu luagu hafigoun.11Ánhaña anüga busiganu luagu sun le adüga hamaalibei, bariñageime houn ida liña lan tigaburi ténpulu luma sun le tídanbei, áfuridagülei, ebelaagülei, sun katei, luma giñe lúrudu burí le lunbei hagunfuliruni. Adibuhabei sun le houn lun hasubudiruni ida liña lan, lun hadügüni. Bürübei giñe sun lúrudu houn gayara láamuga hagunfuliruni.12Anihán tilurudunbei ténpulu: Sun fulasu le geyegubei tau ténpulu luagu wübü, ábanbei fulasu sagüráuti le tímatimaati.
Latarü
13Anihán buga luéirinbei latarü, lau binadu amisuraagülei. Geyegu lau latarü, ñeinñein aban kineli dimí méturu lilulin, dimí méturu lítulen, bóugudigiñe libiti, geyegu lau, ñeinñein aban aru wein seingü sentimeturu luagu. Ítara liña lebu latarü:14Lúmagiñe lurageirugugiñe hunrenti darí luagun laru múnadagiñe libiti, aban méturu liñun. Lamidangua bianñein méturu liñun, luma dimí méturu lóugiñe.15Íñugiñe libiti, le ñein lubéi lágudawagua adagaragüdüni, bianñein méturu liñun. Gádürüguañein liganchun iñun.16Íñugiñe libiti latarü ligía aban labu gádürügubei louba, sisi méturu luagu kada oubaü.17Lamidangiñe, aban giñe labu gádürügubei louba. Kineli le geyegubei lau, dimí méturu lítulen, wein-seingü sentimeturu luagu lítulen laru. Esütépu le amudeiragülei luagun latarü, luéigiñeñein oubaü le ñéingiñe lubéi laboucha weyu.18Lárigiñe aba lariñagun Aburemei nun:—Liráü wügüri, danme lachülürün dan lun ladügǘn latarü, gasu lagunfulirun burí katei le: Gasu lagudúniwa aban animaalu luagu latarü keisi adagaragüdüni le gudawarügüti, ábame labahichawagun latarü lau lita animaalu ligía.19Bíchuguba aban bágasu houn fádirigu Lewitagu ha ladügawagun Sadoku, kei hagía lubéi lúnbaña hayarafadun nun lun heseriwidunina, lun hadagaragüdüni keisi adagaragüdüni luagu figóu. Au, le Aburemei íchugubalin.20Lárigiñeme, banügame murusun lídangiñe lita, ábame babahichaguni gádürü liganchun latarü, gádürü larigei luma sun laru. Ítara luba barumadagüdüni sunsuinagubei lídangiñe figóu.21Lárigiñeme ábame banügüni bágasu le buga adagarawagüdübei luagu figóu, ábame báguduni bóugudi tuéi ténpulu, lidan ubaraü le iridúbei lun ñeinba lan lagudúa.22Laruganme ábame badagaragüdün aban liraüraü gabara le úati ni kata mégeiti luagu, luagu figóu, ábame harumadagüdüni fádirigu latarü, ítara kei buga hadügüni lau bágasu.23Danme le básurun, banügame aban bágasu wügüri luma aban mudún ha úati mégeiti hawagu,24ábame badagaragüdüniña nun. Habahichaguañame fádirigu lau salu, ábame háguduniña keisi adagaragüdüni le gudawarügüti nun.25Badagaragüdüba sagü weyu luagu sedü weyu keisi adagaragüdüni le gudawarügüti luagu figóu: Aban liraüraü gabara, aban bágasu wügüri luma aban mudún ha úati mégeiti hawagu.26Sagü weyu, luagu sedü weyu, gasu harumadagüdüni fádirigu latarü sunsuinagubei, lun layusurún lun burí katei sagüráuti.27Ítara luba hadügüni luagu sedü weyu, lúmagiñemeti liwidün weyu, hagumeserun íchigei adagaragüdüni le gudawarügüti luma burí adagaragüdüni lánina arandaruni. Ábameti neresibirunün lau ugundani. Au, le Aburemei ariñagubalin.
Bible Society of Honduras