Esekiéli40
Lanügǘniwa Esekiéli Herusaléun
1Weyu diisi lidan hati, le weyu iseri irumu, aba líchuguni Aburemei lúhabu nuagu, aba lanügünina lidan uénedü lumúanrugun Ísüraeli. Dan ligía, madiseeli yebe lanügün wein-seingü irumu lúmagiñe wanügǘn Babilónioun, luma katorusu irumu lúmagiñe lárügüdüniwa Herusalén.Lumúanrugu Ísüraeli, aba líchugunina Aburemei luagu aban wübü íñuti; luéigiñe wübü ligía, aba narihin luagun suru, aba narihin saragu muna kamá hamuga aban uburugu.3Aba lanügünina Aburemei ñeinhin, aba narihin aban wügüri kamá lauti buronse. Rara liña bénabu, ñeinñein aban riban tauti linu lúhaburugu luma aban wewe le amisuraagülei.4Aba lariñagun wügüri ligía nun:
—Arihabá buidu, aganba buguyame buidu tenibá lun le lunbei narufuduni bun, ladüga lun narufuduni bun lanügabu Aburemei ñahoun. Lárigiñeme ábame basubudiragüdüni sun le barihin houn lumutuniña Ísüraeli.
Bena le luéigiñebei láfuachagüle weyu
5Bóugudigiñe tibiti ténpulu, ñeinñein aban baríeiru geyegua tau. Ǘrüwañein méturu luagu wewe amisuraagülei le lúhaburugubei buga wügüri ligía. Ábati lamisurahani baríeiru, ǘrüwañein méturu luagu lítulen, ǘrüwa méturu dimí liñun.6Lárigiñe aba lidin luagun bena le luéigiñebei oubaü le ñéingiñe lubéi laboucha weyu, aba lawariruni esütépu, aba lamisurahani lebelaagüle bena, ǘrüwañein méturu lidabuberen.7Kada rumu to luéigiñeboun kada louba ebelaagülei ǘrüwañein méturu timigifen, ǘrüwa tidabuberen, bián méturu dimí tidisegua tuáriuagua. Lárigiñe, ñeinñein bena le tuágunbei rumu to lubaragiñeboun ebeluruni, larihin tuagun ténpulu ǘrüwañein méturu lidabuberen lebelaagüle bena ligía.8Aba lamisurahani rumu le luéigiñebei ebelaagülei ténpulurugun, gádürü méturu. Ñeinñein bián wagabu, aban méturu ligaranan kada aban.10(Luagu kada oubaü libiti ebelaagülei le luéigiñebei oubaü le ñéingiñe lubéi laboucha weyu, ñeinñoun ǘrüwa rumu, aban labu tuéinamun, wagabu burí le luéigiñebei kada oubaü, aban giñe labu luéinamun.)11Lárigiñe aba lamisurahani bena le ebelaagülei: Séingüñein méturu lítulen, sisi méturu dimí, ebelaagülei.12Tigibugiñe kada rumu. Ñeinñein aban liraüraü baríeiru, aban méturu dimí lítulen luéigiñe kada oubaü. Kada rumu ǘrüwañein méturu títulen, ǘrüwa timigifen.13Lárigiñe aba lamisurahani sun lítulen ebelaagülei, lúmagiñe ǘnabugiñe tibiti aban rumu lumoun ǘnabu tibiti rumu to igibugiñeinboun, luma luéigiñe aban bena lumoun bena le igibugiñeinbei, dúusuñein méturu dimí luagu.14Lárigiñe aba lamisurahanu ebelaagülei: diisi méturu. Muna to ebelaagülei, geyegutiña lau bürürü.15Lúmagiñe bóugudigiñe libiti bena darí turageirugun ebelaagülei, weinñein seingü méturu luagu.16Dandu burí rumu keisi wagabu, gafunederanti lau múnadagiñe, luma geyegu tau muna to ebelaagülei. Gafunederanti giñe ebelaagülei geyegua lau ayarawaguni múnadagiñe libiti. Ñeinñoun burí tiyawa tídibu yaraüwa luagu wagabu.Bürürü le bóugudigiñebei
17Lárigiñe aba lanügünina wügüri ligía luagun bürürü le bóugudigiñebei. Íchaahouati burí dübü geyegu lau bürürü tuma darandi rumu.18Dübü-agei ligía, le ǘnabutimabei, aban labu lítulen luma timigifen muna burí to ebelaagülei.19Aba lamisurahani lidisegua bena le ǘnabugiñebei, darí bóugudin libiti bena le múnadagiñebei, dimí-sanñein méturu limigifen.Bena le luéigiñebei nórute
20Ñeinñein giñe aban ebelaagülei luagun nórute libiti bürürü le bóugudigiñebei. Aba lamisurahani limigifen luma lítulen.21Ñeinñoun giñe ǘrüwa rumu luéigiñe kada oubaü, luma wagabu luma ebelaagülei, aban labu luéinamun luma le luéigiñebei ebelaagülei le luéigiñebei oubaü le ñéingiñe lubéi laboucha weyu: Wein-seingü méturu limigifen luagu duusu-dimí lidabuberen.22Ebelaagülei, funedera luma burí tiyawa tídibu yaraüwa, aban labu luéinamun luma le luágubei ebelaagülei le luéigiñebei oubaü le ñéingiñe lubéi laboucha weyu. Múdeiwati giñe luéigiñe aban esütépu le sédüti lamudeirun lerederati ebelaagülei múnadagiñe.23Dandu luéigiñe oubaü le ñéingiñe lubéi laboucha weyu, kei luéigiñe nórute, ligibugiñe ebelaagülei le bóugudigiñebei, ñeinñein ábanya ebelaagülei le luágunbei bürürü le múnadagiñebei. Aba lamisurahani wügüri ligía lidisegua bián ebelaagülei luáriuagua: Dimí-san méturu limigifen.Bena le luéigiñebei suru
24Lárigiñe aba lanügüniña luagun suru, le ñein lubéi aban ebelaagülei, aba lamisurahani wagabu luma ebelaagülei: Aban labu luma le líbiri.25Ñeinñein burí funedera geyegu tau muna to ebelaagülei, lau burí tani ebelaagülei, kei to tíbiri. Wein-seingü méturu timigifen, duusu-dimí tidabuberen.26Ñeinñein giñe aban esütépu le sédüti lamudeirun, múnadagiñeñein giñe ebelaagülei. Ñeinñein giñe burí tiyawa tídibu yaraüwa luagu burí wagabu, aban luéigiñe kada oubaü.27Luagu bürürü le múnadagiñebei, ñeinñein giñe aban bena le luágunbei suru. Aba lamisurahani wügüri ligía lidisegua bián bena le luéigiñebei suru luáriuagua: Dimí-san méturu limigifen.Bürürü le múnadagiñebei: Bena le luéigiñebei suru
28Lárigiñe aba lanügünina luéigiñe ebelaagülei le luéigiñebei suru luagun bürürü le múnadagiñebei. Aba lamisurahani bena le luéigiñebei suru, aban labu luma le burí líbiri bena.29Rumu burí, ebelaagülei luma wagabu, aban labu luéinamun luma le líbiri. Muna lau burí tebelaagüle, ñeinñein giñe burí funedera geyegua tau, wein-seingü méturu timigifen, luagu duusu-dimí tidabuberen.31Luágunñein bürürü le bóugudigiñebei ebelaagülei. Ñeinñein burí liyawa tídibu yaraüwa luagu wagabu. Luéigiñe aban esütépu le wídüti lamudeirúa luagun bena ligía.Bürürü le múnadagiñebei: Bena le luéigiñebei láfuachagüle weyu
32Lárigiñe aba lanügünina lidoun bürürü le múnadagiñebei, luéigiñe oubaü le ñéingiñe lubéi laboucha weyu, aba lamisurahani ebelaagülei, aban labu luma le líbiri.33Dandu burí rumu, wagabu luma ebelaagülei, aban giñe labu luma le líbiri. Muna to ebelaagülei lau sun tebelaagüle, ñeinñein burí funedera geyegua tau, wein-seingü méturu timigifen, duusu-dimí tidabuberen.34Luágunñein bürürü le bóugudigiñebei ebelaagülei. Ñeinñoun burí tiyawa tídibu yaraüwa luagu kada oubaü. Luéigiñe aban esütépu le wídüti lamudeirúa luagun bena ligía.Bürürü le múnadagiñebei: Bena le luéigiñebei nórute
35Lárigiñe aba lanügünina wügüri ligía luagun ebelaagülei le luágunbei nórute, aba lamisurahani ebelaagülei, aban labu luma le líbiri.36Ñeinñoun burí giñe rumu, wagabu, ebelaagülei luma burí funedera geyegua lau. Muna to ebelaagülei wein-séingüñein méturu timigifen, duusu-dimí tidabuberen.37Luágunñein bürürü le bóugudigiñebei ebelaagülei. Ñeinñoun burí tiyawa tídibu yaraüwa luagu wagabu. Luéigiñe aban esütépu wídüti lamudeirúa luagun bena ligía.Muna burí to yarafaboun lun bena le luágunbei nórute
38Ñeinñoun giñe aban rumu fadagu luma wagabu le lani ebelaagülei. Ñein hachibúa animaalu ha lúnbaña adagaragüdüni.39Ñeinñein gádürü dábula lidan ebelaagülei, biama luéigiñe kada oubaü, le uágubei hafarúa animaalu lun hadagarawagüdüniwa luagu latarü luma lun adagaragüdüni luagu figóu o luagu lan duru.40Bóugudi libiti ebelaagülei le luéigiñebei nórute, ñeinñein giñe bián dábula luéigiñe kada oubaü,41gádürüñein lubeiti dábula múnada luma gádürü bóugudi: Wídüñein dábula ligía. Ligibuagu burí dábula ligía háfarawagua animaalugu.42Gádürü dábula le uágubei hichugúa animaalugu ha gudawarügübaña, lauti dübü, ǘrüwa-wein-keinsi sentimeturu limigifen luma ǘrüwa-wein-keinsi lidabuberen, dimí-san sentimeturu liñun, luagu buriti lichugúa úi le idewesei. Múnadagiñe tibiti rumu, sun geyegua tau, ñeinñein aban aru sisi sentimeturu lidabuberen, le uágubei lichugúa idewesei le fulúaruauti, luma burí ílagu le aubei hafarúa animaalu lun hágudawaguniwa luagu latarü.44Lidan bürürü le múnadagiñebei, bóugudi luéi burí bena le múnadagiñebei, ñeinñoun bián rumu, aban lurugabu bena le múnadagiñebei le luéigiñebei nórute, tigibu luagun suru, luma aban lurugabu bena le múnadagiñebei luéigiñe suru, tigibu luagun nórute.45Aba lariñagun wügüri ligía nun: «Rumu to lauboun tigibu luagun suru, hountu fádirigu ha eseriwidubaña ténpulurugu,46rumu to lauboun tigibu luagun nórute, hountu fádirigu ha eseriwidubaña luagu latarü. Ladügawagun Sadoku, ani hagíarügüñanu Lewitagu gayara hayarafadun lun Aburemei lun heseriwidun lun».Bürürü le múnadagiñebei tuma ténpulu
47Lárigiñe aba lamisurahani wügüri ligía bürürü le múnadagiñebei: Dimí-sanñein méturu luagu kada louba. Tigibugiñeñein ténpulu latarü.48Aba lanügünina lidoun tebelaagüle ténpulu, aba lamisurahani luagaburi: Bián méturu dimí ligaranan kada aban. Sédüñein méturu luagu lítulen bena, aban méturu dimí luagu kada lágüdaha tubenari.49Díisiñein méturu luagu tidabuberen, sisi luagu tilulin, luéigiñe aban esütépu díisiti lamudeirúa tuagun. Ñeinñein aban ebu lurugabu kada wagabu.Bible Society of Honduras